Víðsjá

Í Víðsjá dagsins verður meðal annars rætt við Guðmund Thoroddsen myndlistarmann sem sýnir ný málverk sín í Hverfisgalleríi þessa dagana á sýningu sem hann kallar Hundaholt, hundahæðir. Hlustendur heyra einnig af verkefninu Þjóðleik sem Þjóðleikhúsið stendur fyrir en Björn Ingi Hilmarsson segir frá nýjum áherslum í því starfi. Einnig er líklegt að hinn síbreytilegi Barbapabbi og hið eðla hljóðfæri fagottið komi við sögu í Víðsjá dagsins.

Umsjón: Guðni Tómasson og Halla Þórlaug Óskarsdóttir.

Í Víðsjá í dag verður m.a. litið við á sýningunni „Saga Íslands: 1. Hluti - Leir og Postulín“ sem opnuð var sýningarrýminu Open að Grandagarði um síðustu helgi, en undanfarin 40 ár hefur fyrirtækið Leir og Postulín prentað lógó, ljósmyndir og slagorð á bolla fyrir fyrirtæki, bæjarfélög, félagasamtök og einstaklinga. Nú lánar fyrirtækið ríflega 600 bolla á sýninguna, sem saman skrá eins konar tímalínu óritskoðaðrar sögu Íslands síðustu 40 ára. Sýningin samanstendur af þessum 600 bollum og auk þess hefur Open boðið 20 listamönnum, samtökum, hönnuðum, sviðslistamönnum, rithöfundum og sagnfræðingum til að bæta nýjum bollum við safnið. Víðsjá kannar málið.

Sigurður Halldórsson sellóleikari verður gestur þáttarins en í Skálholti fara fram á laugardag minningartónleikar um hollenska fiðluleikarann Jaap Schröder sem úr árabil lék á tónlistarhátíðinni í Skálholti og hafði mikil áhrif á íslenskt tónlistarfólk sem aðhyllist upprunamiðaðan flutning á tónlist fyrri alda.

Björn Þór Vilhjálmsson fjallar um sagnfræðiritið og bókmenntalega stórsmellinn Sapiens - Mannkynssaga í stuttu máli eftir Youval Noah Harari, en bókin kom út í íslenskri þýðingu í haust.

Umsjón: Halla Þórlaug Óskarsdóttir og Guðni Tómasson

Í Víðsjá í dag lítum við á tvær myndlistarsýningar, Búkar í Gallerí Port og Ekki brotlent enn í Hafnarhúsinu. Eins heyrum við af bókinni The Big Goodbye: Chinatown and the Last Years of Hollywood og lítum við á Ljósmyndasafni Íslands þar sem var verið að hengja upp sýningu Christopher Lund sem ber titilinn Vitni.

Verðlaunahátíð barnanna kemur einnig við sögu, en hún fer fram um helgina.

Umsjón Halla Þórlaug Óskarsdóttir

Búlgarski listamaðurinn Christo Vladimirov Javacheff lést á sunnudaginn, en hann setti mark sitt á listasöguna, ásamt eiginkonu sinni og samverkakonu, Jeanne-Claude. Við sláum á þráðinn til Parísar og ræðum við Laufeyju Helgadóttur, listfræðing, um Christo og list í formi innpökkunar.

Rætt verður við Birtu Guðjónsdóttur sýningarstjóra sýningarinnar Yfir Gullinbrú sem er afmælissýning Myndhöggvarafélagsins í Grafarvogi. Hanna Styrmisdóttir verður tekin tali um nýtt meistaranám í sýningargerð sem Listaháskóli Íslands ætlar að bjóða upp á á komandi vetri.

Umsjónarmenn: Guðni Tómasson og Halla Þórlaug Óskarsdóttir

Í Víðsjá í dag verður meðal annars farið í heimsókn til Helga Þorgils Friðjónssonar myndlistarmanns en hann er að setja upp sýningu í Ganginum, heimagalleríi sínu sem á sér nú orðið 40 ára sögu. Á afmælissýningu sem hann opnar á morgun eiga verk fjölmargir þeirra erlendu listamanna sem hafa sýnt hjá Helga í gegnum tíðina. Rithöfundarnir Andri Snær Magnason og Sigurbjörg Þrastardóttir koma í heimsókn og ræða um sköpunarverk sín á tímum Kórónaveirunnar. Farið verður í stutta heimsókn til Parísar, að gefnu tilefni. Og Hermann Stefánsson rithöfundur hefur flutt pistla í Víðsjá á tímum kófs, hann lítur í dag um öxl og skoðar nýliðinn tíma.

Umsjón: Guðni Tómasson og Eiríkur Guðmundsson

Í Víðsjá í dag verður meðal annars rætt við Benedikt Hjartarson bókmenntafræðing sem þýtt hefur skáldsöguna Minnisblöð Malte Laurids Brigge eftir Rainer Maria Rilke. Bókin kom fyrst út árið 1910 og var eina skáldsaga Rilkes, sem var eitt af fremstu ljóðskáldum Evrópu á 20. öld. Benedikt segir frá þessari merku bók og þessu merka skáldi í Víðsjá í dag en þýðing hans kemur út í Lærdómsritaröð Hins íslenska bókmenntafélags í næsta mánuði. Einnig verður slegið á þráðinn til Seyðisfjarðar en í Skaftfelli er Bjargey Ólafsdóttir að sýna verk sín þessa dagana. Ljósmyndasýningu sína kallar Bjargey Tíru en hún fer í framhaldinu einnig á Neskaupsstað. Björn Þór Vilhjálmsson fjallar um My Dark Vanessa eftir Kate Elizabeth Russell sem út kom í síðasta mánuði og hefur þegar vakið mikla athygli fyrir umfjöllun sína um kynferðisofbeldi og margflókna stöðu fórnarlambsins. Og Maístjarnan, ljóðabókaverðlaun Rithöfundasambands Íslands og Landsbókasafn Íslands - Háskólabókasafns, verða afhent í dag, hlustendur Víðsjár heyra í nýjum verðlaunahafa í þættinum í dag.

Umsjón: Guðni Tómasson og Eiríkur Guðmundsson.

Í Víðsjá í dag verður meðal annars rætt við Viðar Hreinsson bókmenntafræðing sem tók á dögunum við styrk úr sjóði sem ætlað er að styðja þverfaglegar rannsóknir á ritmenningu íslenskra miðalda. Styrkinn fær Viðar til að vinna að verkefni sem nefnist Náttúrur og fornar frásagnir: Um náttúru- og umhverfissýn íslenskra miðaldasagna, en þar hyggst Viðar fjalla um umhverfi og náttúrusýn í íslenskri sagnalist frá landnámi til siðaskipta, beita nýjum straumum umhverfishugvísinda á fornar íslenskar bókmenntir í því skyni að styrkja skilning á náttúruskyni, náttúrusýn og náttúrunytjum í sögulegu samhengi. Rætt verður við Viðar í þætti dagsins. Einnig verður hugað að nýútkominni bók sem heitir Ljáðu mér vængi og hefur að geyma minningarbrot úr lífi Páls Pampichlers Pálssonar, trompetleikara, hljómsveitarstjóra og tónskálds. Rætt verður við Sigurð Yngva Snorrason einn af höfundum bókarinnar um Pál og ævi og störf hans í íslensku tónlistarlífi. Og bók vikunnar á Rás eitt að þessu sinni er Það sem ég tala um þegar ég tala um hlaup eftir japanska rithöfundinn Haruki Murakami. Bók sem er í senn ferðabók og minningabók og hverfist um fimm mánaða æfingaplan fyrir maraþonhlaupið í New York. Hlustendur heyra í þýðanda bókarinnar, Kristjáni Hrafni Guðmundssyni, í Víðsjá í dag.

Umsjón: Guðni Tómasson og Eiríkur Guðmundsson

Í Víðsjá í dag verður þess meðal annars minnst að á mánudag voru fjörutíu ár síðan breski tónlistarmaðurinn Ian Curtis andaðist. Curtis var forsöngvari í hljómsveitinni Joy Division, sem sendi aðeins frá sér tvær hljóðversplötur á sínum ferli, en hafði eigi að síður gríðarleg áhrif. Seinni plata sveitarinnar, Closer, kom út sléttum tveimur mánuðum eftir andlát Curtis og er af mörgum talin ein merkasta platan sem gerð var á mörkum pönks og nýbylgju. Gestur Víðsjár í dag verður Hilmar Örn Hilmarsson tónlistarmaður. Hermann Stefánsson rithöfundur fjallar um ritið Tónlist liðinna alda eftir Árna Heimi Ingólfsson og finnur frekari upplýsingar um þjóðlagið Vera mátt góður sem Hermann fjallað um í þættinum fyrir fáeinum vikum, en Egill Ólafsson og Sólrún Edda Benedikz Hermannsdóttir flytja tveggja radda útgáfu lagsins í nýrri upptöku. Borðspilið Matador kemur við sögu í þættinum og Þórdís Gísladóttir rithöfundur fjallar um bókina „Ord, bild, liv“ sem fjallar um ævi og verk múmínálfahöfundsrins Tove Jansson.

Umsjón: Guðni Tómasson og Eiríkur Guðmundsson