Samstöðin

Sunnudagurinn 8. október

Synir Egils: Pólitíkin, fréttirnar, söngur og fjölmiðlar

Bræðurnir Sigurjón Magnús og Gunnar Smári Egilssyni taka á móti gestum og ræða helstu fréttir og pólitík við Árna Múla Jónasson formann Transparency International á Íslandi, Þorbjörgu Sigríði Gunnlaugsdóttur þingmann Viðreisnar og Vilhjálm Birgisson, formann Starfsgreinasambandsins. Þeir bræður fara líka yfir daginn og veginn og Þorsteinn Einarsson, aka Steini í Hjálmum, kemur við sem trúbador og leggur lag til málanna. Í lokin koma blaðamennirnir Eyrún Magnúsdóttir, Sigríður Dögg Auðunsdóttir og Kolbeinn Tumi Daðason og ræða við þá bræður um fjölmiðla og blaðamennsku á tímum þegar nánast allir geta reynt að vera sinn eigin fjölmiðill.

Laugardagurinn 7. október

Helgi-spjall: Gísli Pálsson

Í Helgi-spjalli við Rauða borðið segir Gísli Pálsson mannfræðingur frá uppvexti sínum í Eyjum, uppreisn æskuáranna, rannsóknum sínum á mannfélaginu og ábyrgð fræðafólks í samfélaginu.

Föstudagurinn 6. október

Vikuskammtur: Vika 40

Í Vikuskammti við Rauða borðið sitja í dag þau Erling Ingvason tannlæknir, Hallfríður Þórarinsdóttir mannfræðingur, Hlín Agnarsdóttir leikstjóri og Sverrir Norland rithöfundur og ræða fréttir vikunnar sem einkenndist af skætingi, deilum, sorg og sárindum.

Borgarfulltrúar sósíalista ræða það sem bar hæst í nýliðinnu viku. Þar á meðal er ný skýrsla um athugun á vöggustofum en þær tóku til starfa 1949. Einnig ræða þau nýtt hverfi sem á að rísa í Keldum og setja það í samhengi við stöðuna á húsnæðismarkaði. Tillaga sósíalista í borgarstjórn verður einnig rædd ásamt öðrum málum sem þar fóru fram.

Þátturinn Miðjan á miðvikudegi er samstarfsverkefni miðjan.is og Samstöðvarinnar. Sigurjón M. Egilsson er umsjónarmaður þáttanna.

Í þessum fyrsta þætti er Þorsteinn Pálsson gestur Sigurjóns. Þeir tala um íslensku krónuna, evruna og aðra gjaldmiðla. Í þættinum kemur fram að Bjarni Benediktsson vissi betur þegar hann talaði um Ísland sem lágvaxtaland fyrir síðustu kosningar. Beitti hann blekkingum?

Miðvikudagurinn 4. október

Mótmæli, hagráð verkalýðsins, hægrið og leikskólarnir

Flóttafólk frá Venesúela tók sér þögla mótmælastöðu framan við Hallgrímskirkju í morgun. María og Oddný Eir fóru á staðinn og ræddu við fólkið sem stjórnvöld vilja vísa úr landi. Við fáum hagráð alþýðunnar til að spá í spilin á vaxtaákvörðunardegi: Sigríður Ingibjörg Ingadóttir hagfræðing BSRB, Vilhjálmur Hilmarsson hagfræðing BHM og Róbert Farestveit hagfræðing Alþýðusambandsins. Eiríkur Bergmann prófessor fjallar um uppgang ysta hægrisins í Evrópu og reynir að greina hvað veldur. Er Evrópa að verða meira normal en áratugina á undan, voru eftirstríðsárin undantekning í sögunni en ekki normið. Í lokin ræðum við um leikskólamálin við Huldu Ásgeirsdóttur og Halldóru Guðmundsdóttur skólastjóra um leikskólalífið, ástríðuna og áskoranirnar.

Þriðjudagurinn 3. október

Spilling, efnahagsstefna, Venesúela og Eimreiðarklíkan

Atli Þór Fanndal, framkvæmdastjóri Transparency International á Íslandi, kemur að Rauða borðinu og segir okkur frá fundi félagsins um samráð skipafélaganna, sem Samstöðin mun senda út. Stefán Ólafsson prófessor og sérfræðingur hjá Eflingu, kemur og reynir að ráða í efnahagsstefnu stjórnvalda. Hverjum þjóna stjórnvöld? Hinum fáu ríku? Eða fjöldanum. Við höldum áfram umfjöllun um flóttafólkið frá Venesúela. Gunnvör Rósa Eyvindardóttir stjórnmálafræðingur segir okkur hvers vegna það er kreppa í Venesúela, kreppan sem fólkið er að flýja. Og í lokin kemur Þorvaldur Logason heimspekingur og félagsfræðingur og segir okkur frá Eimreiðarhópnum sem náði völdum í Sjálfstæðisflokksins og í raun völdum yfir Íslandi, breytti landi eftir kenningum nýfrjálshyggjunnar. Aldrei hefur jafn fámennur hópur haft jafn mikil áhrif. Og vond, myndi einhver vilja bæta við.

Venesúela, Dögun, gervigreind og sósíalismi

Við ræðum risastóra mannúðarkrísu við prest Fíladelfíu, Helga Guðnason. Hvað gerist þegar ríkisvaldið ætlar að senda fleiri en fimmtán hundruð flóttamenn frá Venesúela til síns heima? Fólk sem hélt að það væri sérstaklega boðið hingað af íslenskum stjórnvöldum. Við rifjum upp stjórnmálaaflið Dögun með Dögunarfólkinu Helgu Þórðardóttur, Benedikt Sigurðarsyni, Gísla Tryggvasyni og Andreu Ólafsdóttur. Fyrir hvað stóð Dögun? Hafði hún áhrif og þá hver? Margrét Tryggvadóttir formaður Rithöfundasambands Íslands segir okkur frá ógn sem stafar að höfundum frá gervigreind og Sigurður Pétursson sagnfræðingur ræðir við okkur um sósíalisma, út frá erindi Jeremy Corbyn.

Bræðurnir Sigurjón Magnús og Gunnar Smári Egilssyni taka á móti gestum og ræða helstu fréttir og pólitík við Láru Ómarsdóttur blaðakonu, Gísla Martein Baldursson fjölmiðlamann og Helgu Jónsdóttur bæjarfulltrúa í Kópavogi. Benedikt Erlingsson leikstjóri stígur á stokk og flytur eldmessu um skógrækt. Þeir bræður fara yfir daginn og veginn áður en Sigríður Margrét Oddsdóttir framkvæmdastjóri Samtaka atvinnulífsins og Finnbjörn A Hermannsson formaður Alþýðusambandsins koma og ræða stöðuna í aðdraganda kjaraviðræðna.