Samstöðin

Í Helgi-spjalli við Rauða borðið segir Haraldur Þorleifsson frá sjálfum sér og þeim glímum sem hann hefur háð, átökunum innra með honum og áföllunum sem hann hefur orðið fyrir. Og auðvitað sigrunum líka.

Föstudagurinn 8. september

Vikuskammtur: Vika 36

Í Vikuskammti við Rauða borðið sitja í dag þau Atli Þór Fanndal framkvæmdastjóri Transparency International á Íslandi, Axel Jón Ellenarson kynningarfulltrúi Sameykis, Guðrún Margrét Guðmundsdóttir starfsmaður Alþýðusambandsins og Oddný Eir Ævarsdóttir rithöfundur og ræða fréttir vikunnar sem markaðist af samráði, spillingu, mótmælum og því að bráðum kemur þing saman.

Við ræðum mál málanna í kvöld, skort á samkeppni á Íslandi, samráð og samsæri, í tilefni af úttekt Samkeppnisstofnunar á Samskipum og Eimskip. Fyrst kemur Ragnar Þór Ingólfsson formaður VR sem lengi hefur bent á spillingu í íslensku samfélagi og ekki síst þá spillingu sem lífeyrissjóðirnir styðja innan fyrirtækjanna. Síðan kemur Gylfi Magnússon prófessor og ræðir fákeppnismarkaði, skaðann af þeim og hvaða tæki stjórnvöld hafi til að koma í veg fyrir samráð og samkeppnisbresti.

Sigurjón Magnús Egilsson kemur að Rauða borðinu og ræðir við bróður sinn, Gunnar Smára, um hvort þeir eigi að byrja með þátt á Samstöðinni á sunnudaginn. Og hvort sá þáttur eigi að kallast Synir Egils. Þegar hann fer koma þingkonurnar Diljá Mist Einarsdóttir og Þórhildur Sunna Ævarsdóttir og ræða um einstaklingsfrelsi og mikilvægi þessi í pólitíkinni.

Við ræðum um þrjú deilumál við Rauða borðið í kvöld. Fyrstur kemur Benedikt Erlingsson leikstjóri, sem eitt sinn hlekkjaði sig við hvalabát, og ræðir við okkur um hvalveiðar og hvalveiðibann. Síðan heyrum við í Helen Ólafsdóttur, öryggisfulltrúa hjá Sameinuðu þjóðunum, sem gagnrýnt hefur fyrirhugaðar flóttamannabúðir, sem stjórnvöld vilja kalla búsetuúrræði með takmörkunum. Og loks kemur Haukur Logi Karlsson lektor á Bifröst og doktor í samkeppnisrétti, og segir okkur frá úrræðum almannavaldsins til að koma í veg fyrir verðsamráð og fákeppni.

Sektir sem Samkeppniseftirlitið lagði á Samskip hafa dregið fram skaðsemi fákeppni á Íslandi. Við fáum þá Breka Karlsson, formann Neytendasamtakanna, Stefán Sveinbjörnsson framkvæmdastjóri VR og Ásgeir Brynjar Torfason sérfræðingur í fjármálum til að ræða skort á samkeppni á Íslandi, okur og fákeppni. Og hvað er til ráða? Kristrún Frostadóttir kemur svo að Rauða borðinu og ræðir stjórnmálaástandið, ríkisstjórnina, Samfylkinguna og hvað sá flokkur stendur fyrir.

Í Helgi-spjalli við Rauða borðið segir Hlín Agnarsdóttir frá sjálfri sér, fjölskyldu, uppvexti, kynslóð og baráttu, en líka frá körlum sem hún hefur mikinn áhuga á.

Í Vikuskammti við Rauða borðið sitja í dag þau Margrét Erla Maack burlesque-drottning, Ester Bíbí Ásgeirsdóttir bassaleikari, Rósa María Hjörvar bókmenntafræðingur og Þór Saari hagfræðingur og leiðsögumaður og ræða fréttir vikunnar sem markaðist af hvölum og pólitískum hræringum, gróða hinna ríku og lífskjarakreppu hinna fátækari.

Hallfríður Þórarinsdóttir kemur að Rauða borðinu og ræðir um erlent verkafólk á Íslandi, hvernig það er misnotað og haldið niðri. Eiríkur Rögnvaldsson lítur við og ræðir um íslenskuna, hvernig hún veikist og velkist í breyttum heimi. Í lokin verður ný liður, Synir Egils. Bræðurnir og blaðamennirnir Sigurjón Magnús og Gunnar Smári Egilssynir taka stöðuna á pólitíkinni.

Ásgeir Brynjar Torfason kemur til okkar og reynir að ráða í hvaða efnahagsstefnu er verið að reka á Íslandi. Ingvi Kristinn Skjaldarson kapteinn í Hjálpræðishernum kemur og segir frá flóttafólkinu sem ríkið henti út á götu og reynir að ráða í þá flóttamannastefnu sem verið er að reka hér. Og Arnar Þór Jónsson segir okkur frá flokksráðsfundi Sjálfstæðisflokksins og reynir að ráða í um hvað hin svokallaða sjálfstæðisstefna snýst. Og hvort honum sé vært í flokknum.