Norðrið verður fyrirferðarmikið í þætti dagsins, við ætlum að horfa til nokkurra listahátíða sem allar eru haldnar í smábæjum á Norðurlöndunum

Það eru UNM - Ung Nordisk Musik - sem verður haldið í N-Svíþjóð, Piteå, en þar verða sjö íslensk verk flutt í ágúst. Katrín Ólafsdóttir, tónskáld og Ragnar Árni Ólafsson, tónlistarmaður og skipuleggjandi TVINNU, tónleika þar sem íslensku tónskáldin eru kynnt, heimsækja þáttinn.

Við heyrum einnig af Festspillene í Nord-Norge, en Ragnheiður Skúladóttir, annar stofnandi alþjóðlegu sviðslistahátíðarinnar Lókal, mun taka við hátíðinni sem er gríðarstór, á næsta ári, en hún er stödd á hátíðinni núna.

Unglingurinn í Reykjavík kallast svo tilraunaverkefni á vegum Reykjavík Dance Festival, þar sem ungu fólki er veitt umboð til að móta listræna sýn hátíðarinnar, meðal annars með því að stýra eigin hátíðum á vegum Reykjavík Dance Festival. Tvær ungar konur, þær Erla Sverrisdóttir og Marta Ákadóttir, fóru til Hangö, smábæjar í S-Finnlandi, í undirbúningsferð fyrir Unglinginn í Reykjavík. Við fáum að heyra samtal þeirra um upplifun þeirra.

Tónlist:

Øystein Drøsshaug - Kjære Harstad

Kælan mikla - Kalt

Egon "Ehom" Lundberg - Byxtorget  

Billy Eilish - Bad Guy

Georg Malmstén - Hangö valsen

UMSJÓN: Halla Þórlaug Óskarsdóttir

Hvernig getum við breytt heiminum - og hvað þýðir það í raun og veru?

Í ár eru 100 ár liðin frá því Barn náttúrunnar, fyrsta útgefna skáldsaga Halldórs Laxness, kom út. Við ræðum við Hauk Ingvarsson, bókmenntafræðing um þetta verk og þann menningarheim sem hún spratt upp úr. Við heyrum einnig brot úr bréfi sem skáldið skrifaði til fyrri konu sinnar, Ingu Einarsdóttur, árið 1927, sem og upptöku úr safni sjónvarpsins þar sem hann ræðir um bókmenntaumfjöllun í dagblöðunum.

Guðni Tómasson fjallar um kínversk-bandarísk tónlistarungmenni sem vöktu fyrst athygli í Bandaríkjunum fyrir tæplega 60 árum og hvernig þau hafa síðan reynt að bæta heiminn, en það eru þau Yo-Yo og Yeou-Cheng Ma.  

Júlía Margrét Einarsdóttir flytur pistil um heimspeki Múmínálfanna og eigin bölsýni.

Tónlist:

Sept Papillon eftir finnska tónskáldið Kaija Saariaho í flutningi Anssi Karttunen.

Umsjón: Halla Þórlaug Óskarsdóttir

Í dag er kvenréttindadagurinn, hátíðisdagur þar sem við minnumst þess að fyrir 104 árum fengu konur á Íslandi, 40 ára og eldri, kosningarétt og kjörgengi til Alþingis. Stórt skref í kvenréttindabaráttunni stigið þann dag.

Karlar fá því ekki mikið pláss í þætti dagsins, auðvitað verður ekki alveg hægt að sniðganga þá, það er erfitt í okkar heimi, til dæmis verður flutt tónverk eftir karlmann í lok þáttarins, ég vona að það fari ekki fyrir brjóstið á neinum.

En við heyrum af ýmsum konum, meðal annars einni sem aldrei fær að hvílast heldur tekur á móti sálum á leið sinni í ljósið. Guðrún Rannveig Stefánsdóttir kemur og segir frá ljóðabálki sínum sem hún orti um Guðrúnu Oddsdóttur, vökukonunni í Hólavallakirkjugarði, sem kemur út í dag, með formála og eftirmála eftir Sólveigu Ólafsdóttur.

Einnig heyrum við af Elísabetu Jónsdóttur frá Grenjaðarstað í Aðaldal sem var ein af þeim fyrstu til að fá lög sín birt á prenti. Fanney Kristjáns Snjólaugardóttir, tónlistarkona, segir Gígju Hólmgeirsdóttur aðeins af hennar sögu, en í dag - í tilefni kvenréttindadagsins - verður hátíðardagskrá henni til heiðurs í Hofi á Akureyri.

Í dag er kvenréttindadagurinn þar sem við minnumst áfanga í sögu kvenréttindabaráttunnar, en í gær var stigið stórt skref í annarri baráttu, þegar lagafrumvarp um kynrænt sjálfræði var samþykkt á Alþingi. Þorbjörg Þorvaldsdóttir, formaður Samtakanna 78, lítur við til að ræða þetta nýja frumvarp og þýðingu þess.

Tónlist:

Farfuglarnir eftir Elísabetu Jónsdóttur

Brúður söngvarans eftir Elísabetu Jónsdóttur

Katia og Marielle Labeque spila síðasta þáttinn úr verkinu Four Movements for Two Pianos eftir Philip Glass

Inga Björk Bjarnadóttir rýnir í sýninguna Og hvað svo? sem var opnuð fyrir helgi í Nýlistasafninu.

Reykjavík Midsummer Music hátíðin hefst í Hörpu á fimmtudaginn og við ætlum að hita örlítið upp fyrir hana hér í Víðsjá og hlýða á tónlist í flutningi nokkurra listamannanna sem munu koma þar fram í ár. Rússneski fiðluleikarinn Ilya Gringolts ríður á vaðið, hann spilar hér lokaþáttinn úr Divertimento eftir Igor Stravinsky - Peter Laul leikur á píanó.

Við heyrum einnig af af viðburðum sem fara fram á föstudag og laugardag undir heitinu Letters to Iceland þar sem þrjú virt skáld frá Bretlandseyjum heimsækja Ísland til að segja frá og lesa úr verkum sínum. Ástráður Eysteinsson, prófessor í almennri bókmenntafræði við Háskóla Íslands, og rithöfundurinn Sjón heimsækja þáttinn, en þeir skipuleggja viðburðina.

Kristinn Árnason er einnig gestur þáttarins, en hann gaf nýverið út ljóðabókina Regntímabilið, undir formerkjum eigin útgáfu - Páskaeyjunnar. Hann segir aðeins frá hugmyndum sínum um sjálfsútgáfu bóka, praktískum atriðum og ferðalaginu sem varð að ljóðabók.

Lokalag: Skammlausa gamla konan í flutningi Önnu Pálínu Árnadóttur, af disknum Guð og gamlar konur frá árinu 2002.

Kristján Hrafn Guðmundsson segir frá óútkomnu smásagnasafni sínu Afkvæni, sem færði honum Nýræktarstyrk Miðstöðvar íslenskra bókmennta fyrir viku síðan.

Við heyrum brot úr viðtali Jórunnar Sigurðardóttur við Soffíu Auði Birgisdóttur um bókina Ástkær eftir Toni Morrison, sem er bók vikunnar.

Við röltum um sýninguna ÚTHVERFI í Breiðholtinu, ásamt Aðalheiði Valgeirsdóttur og Aldísi Arnardóttur, sýningarstjórum hennar, en hún er hluti af sýningaröðinni HJÓLIÐ sem Myndhöggvarafélagið stendur fyrir, í aðdraganda hálfrar aldarafmæli félagsins 2022. Þetta eru sýningar í opinberum rýmum þar sem verk þræða sig eftir hjóla- og göngustígum borgarinnar.

Tónlist:

Í koti karls - Tómas R. Einarsson og Ómar Guðjónsson

Klockorna ringer in dig ändå - Kristian Anttila

Umsjón: Halla Þórlaug Óskarsdóttir

Grímuverðlaunin verða veitt í kvöld og af því tilefni heimsækja leikhúsgagnrýnendur Víðsjár þáttinn og velta vöngum, þau María Kristjánsdóttir og Þorvaldur Sigurbjörn Helgason.

Benedikt Kristjánsson tenór söngvari kemur í heimsókn og ræðir nýútkomna plötu sína, Drang in die Ferne, þar sem hann blandar saman íslenskum þjóðlögum og ljóðasöng Franz Schubert

Margrét Tryggvadóttir, rithöfundur og bókmenntafræðingur, heimsækir þáttinn og ræðir styrkjaumhverfi og bókaútgáfu, en nýlega var í fyrsta sinn veittur sérstakur styrkur til barnabókaútgáfu sem nefnist Auður

Friðrik Friðriksson framkvæmdastjóri Sjálfstæðu leikhúsanna og Kara Hergils, stjórnarmeðlimur, heimsækja þáttinn og segja frá fundi sem þau sóttu í Bretlandi, þar sem rætt var um fjölbreytileika og inngildingu í sviðslistaheiminum

Og við veltum fyrir okkur þessu orði, inngilding, sem er hin íslenska þýðing á enska orðinu inclusion sem vafist hefur fyrir mörgum í samræðum um jafnrétti.

Við heyrum brot úr þættinum Vaxtarbroddur á vergangi frá árinu 1985 þar sem Margrét Rún Guðmundsdóttir ræðir við Þórhildi Þorleifsdóttur um mikilvægi frjálsra leikhópa.

Sigurður Arent flytur pistil um uppistand sem hann sótti í Tjarnarbíói á dögunum, með Lóu Björk Björnsdóttur og Rebeccu Scott Lord.

Umsjón: Halla Þórlaug Óskarsdóttir

Sigrún Harðardóttir, fiðluleikari, heimsækir þáttinn og segir frá tónverkum sem fjalla um hafið og ræðir rómantíkina sem tengist hafinu og hvernig hún getur verið flókin fyrir nútímafólk

Gígja Hólmgeirsdóttir flytur okkur fregnir af lettneskri samtímasýningu frá Listasafninu á Akureyri.

Guðni Tómasson lítur við á æfingu hjá Sinfóníuhljómsveit Íslands og ræðir þar við hljómsveitarstjórann Edo de Vaart og píanistann Richard Goode.

Og við heimsækjum Berg Thomas Anderson í Harbinger þar sem hann leggur lokahönd á sýningu sína, The one and only body of The Hum and Lego Flamb.

Finnbogi Pétursson segir frá sýningu sinni Yfir og út sem stendur yfir í Hallgrímskirkju og Ásmundarsal

Justyna Wilczynska heimsækir þáttinn og segir frá því hvernig óbilandi áhugi á íslenskri tónlist fékk hana til að flytjast búferlum frá Póllandi til Íslands

Júlía Margrét Einarsdóttir veltir fyrir sér tveimur víddum lífsins - draumheimum og raunheimum.

Tónlist:

Ottoman - Burn the Witch

Bláskjár - Silkirein

Árstíðir - Passion

Umsjón: Halla Þórlaug Óskarsdóttir

Í Víðsjá í dag verður rætt við Ásu Richardsdóttur, framkvæmdastjóra alþjóðlegu sviðslistasamtakanna IETM um samtökin, pólitík og áhrifamátt sviðslistanna.

Ægir Þór Jänke, heimspekingur og skáld, heimsækir þáttinn og segir frá tímaritinu Skandala, nýju bókmenntatímariti sem beinir sjónum að skúffuskáldum og hráum verkum.

Flutt verður viðtal frá árinu 2016, við Ófeig Sigurðsson, þýðanda Verndargrips eftir Roberto Bolaño, sem er bók vikunnar að þessu sinni.

Og við heimsækjum Hafnarborg og kíkjum á sýninguna Tímahvörf, sem var opnuð síðustu helgi. Rætt verður við Ágústu Kristófersdóttur, safnstjóra, um sýninguna, en þar birtist áhorfandanum sýn átta samtímaljósmyndara á Hafnarfjörð.

Tónlist:

Patti Smith - Ghost Dance

Patrick Watson - Weight of the World

Umsjón: Halla Þórlaug Óskarsdóttir