De 25. Mee wäerten déi nei europäesch Dateschutzreegele – kuerz GDPR - a Kraaft trieden. Kennt Dir ons doriwwer méi soen?

GDPR –„General Data Protection Regulation“ wäert an alle Länner vun der Europäescher Union a Kraaft trieden. Wéi HIEREN Numm et scho seet, soll dës nei Veruerdnung d’Rechter vun de Bierger wat hier Daten ugeet stäerken. Et betrefft all Firmen oder Organisatiounen, déi Date vun europäesche Bierger verschaffen oder späichere – onofhängeg, op et europäesch Firme sinn oder net; oder op et privat Firme oder zum Beispill ëffentlech Ariichtungen oder Clibb sinn. D'Reglement soll dem Bierger aus der europäescher Union erlaben seng Donnéeë besser ze schützen.
 
Wat bedeit des nei Form vu perséinlechem Dateschutz dann elo konkret fir d‘Bierger?

Majo de GDPR erlaabt dem Eenzelen, op dat elo en Client, Mataarbechter oder soss eng Persoun déi an enger Verbindung mat enger Firma oder Organisatioun steet seng Date besser ze schützen.
Dëst Reglement erlaabt beispillsweis dem Eenzele bei enger Firma unzefroen, wei eng Donnéeën dat déi Firma iwwert ee selwer gespäichert huet, a firwat dat déi Donnéeën iwwerhaapt gespäichert goufen. Dann huet den Eenzelen d’Recht unzefroen, dat des Donnéeë verbessert oder ebe gelëscht ginn. Doniewent gëtt och d’Weidergi vun Donnéeë gereegelt.
Mat der neier Veruerdnung ass all Persoun Besëtzer vu sengen eegenen Daten an d’Rechter vun de Leit gi gestäerkt. D’Prozeduren, fir iwwerhaapt kënnen Daten ze sécheren, gi méi komplizéiert.
An der Praxis ass dee ganze Prinzip allerdéngs guer net esou einfach – Hautdesdaags ginn eng Unzuel vun Donnéeën, fräiwëlleg oder net, all Dag iwwerdroen an deelweis gespäichert.
Fir vill Firmen ass d’Anhale vum GDPR och en groussen Opwand. Se mussen net nëmmen Ophuelen, wat fir Daten dat se am Moment vun hire Mataarbechter oder Client gespäichert hunn – awer se musse virun allem Dokumentéieren, firwat dat déi Donnéeën an der Firma gebraucht ginn. Den techneschen Opwand ass hei grouss, virun allem wann verschidden Datebanke benotzt ginn. Et muss awer zum Beispill och garantéiert ginn, dat wann en Client freet dat seng Donnée gelëscht ginn, dat doduercher de System ka weider lafen.

Matdeelungen, déi erklären wat Infirmièren wierklech maachen an firwat sech Investitiounen an d‘Fleege lounen, ginn et seelen. Fleegepersonal gëtt dacks mat Aussoen konfrontéiert ewéi „An der Fleege schaffen, dat kéint ech net! Awer Respekt dofir, dass du dat mëschs…“. Ech wëll net méi fir mäi Beruff bematleet ginn, an hu mir folgend Fro gestallt: Wéi kann ech der Ëffentlechkeet an den Nolauschterer eng Virstellung dovunner ginn, wat et wierklech bedeit an der Fleege täteg ze sinn, dass Fleege méi ass ewéi Ausscheedungen, Sprëtzen, Verbänn, Bluttdrock moossen an Iessen reechen? Duerch eng Anekdot vun menger Aarbecht als Infirmière op enger Palliativstatioun probéieren ech, iech mäin Beruff also méi no ze bréngen.
Anektdote
Si spillt un engem stralenden Ouschtersonndeg. Déi éischt Blummen bléien, d‘Statiounskaz streckt sech an der Sonn an matzendran ass d‘Mme S., déi zanter enger Woch bei eis ass. D’Mme S. leit un engem onheelbaren Mokriibs, ass nach zimlech jonk, bestuet an huet zwee Kanner. Zanter Wochen zwéngt si sech, hirer Famill zu Léift zum iessen fir net weider un Gewiicht ze verléieren an net nach méi schwaach ze ginn. Fir dem Statiounsgeroch entgéintzewierken an Erënnerungen un eng schéin Zäit oder un eng Platz, wou een sech gebuergen fillt ze erwächen, baken mir fir Ouschteren en Heefezopf. Um Statiounsgang richt et also no frësch gebaaktem Zopf ... an dem Geméisgratin, deen d’Kächin zoubereet huet. Beim Opmaachen vun der Dier bemierken ech, wéi d’Patientin schnuppert an froen, ob ech d’Dier en Spléck wäit oploossen soll, soudass den Geroch weider an d’ Zëmmer stréimt. Si mengt: „Oh jo weg., dat richt jo gutt!“.
An der Kichen zeréck hellt d’Kächin grad den Gratin deen nach dämpt aus dem Uewen. D’Mme S. huet keen Iessen bestallt, si wollt nëmmen Zwiback iessen. Trotzdeem entscheeden ech mech dozou, hier e bëssen vum Gratin unzebidden. Ech hat hier virun 30 Minutten en Medikament géint d’Iwwelzegkeet ginn, soudass d’Wierkung vum Medikament zur Iessenszäit antrëtt, mam Ziel, dass der Mme S. doduerch d’Iessen erëm e bëssen méi Freed mëscht. Zanter hirem Openthalt op der Statioun hunn ech gemierkt, dass d’Mme S. sech freet, wann d’Statiounskaz bei si an d’Zëmmer kennt. Setzt des bis op hirer Decken, beweegt d’Patientin sech kaum, fir se nëmmen net ze verjoen.
A Begleedung vun der Katz versécheren ech hier, dass et keng Schan ass, wann si den Gratin net ganz ësst. „Dier kennt och einfach nëmmen genësserlech drun richen“. Op keen Fall well ech, dass d’Mme S. den Gratin elo ësst, fir mir en Gefalen ze maachen. An kuckt do, wou ech zeréckkommen, fannen ech eng eidel Schossel. D’Mme S. setzt am Bett an krault eis Katz. Mir war bewosst, dass d’Mme S. während dem Owesiessen keen Besuch hat. Si huet den Gratin wuel selwer giess.
D’Freed, d’Iessen zanter laangem nees ze genéissen, liesen ech hier direkt un hirem stralenden Gesicht of. Si schwäermt vum Geschmaach no Wäin, Zwiwwelen, Botter, Poretten,...  „Den Gratin huet wuel sou gutt geschmaacht wéi en richt?“ froen ech virsiichteg an virwëtzeg zu gläich. Si ass hellwaakreg: „Dat war eng richteg Geschmaachsexplosioun!“ Vun dem schéinen Erliefnis schwätzt si nach Deeg laang an ech denken och dacks un déi gelongen Fleege zeréck. Do hat ech wuel eng gutt Nues!
Schluss
Och dat gehéiert zum Beruff vun der Infirmière an mécht en esou eenzegaarteg. Eng gutt Fleege ass komplex an wéi dir sécher eraushéieren hutt, ass et dobäi ëm wäit méi gaangen ewéi en Plateau an d‘Zëmmer ze stellen an en Medikament ze ginn. D‘Detailer zielen.

Et ginn där Enger an et ginn där Anerer. Dat ass ee Sproch deen een nawell dacks héiert. De Rich Simon huet sech am Apropos vun haut Gedanken driwwer gemaach, wat fir eng Leit hien a sengem Entourage alles kennt.

Den zoustännege Minister wëll et zwar net héieren mä d’Generalsekretärin vum Ordre des architectes et des ingénieurs-conseils, dem OAI huet et gëschter nach emol bei eis op der Antenn betount, et gëtt e Logements-Noutstand zu Lëtzebuerg. An un deem wäert sech wuel an nächster Zäit net terribel vill änneren, fäert d’Claude Zeimetz a sengem Commentaire

De Roland Kalté mécht sech haut mol e puer Gedanken iwwert eis Welt déi ëmmer méi séier dréit:

"Mieux vaut se tromper avec Sartre, que d'avoir raison avec Aron". Esou soten d'Studenten am Mé 68 well se de lénke Sartre, dén sech heiandsdo geiirt huet, léiwer haaten wéi dé rietsen Aron, dén och nët ëmmer Recht haat. Ech war deemols nach ze jonk fir den Optimismus vun 68 ze délen, mé ech sin haut nach nët ze aal fir de Pessimismus vun 2018 ofzeleenen. "Soyons réalistes, demandons l'impossible! L'imagination au pouvoir! Ne pas céder sur son désir ! Sous les pavés la plage! " dat waren nëmmen e puer vun deene sëllechen optimistesche Slogan'en deemols, déi neischt konkret gefuerdert hun, awer alles direkt gewollt hun. Haut leien d'Pavéen an de Petrol op der Plage, an nët d'Imaginatioun, mé d'Rechemaschinn ass un der Muecht. War Mé 68 also neischt aaneres wéi e Brainstorm an engem Humpen ? Loosse mer et esou soen: fir d'Droite huet dé Mé do ze vill bruecht, fir d'Gauche nët genuch.

    Et ass op jidder Fall symptomatesch, dass Frankreich séch esou schwéier deet mat dem 50. Geburdsdag vu Mé 68, wéi Tréier mat dem 200. Geburdsdaaag vum Karl Marx. Um rietse Spektrum gët nët vill Guddes un dém Engen wéi un dem Aanere geloos: de Marx huet de Gulag um Gewëssen, an no 68 huet d'Chienlit sech an der Gesellschaft breet gemaach wéi en Hond a séngem Bett: d'Autoritéit ass futsch, d'Schoul huet seng Basics verroden esou wéi d'Fraen hiert Kachdëppen, an d'Emwelt hoellt sech geschwë méi wichteg wéi de Profit. A séngem Film ass den Andy Bausch woul nët grad esou streng mam Mé 68, mé e reduzéiert en op eng fiicht a lëschteg Party vun e puer Fils à Papa'en, woubei en iwwerseit dat"des petits de bourgeois" nët onbedéngt des Petit-Bourgeois'e sin.  

    Op dem lénke politesche Spektrum par contre ass e frou dass de Marx 2018 am Mé gefeiert gët. Hie war nämlech mam Freud é vun de Modeller vun 68, esou wéi de Voltaire an den Diderot se fir 1789 waren. Fir sie steet de Mythos vun 68 niewt der Révolution Française an dem Venceremos vum Fidel Castro fir d'Romantik an der Revolutioun, och wann sie vill ze oft hir eege an och deenen aaneren hir Kanner frësst. Mir können eis dëser Deeg deene sellechen a kontradiktoresche Bilan'e nët erwieren déi opgestaalt iwer d'Konsequenzen vu Marx a Mé. Eppes könne mer allerdéngs feststellen: se sin allen 2 nët doud, well d'gët nët nemme Guddes iwer se erzielt.

    An hei méi provokative Fazit, frei nom Slogan vun 68: léiwer nostalgesch mat der Gauche, wéi realistesch mat der Droite. Ouder solle mer soen: léiwer produktiv mat dene Lénken, wéi produktivistesch mat deene Rietsen!

Zënter enger Woch ass ons d'Ländchen ëm eng Dinosaurierschank méi räich. D'Decouverte vun esou engem Fossil ass fir Lëtzebuerg tatsächlech aussergewéinlech an de Medierummel war duerfir net manner grouss wéi viru véier Joer, wéi déi éischt zwou fossil Dinoschanke presentéiert goufen. Deemools koumen d'Fossilie vu Brouch, dës Kéier vu Rëmëleng, wou zwee Amateur-Paläontologen bei enger Fouille op eppes gestouss waren, dat anescht war, wéi d'Fossilien, déi se normalerweis ausgegruewen hunn. Well wann een op deene Plaze sicht, erwaart ee sech virun allem verstengert Reschter vu Mieresdéieren; d'Gestengscouchen op där Plaz sinn nämlech  d'Iwwereschter vun engem Mier, dat hei virun 170 Millioune Joer existéiert huet. Datt et duerno 10 Joer gedauert huet, bis d'Schank eendeiteg als déi vun engem gemitleche Planzefriesser mam Numm Scelidosaurus identifizéiert gouf, soll duerfir och net iwwerraschen.

Den Numm selwer seet héchstwahrscheinlech nëmmen deenen mannsten eppes, seng nooste Verwandte gehéieren allerdéngs zu de Superstaren an der ganzer Dinopanoplie a feele seelen an de Plastiksammlunge vu jonken Dinofans: de Stegosaurus an den Ankylosaurus. An ass et net esou, datt vill Kanner, ier se richteg liesen a schreiwen, nach virdrun ouni Problem Zongebriechernimm wéi Parasaurolophus, Deinonychus oder Diliphosaurus ausschwätze kënnen? Dinosaurier sinn zu Ikone vun der Popkultur ginn. Si trampelen iwwer d'Kinosleinwänn an d'Tëleevisiounsecranen an dekoréieren esou zimlech all Produit, deen een opziele kann.

Duerfir këint ee mengen, datt d'Dinosaurier an hir Zäitgenosse wéi d'Mieresreptilien an d'Fluchsaurier och déi beschten Ambassadeure misste sinn, wann et drëms geet, d'Wëssenschaft de Leit am allgemengen an net nëmme Kanner méi no ze bréngen. Dës Déiere hunn nämlech masseg Informatiounen an hire Schanken hannerlooss, déi ons haut vill doriwwer verroden, wéi d'Welt deemools funktionéiert huet. Kaum en naturhistoresche Musée kënnt duerfir haut ouni Dinoen aus. Mat dëse risegen Déieren kann een nämlech esou wichteg Theme wéi Evolutioun iwwer Millioune vu Joeren, d'Ausstierwe vun Aarten oder och de Kierperbau vun Déieren erklären, mä och anschaulech weisen, wéi Wëssenschaft am allgemenge funktionéiert.

Ech war dunn dach iwwerrascht, wéi ech bei enger net repräsentativer Online-Ëmfro vun enger grousser Dageszeitung hei am Land gelies hunn, datt esou guer d'Thema Dinosaurier fir 50 Prozent vun de Leit ze wëssenschaftlech wier. Esou eng Ëmfro ass natierlech elo net iwwerzebewäerten, et huet ee séier op e Knäppche gedréckt, a repräsentativ war se wéi gesot och net. Ma trotzdeem, kann ee sech Gedanke doriwwer maachen, wann ee weess, wéi staark d'Iddi vum Dino bei de Kanner am Kapp verankert ass an anscheinend bei den Erwuessenen guer net méi. Wéini kënnt dësen Ëmschwong, deen aus engem Fuerscher in spe, dee partout vergaange Welten entdecke wëll,  en Erwuessene gëtt, deen awer och guer näischt mat Wëssenschaften ze di wëll hunn? Wou muss den Enseignement an d'Wëssenschaftsvermëttlung usetzen, fir datt de Virwëtz aus der Kandheet och weiderhin nach erhale bleift an idealerweis an enger gréisser Zuel vu Fuerschercarrière féiert? Eng Wëssensgesellschaft, déi dësen Numm och verdéngt, muss sech dëse Froe stellen, soss steiert och si fréier oder spéider a Richtung Lost World.                              
 
* De Patrick Michaely ass vu Formatioun Biochemiker an am Naturmusée responsabel fir Ëffentlechkeetsaarbecht a Kommunikatioun.

Talent brauch ee fir alles, och fir mam Auto ze fueren, mengt d'Marie Gales!

De 24. Abrëll huet de Staatsminister an der Chamber séng Deklaratioun zum Etat de la Nation virgedroen. Den Dag drop hunn de Finanz- an de Wirtschaftsminister am Kader vum Semestre Européen, wéi an allen EU-Länner zur Koordinatioun vun der Strategie Europa 2020, de “Programme de Stabilité (ou de Convergence)” – PSC – an de “Programme National de Réforme” – PNR – virgestallt, fir duerno iwwer déi dräi Contributiounen ze diskutéieren.
Well awer sech praktesch op d’Deklaratioun vum Premier konzentréiert gouf, an de PSC an de PNR dobäi ënnergungen, wollt ech op dëser Plaz mol op dee PNR agoën.
Dëse Programm soll virun allem rapportéieren, wéiwäit d’Regierung bei der Erreechung vun de selwer gesaten Objektiver komm ass, a wat fir Mesure weider sollen hëllefen, déi Ziiler ze erreechen.
Enner dëse fënnef Ziiler interesséiert mech natierlech dat am meeschten, wou et drëm geet, europawäit mindestens 20 Millioune Mënschen aus der Aarmut an der sozialer Exklusioun ze féieren. Dozou soll all Land mat engem selwer definéierte Contingent bäidroën: Lëtzebuerg huet sech hei d’Zuel 6.000 als Ziil gesat. Well d’Donneeën heizou ëmmer réischt mat 2 Joer Verspéidung virleien, gëllen d’Zuele vun 2008 als Ausgangspunkt – mat 72.000 Leit ënnerm Aarmutsrisiko oder a sozialer Exklusioun – , an déi vun 2018 wäerten den Endpunkt markéieren: et bleift also kaum nach Zäit!
Statt ëm 6.000 rofzegoën, geet déi Zuel awer weider an d’Luucht, op mëttlerweil 114.000 no den Zuele vun 2016. Do muss een dem Argument vum Wirtschaftsminister, datt jo awer d’Bevëlkerung an deeër Zäit gewuess ass scho Rechnung droen, mee och bei enger Héichrechnung entspriechend dësem Wuestum bleift et bei enger massiver Verschlechterung! An do hätt ee jo dann erwaarde kënnen, datt, net réischt 2018, mee och schonn an deene Joere virdrun, nei Mesuren hätten ergraff misse gin. Mee am Prinzip sinn déi Mesuren, déi an deem Programm stinn, all déi Joere praktesch déi selwecht bliwwen. Dat weist entweder net vill Fantasi, oder awer net vill Engagement fir dëst Ziil!
An da muss een zu deem PNR nach eppes feststellen: vun Ufank u gehéiert et zu der europäescher Strategie Europa 2020, datt do all “Stakeholder” mat abegraff ginn. Dozou zielt déi hei ugeschwate Virstellung am Parlament. An och déi Diskussioun den 28. Mäerz am Kader vum Conseil économique et social. Mee wat ass mat der Zivilgesellschaft, déi laut EU och soll mat agebonne ginn? Bis 2014 nach ass regelméisseg mindestens eemol pro Joer de Groupe Inclusion sociale zesumme komm, wou Ministèren, Sozialpartner, Offices sociaux an Zivilgesellschaft am Virfeld de PNR diskutéiere konnten. Mee ouni irgendeng Erkläerung gëtt et déi Reuniounen säitdeem net méi. Net nëmme gesäit Transparenz an Abannen anescht aus, mee well d’Resultater alles anescht wéi berouegend sinn, wier et dringend noutwendeg, mat allen zesummen ze schaffen, déi eppes bäidroe kënnen.
Ob et deemnächst hei zu enger Besserung kënnt, ass awer méi wéi ongewëss.

Riets iwwerhuelen ass jo laut Code de la route streng verbueden. An nawell ginn et Gefierer, déi dat dierfe, mee bei verschiddene stellt sech de Camille Ney awer esou seng Froen…