Víðsjá

Víðsjá heimsækir í dag i8 gallerí og ræðir við Margréti Blöndal myndlistarkonu um sýningu hennar Loftleik sem að opnuð verður þar í galleríinu síðdegis. Einnig verður litið inn í Tjarnarbíó og rætt við Friðrik Friðriksson, framkvæmdastjóra og Sindra Þór Sigríðarson, markaðsstjóra, um leikárið framundan og skapandi vinnu á undarlegum tímum.

Ari Ólafsson, ungtenór, heldur sína fyrstu klassísku tónleika á Íslandi í Salnum Kópavogi á sunnudaginn. Ari er að ljúka námi við The Royal Academy of Music í London og hefur verið ráðinn tímabundið hjá óperunni í Gautaborg á næsta ári. Ari verður gestur Víðsjár í dag. Og Gauti Kristmannsson flytur pistil um svartagall að hausti.

Umsjón Guðni Tómasson og Halla Harðardóttir.

Í Víðsjá dagsins verður rætt við Tónskáldið Friðrik Margrétar-Guðmundsson og leikstjórann og textahöfundurinn Adolf Smára Unnarsson, en þeir frumsýna samtímaóperuna Ekkert er sorglegra en manneskjan í Tjarnarbíó á sunnudag.

Einnig verður litið inn á yfirlitssýningu á verkum Þorvaldar Þorsteinssonar sem opnaði nýverið á Listasafninu á Akureyri, en Þorvaldur var afkastamikill listamaður og kennari sem nýtti sér flesta miðla í listsköpun.

Einnig verður fjallað um lengsta íslenska ástarbréfið sem vitað er um. Bréfið, sem varðveitt er að Kvennasögusafninu á Landsbókasafni Íslands, er 4 metrar að lengd og var skrifað af ungum Íslendingi í Kaupmannahöfn fyrir 120 árum síðan.

Umsjón: Guðni Tómasson og Halla Harðardóttir.

Í Víðsjá í dag verður haldið í Hafnarborg þar sem rætt verður við tónskáldin Þráinn Hjálmarsson og Davíð Brynjar Franzson um sýninguna Borgarhljóðvist í formi ensks listigarðs. Hugað verður að sviðslistaverkinu Kartölfur sem sem sviðslistahópurinn CGFC færir nú aftur á svið í Borgarleikhúsinu en verkið rannsakar þætti í sögu kartöfluræktunar á Íslandi og er hluti af verkefninu Umbúðalaust sem Borgarleikhúsið stendur fyrir. Jafnframt verður hugað að bók vikunnar sem að þessu sinni er Sumarbókin eftir Tove Jansson.

Umsjón: Guðni Tómasson og Halla Harðardóttir.

Í Víðsjá í dag verður rætt við Lindu Vilhjálmsdóttur ljóðskáld sem sendir nú frá sér nýja ljóðabók sem hún kallar Kyrralífsmyndir og er ort undir sterkum áhrifum af nýliðnum vetri. Farið verður í heimsókn á Safnasafnið á Svalbarðseyri við Eyjafjörð en í ár stendur safnið á tímamótum. Safnið var stofnað árið 1995 af Níelsi Hafstein og Magnhildi Sigurðardóttur og fagnar því 25 ára afmæli á þessu ári. Í þættinum verður rætt við Níels Hafstein. Páll Haukur Björnsson, stjórnarmeðlimur Myndstefs, kemur einnig í heimsókn í Víðsjá og ræðir um réttarstöðu myndlistarmanns gagnvart verki sínu eftir að það hefur verið selt.

Umsjón: Halla Þórlaug Óskarsdóttir og Guðni Tómasson

Í Víðsjá í dag verður meðal annars hugað að sýningunni Tíðaranda í Listasafni Árnesinga í Hveragerði og rætt við Skúla Gunnlaugsson listaverkasafnara sem á verkin á sýningunni. Tónskáldið Guðmundur Steinn Gunnarsson segir frá nýrri útgáfu sinni á verkinu Sinfonia þar sem tónlistarhópurinn Fengjastrútur leikur samnefnt verk Guðmundar. Ármann Jakobsson heldur áfram að segja hlustendum frá þemum í Bernnu-Njálssögu en sagan er nú kvöldsaga Rásar 1.

Sigrún Árnadóttir hlaut norræn þýðingaverðlaun Letterstedtska sjóðsins á dögunum. Sigrún kynnti landsmenn meðal annars fyrir hinum ástsæla Einari Áskeli. Víðsjá heimsækir Sigrúnu á heimili hennar í tilefni verðlaunanna.

Sunna Ástþórsdóttir flytur hlustendum myndlistarpistil og veltir þar fyrir sér útskriftasýningum Listaháskóla Íslands og myndlistarnámi almennt. Einnig verður rætt við Sólveigu Thoroddsen söngkonu og hörpuleikara sem nýlega sendi frá sér hljómplötu þar sem hún syngur lög á einum sjö tungumálum og leikur undir á tvenns konar Hörpu og finnska hljóðfærið kantele.

Björn Þór Vilhjálmsson segir hlustendum frá lestri sínum á bókinni Apropos of nothing, nýlegri sjálfsævisögu Woodys Allen.

Ármann Jakobsson segir hlustendum Víðsjár í dag frá ákveðnum þemum úr Brennu-Njálssögu, sem hann er að lesa þessa dagana sem kvöldsögu hér á Rás 1, þemað sem Ármann ræðir í dag er Íslenski hrúturinn. Víðsjá heimsækir líka neðstu hæð Ketilhússins í Listagilinu á Akureyri en þar hefur listahópurinn Kaktus nú vinnustofur og sýningarrými. Hlustendur heyra í Freyju Reynisdóttur og Karólínu Baldvinsdóttur, meðlimum Kaktús hópsins, og í Önnu Gunnarsdóttur sýningarstjóra samsýningarinnar Hverfandi landslag á Listasafnínu á Akureyri. Sigurður Gylfi Magnússon sagnfræðingur verður tekinn tali um nýjustu bók hans sem fjallar um tilfinningalíf Magnúsar HJ Magnússonar sem er fyrirmyndin að Ólafi Kárasyni ljósvíkingi í Heimsljósi Halldórs Laxness. Hallargarðurinn í Reykjavík verður jafnframt heimsóttur en þar opnar Sigríður Soffía Níelsdóttir sýninguna Eldblóm á morgun, 17. júní.

Umsjón: Guðni Tómasson og Halla Þórlaug Magnúsdóttir.

Í Víðsjá verður á flakki í dag um listagilið á Akureyri en fjöldi nýrra sýninga opnaði í Listasafninu á Akureyri um síðustu helgi. Safnið verður í heimsótt í Víðsjá í dag, rætt við safnstjórann, Hlyn Hallsson og fleiri aðstandendur sýninga þar á bæ. Ármann Jakobsson prófessor í íslenskum bókmenntum fyrri alda les kvöldsögu Rásar 1 Brennu-Njálssögu á næstu vikum, en fyrsti lestur verður á dagskrá Rásar 1 annað kvöld. Að því tilefni verður rætt við Ármann í Víðsjá í dag og á næstu vikum um helstu þemu sögunnar, áhrifamátt og mikilvægi. Margrét Elísabet Ólafsdóttir, lektor við Háskólann á Akureyri, verður einnig tekin tali um Nýjar birtingarmyndir listarinnar, sýningu sem opnuð verður um helgina á vefsvæði tímaritsins Artzine.

Umsjón: Guðni Tómasson og Halla Þórlaug Óskarsdóttir