RTL - Carte Blanche

RTL - Carte Blanche

By RTL Radio LëtzebuergNews
Download on the App Store

RTL - Carte Blanche episodes

  • Carte Blanche: Gilles Hempel, 04/12/2017
    Säit Joerzéngte gëtt zu Lëtzebuerg den « accès à la propriété » massiv mat Steiergelder gefördert.
    Och am sog. soziale Wunnengsbau ass haaptsächlech gebaut gi fir ze verkafen. D’Société Nationale des Habitations à Bon Marché (SNHBM) huet zanter hirem bal honnertjäregem Bestoen iwwer 9000 Wunnenge gebaut an huet déi quasi all verkaaft. Just eng 170 Unitéiten hunn sie als sozial Mietwunnengen an hirem Patrimoine behalen.
    An och de Fonds du Logement huet quasi d’Halschent vun all senge Wunnenge verkaaft.
    An d’Gemengen , wann sie da mol eppes gebaut hunn, da war et sougudd wéi ëmmer fir de Verkaaf, mat der nobeler Ausnam vun der Stad Lëtzebuerg an der Stad Esch, déi sech ëmmerhin jeeweils ee Park vun en puer honnert soziale Mietwunnengen opgebaut hunn.
    D’sozial Mietwunneng ass d’Stéifkand vun der Logementspolitik vun de leschte Joerzéngten. Si meescht knapps 2% vun eisem ganze Wunnengspark aus. An anere Länner sinn et der mol gutt a gären 20 bis 30%. Mee virwaat ass dat esou? Ass et Zoufall? Oder stécht do villäicht eng sougenannten « hidden agenda » dohannert?
    Et wier an der europäescher Geschicht net déi éischte Kéier.
    Wéi d’Margrete Thatcher am Laf vun hirer éischter Legislaturperiod ganz schlecht Sondagen hat, an d’Tory’en riskéiert hunn déi nächst Wahlen ze verléieren, do hat sie eng genial Idee. Zu dem Moment huet an England d’Aarbechterklass majoritär a staatleche Mietwunnenge gelieft an huet traditionell Labour gewielt. D’Margrete Thatcher ass dunn higaangen an huet deene Labour-Wieler d’Méiglechkeet ginn, fir déi Sozialwunnengen ze kafen, an deenen si gewunnt hunn. Déi hunn dunn all en decke Prêt gemaach, a si Propriétaire ginn. An vun haut op muer waren si Quelqn. Si ware lo stolz Propriétairen an sie haten op eemol eppes ze verléieren: hiert Eegentum. D’Magrete Thatcher huet déi nächst Wahlen héichhaus gewonnen.
    Een anert Beispill ass Wien. „Das rote Wien“. Do ass all bal al zweet Wunneng eng sozial Mietwunneng. D’Stad Wien ass dee gréisste Vermieter an Europa a gëtt säit eh und je sozialdemokratesch regéiert. An nach ëmmer war dat deene Konservativen een Dar am Aen. Dat ass souwäit gaangen, dass am Austrofaschismus ënner dem Engelbert Dollfuß souguer mat Kanounen an de soziale Wunnengsbau geschoss ginn ass.
    Zeréck zu Lëtzebuerg kann een sech also froen inweiweit den héijen Taux vu Propriétairen an déi politesch Dominanz vu liberalen a konservative Kräften zesummen hänkt?
    Zoufall oder politesche Kalkül?

    3 min
  • Carte Blanche - Marc Schiltz, 01/12/2017
    Virun zwou Wochen huet den Fonds National de la Recherche op der US-amerikanescher Ambassade um Lampertsbierg en Ofkommes ënnerschriwwen. Domadder kënne Lëtzebuerger Wëssenschaftler un deem prestigiéise Fulbright-Programm deelhuelen an esou fir Fuerschungszwecker Visitten an Openthalter op US-Universitéiten erméiglecht kréien.

    1946, also just nom 2. Weltkrich, huet den amerikaneschen Senateur J. William Fulbright deen Austauschprogramm an d’Liewe geruff, mat der Begrënnung – ech zitéieren : „De Fulbright Programm zielt dorobber eraus, e wéineg méi Wëssen, e wéineg méi Vernonft an e wéineg méi Matgefill an d’Welt ze bréngen an doduerch d’Chancen z'erhéijen, dass d’Natiounen endlech léieren, a Fridden a Frëndschaft ze liewen.“

    Zënterhier hunn iwwert 315.000 Studenten, Fuerscher an Enseignanten, dorënner och etlech Nobelpräis- an Pulitzerpräis-Laureaten sou wéi och vill Lëtzebuerger un dësem Programm deelgeholl.

    Ech si mer sécher, dat all déi ënnert iech, déi no 1987 an Europa op enger Uni ënnerwee waren, vun engem ähnleche Programm héieren hunn, a villäicht och dovu profitéieren konnten – dem Erasmus-Programm. Ech mengen, datt meng Generatioun, wa mer u Saachen denken, déi prägend fir dat reaalt Erliewe vun Europa waren,  direkt un zwee Stéchwierder denken : Erasmus an den Interrail-Ticket.

    Loosst mech derzou nach méi e radikaalt Beispill ginn: Am Mee vun dësem Joer gouf a Jordanien en internationale Fuerschungszentrum mat deem schéinen Numm SESAME ageweit. Nieft der groussaarteger Fuerschung, déi an deem Zentrum wäert organiséiert ginn, ass dat Erstaunlecht dorunner d’Lëscht vun den Länner, déi dee Projet stemmen. Nieft Jordanien sinn derbäi: Zypern, Tierkei, Iran, Israel, d’Palestinensesch Autoritéit an Ägypten. Dir hutt richteg héieren: Länner, déi deelweis keng diplomatesch Relatioune matenaner ënnerhalen, deenen hir offiziell Diplomatie dacks doranner besteet, fir sech géigesäiteg ze denigréieren, oder géintenaner opzehetzen – déi Länner hu sech hei fir eng Kéier zesummegedoen, fir gemeinsam a mat der finanzieller Ënnerstëtzung vun der Europäescher Unioun e Fuerschungszentrum opzebauen.

    D’Wëssenschaft, mat senge Wäerter vun Transparenz an Universalitéit, kann deemno och do agesat ginn, wou d’Diplomatie eleng net weiderkënnt. An enger Welt, déi sech rasant verännert, wou déi global Erausfuerderungen tendenziell ëmmer méi ginn, huet déi International Wëssenschaftsgemeinschaft eng wichteg Roll ze spillen, fir Brécken ze bauen an esou dem Senateur Fulbright senger Visioun vu Fridden a Frëndschaft e Stéck méi no ze kommen. An och Lëtzebuerg, mat senger international breet opgestallter Fuerschung, kann hei an Zukunft eng wichteg Roll spillen!

    3 min
  • Carte Blanche: Emile Haag, 29/11/2017


    Hautesdaags gi mer vun deenen ënnerschiddlechsten Evenementer an Otem gehalen an eis Gefiller beweegt a belaascht: Terror, Krich, Gewalt a Naturkatastrophen, Korruptioun, Manipulatioun, Hypokrisie a Politik a Gesellschaft, Rücksichtslosegkeet, Haass an Intoleranz am Alldag, Suerg ëm d'Zukunft vum Land, sengem Innovatiounspotential an der Liewensqualitéit vu senge Bierger. Ausser dësen, gëtt et awer nach e puer aner Themen an eiser heiteger Welt, déi ganz besonnesch skandaléis sinn an deene mer ze oft mat Indifferenz a Passivitéit begéinen oder iwwert se ewechkucken.

    Aarmut an Honger a ville Géigenden, an Afrika, am Noen Osten, sinn esou uerg ginn, datt a nächster Zäit honnertdausenden jo vläicht Millioune Mënschen stierwe wäerten, besonnesch Kanner, wa net energesch an direkt intervenéiert a gehollef gëtt. Mir hunn d'Moyenen, dat ze maachen. Mir, déi am Iwwerfloss liewen, an dobäi nach ni genuch kréien.
    De Paräiser Klimaaccord sollt déi rasant Entwécklung vun der allgemenger Ëmweltverschmotzung ënnert d'Kontroll bréngen. Trotz Schmëlze vu Gletscher, katastrophale Waldbränn a grad esou schlëmmen Dréchenten, Orkanen an Iwwerschwemmungen, bréngt grad dat Land, dat selwer doru Matschold ass an dorënner ze leiden huet, et fäerdeg, sech aus sengen Engagementer eraus ze zéien, géint all Warnungen vu 15.000 Wëssenschaftler weltwäit, dorënner vill vun hiren eegenen.

    Wann dës irresponsabel Haltung net geschwënn revidéiert gëtt, wäert bis Enn vum Jorhonnert, de Mieresspigel ëm méi wéi zwee Meter klammen an domat vill Inselen wéi d'Fidschi a Länner wéi de Bangladesch ënner Waasser setzen, mat fatale Folgen fir d'Leit.

    Méi direkt bei eis kommen honnertdausenden vu Refugiéën aus Krichs- a Kriselänner, déi ënnert Liewesgefor sech an hir Familien rette wëllen, un d'europäesch Diere klappen. Da baue mir Stacheldrotgrenzen fir se dobaussen ze halen an hinne keng Chance ze ginn. Dobäi si gewëss osteuropäesch Länner − deenen hir eege Bierger am kale Krich selwer Refugié woren a frou woren vum Westen opgeholl ze ginn − besonnesch haart an häerzlos fir hire klengen Deel Asylanten opzehuelen. Hir europäesch Partizipatioun schéngt doranner ze bestoen fir säfteg Subsidien ze kasséieren, mä vun europäescher Solidaritéit a Matgefill fir Refugiéën: keng Spuer.

    Wou bleift do déi elementar Mënschlechkeet, d'"Humanitas": den essentiellen Heritage aus eiser europäescher Vergaangenheet?

    Wa mer haut ouni dës Kärprinzipien liewe wëllen, wéi déi al Réimer, mat "panem et circenses", da misste mer aus der Geschicht geléiert hunn, datt eis dat selwecht passéiert, wéi hinnen: den Out fir Europa!








    3 min
  • Apropos: Identitéit, 28/11/2017 12:50
    Op Netflix kann een den Documentaire "Jim & Andy" kucken. Dee weist, wat hannert de Kulisse bei den Dréiaarbechte vum Miloš Forman sengem Film "Man on the Moon" am Joer 1999 geschitt ass. Den Jim Carrey war mat Leif a Séil an d'Roll vum verstuerwene Komiker Andy Kaufman erageklommen. D'Verwandlung war esou perfekt, dass hien och an der Roll bliwwe war wéi d'Kamera aus war. Den Daniel Nepgen huet e puer Gedanken dozou.
    0 min
  • Carte Blanche, Robert Weber, 27/11/2017

    Schaffen 4.0 steet géint iwwer Industrie 4.0. Den Här Rifkin huet zu Lëtzebuerg eng Debatt lancéiert wéi mir sollen di véiert industriell Revolutioun - Industrie 4.0 - virbereeden.
    Dat as richteg a wichteg. Mir mussen eis Gedanken maachen iwwert dat wat moer op eis alleguer zoukënnt. Eis Autoen sollen ouni Chauffeur fueren, Haiser ginn aus 3-D-Druckeren gebaut, Boergeld gëtt iwwerflësseg, de Roboter operéiert de Mënsch, Clouds a riseg Datensammlungen beaflossen de Mënsch ëmmer méi  asw asw . D’Revolutioun vum Digitalen bestëmmt eist ganz Liewen.
    All dat werft vill Froen op, gëtt awer wéineg Äntwerten!
    Sécher as: D' Mënschheet erlieft net di éischt industriell Revolutioun.
    Awer wa mer och vill iwwert Industrie 4.0 schwätzen, esou schenkt mer méi wichteg iwwert Schaffen an Aarbecht 4.0 nozedenken. Hei beschränkt sech Diskussioun net op méi flexibel Aarbechtszäiten. Des Thematik as vill méi komplex! Mir wëllen all eng gutt, sécher a gesond Aarbecht. Mir wëllen e gerechte Loun fir eis Aarbecht. Mir wëllen di schwéier erkämpften aarbechtsrechtlech a sozial Standarden mat an di Aarbechtswelt 4.0 huelen. Awer wéi geléngt eis dat, wuelwessend, dass et Kräfte gëtt, déi dat verhënnere wëllen.
    Hei sinn sécherlech d‘ Gewerkschaften gefuerdert, awer och Salariéen all.
    Den, den elo mengt hien kéint alles eleng reegelen, den huet sech fir d’Liewen geiert.
    De Monitoring-Rapport Digital Wirtschaft 2014 weist op, dass d’Entwécklung schonn wéit virugeschratt as, och wann Digitaliséierung an deenen eenzelen Wirtschaftsbranchen nach ennerschittlech ausfëllt.  Am stäerksten digitaliséiert sinn Telekommunikatioun Verlagswiesen, Medien,Radio an Télé. En héijen Digitaliséierungsgrad kennen och IT-an Informatiounsgesellschaften, grad wéi Finanzservicer, awer och d’Produktiounen vun Datenveraarbechtungsapparaten, elektresch an optesch Produkter an d’Autosindustrie. Am Mëttelfeld leien Handel, Elektrotechnik an de Maschinnebau. Aner Branchen wäerten an deenen nächsten Joren verstäerkt derbäi kommen, wéi Verkéier a Logistik awer och d’Waasser- an d‘ Energieversuergung.
    Nei Aarbechtsplazen wäerten entstoen, anerer wäerten ewechfalen.
    Wat gëtt aus der Humaniséierung vun der Aarbecht?
    Wéi wéit gräift eist Aarbechtsrecht nach an der digitaliséierter Welt?
    En Aarbechtsliewen dauert an der Zukunft och nach ëmmer mindestens 40 Joer!
    Wéi gëtt eist Sozialrecht beaflosst?
    Wat gëtt aus der Matbestëmmung?
    Dat sinn nëmmen e puer Gedanken fir Aarbecht a Schaffen 4.0.
    Eent weess ech als Gewerkschaftler awer sécher : Bei der zukünfteger Gestaltung vun der Aarbecht bleiwen di sozialpartnerschaftlech Léisungen vun zentraler Bedeitung.
    De Kollektivvertrag an de Betriber ka villes fir e Betrib reegelen; Gesetzer a Reglementer mussen de leschten Wee sinn.
     
    De Conseil Economique et Social huet sech schonns an den Joren 2001, 2002 an 2003 vill Gedanken iwwert Digitaliséierung vun eiser Gesellschaft gemaach an iwwert „ Travail zéro“.
    D’Aarbecht wäert eis also net ausgoen!   

    4 min
  • Carte Blanche - Anne Goeres, 24/11/2017
    D'Zäit vergeet esou schnell... elo si mer schonn November, de Kleeschen ass op ville Platzen ze gesinn an an 3 Wochen ass Chrëschtvakanz mat all deem wat dozou gehéiert!
    Ech hunn des Zäit ganz gären, well de Wanter freeën ech mech op de Schnéi, de waarme Schocki an d'Féier am Kamäin, wann et owes däischter a kal gëtt. Esou gesäit de Wanter aus wann et engem gutt geet. An dëser, méi besënnlecher Zäit, denkt een awer och gären un déi, deenen et net esou gutt geet. A sief et nëmmen duerch déi sëllech Bréiwer déi een heem geschéckt kritt, fir lénks oder riets mol e Su ze spenden.
    Ech mengen dat mer schonn all, op d’mannst eng Kéier, en Euro gespent hunn : entweder e bëssi Mënz an eng Spuerbex déi an engem Buttek stoung, oder e Virement dee bei engem Flyer dobäi louch, oder och en Don fir Zum Beispill eng Doudesannonce, e Gebuertsdag, e Familljefest.
    Hutt der Iech jeemools d‘Fro gestallt wou déi Suen hikommen, wien déi duerno verwalt, wat domadder gemaach gëtt ? Vertrauen ass excellent, awer sech munchmol fir déi Organisatiounen z’interesséieren, wou ee Sue spent, ass och net schlecht.
    Wat sinn hier Missiounen, wéi vill Leit profitéiere vun de Servicer, wat huet d'Societéit vun hirem Asaz ? Wei prezis verwalten si hire Budget ?  All des Froe soll een sech emol stelle wann ee spent. Villäicht freeën sech jo och d'Organisatiounen, wann d'Donateuren sech fir hier Aarbecht am Alldag interesséieren.
    Déi lescht Studie iwwert Spenden zu Lëtzebuerg ass am Joer 2010 virgestallt ginn. Dat sinn elo scho méi ewéi 7 Joer hier. Et kéint ee bal mengen, dat  sech zanterhier kee weider fir des Informatiounen interesséiert huet. Schued an och e bëssi traureg.
    Awer all seriö Organisatioun publizéiert e Finanzbericht mat engem Aktivitéitsbericht. Doranner kann de Spender scho ganz vill Informatioune gewuer ginn, an entscheeden, op do seng Sue gutt investéiert sinn.
    An deem Sënn, soen ech jidderengem e grousse Merci, deen dëst Joer eng Spend gemaach huet oder nach mécht, an hoffen dat dir Iech e bëssi dofir interesséiert, wat mat Äre Sue geschitt.


    3 min

About RTL - Carte Blanche

From the publisher's feed

Meenungen aus der Zivilgesellschaft iwwert d'Aktualitéit

More shows like RTL - Carte Blanche

Déckkäpp by RTL Radio Lëtzebuerg

Déckkäpp

0 Listeners

Journal (Radio) by RTL Radio Lëtzebuerg

Journal (Radio)

1 Listeners

Automag by RTL Radio Lëtzebuerg

Automag

0 Listeners

Tanguy Pastureau maltraite l'info by France Inter

Tanguy Pastureau maltraite l'info

19 Listeners

RTL - Presseclub by RTL Radio Lëtzebuerg

RTL - Presseclub

0 Listeners

RTL - Carte Blanche by RTL Radio Lëtzebuerg

RTL - Carte Blanche

0 Listeners

L'œil de Philippe Caverivière by RTL

L'œil de Philippe Caverivière

55 Listeners

RTL - HitStory by RTL Radio Lëtzebuerg

RTL - HitStory

0 Listeners

Kloertext fir ze lauschteren by RTL Télé Lëtzebuerg

Kloertext fir ze lauschteren

0 Listeners

Podpurri - mir schwätze Kultur! by RTL Radio Lëtzebuerg

Podpurri - mir schwätze Kultur!

0 Listeners

RTL - Flunkernews by RTL.lu

RTL - Flunkernews

0 Listeners

RTL - Econews by RTL Radio Lëtzebuerg

RTL - Econews

0 Listeners

RTL - Sproochmates by RTL Radio Lëtzebuerg

RTL - Sproochmates

0 Listeners

RTL - Lecture vun heiheem by RTL Radio Lëtzebuerg

RTL - Lecture vun heiheem

0 Listeners

RTL - IGEL - Inclusioun ganz einfach liewen by RTL Radio Lëtzebuerg

RTL - IGEL - Inclusioun ganz einfach liewen

0 Listeners

Wocheréckbléck by RTL Radio Lëtzebuerg

Wocheréckbléck

0 Listeners

RTL - Nogehaakt by RTL Radio Lëtzebuerg

RTL - Nogehaakt

0 Listeners

L'oeil d'Alex Vizorek by RTL

L'oeil d'Alex Vizorek

13 Listeners

Ausgeschwat by RTL Tëlee Lëtzebuerg

Ausgeschwat

0 Listeners

Fro den Affekot by RTL Radio Lëtzebuerg

Fro den Affekot

0 Listeners

Nospillzäit by RTL Radio Lëtzebuerg

Nospillzäit

0 Listeners

RTL inteam by RTL Radio Lëtzebuerg

RTL inteam

0 Listeners