Víðsjá

Í Víðsjá dagsins verður rætt er við Guju Dögg Hauksdóttur arkitekt um sýninguna PREFAB / FORSMÍÐ sem opnaði um liðna helgi í Skaftelli, Menningarmiðstöð Austurlands. Á sýningunni er farið yfir fagurfræði og sögu norsku einingahúsanna sem risu við Seyðisfjörð í byrjun síðustu aldar, auk einingahúss eftir Le Corbusier og norsku arkitektana Rintala Eggertsson.

Bók vikunnar að þessu sinni er skáldsagan Beðið eftir barbörunum eftir nóbelskáldið John Maxwell Coetzee. Tveir þýðendur komu að verkinu, þau Sigurlína Davíðsdóttir og Rúnar Helgi Vignisson, og segja þau frá bókinni í Víðsjá dagsins.

Snæbjörn Brynjarsson segir frá upplifun sinni af samtímaóperunni Ekkert er sorglegra en manneskjan sem frumsýnd var á dögunum í Tjarnarbíói og er eftir Friðrik Margrétar Guðmundsson og Adolfs Smára Unnarssonar.

Ennfremur verður fjallað um umdeilda myndlistarsýningu sem farin er að valda titringi löngu áður en hún er komin upp, en á dögunum bárust fréttir um það sýningu sem átti að fara í fjögur mikilvæg myndlistarsöfn, vestan hafs og austan, hefði verið slegið á frest vegna viðkvæms myndefnis. Við segjum frá listamanninum Philip Guston í þætti dagsins og ræðum við Hallgrím Helgason rithöfund um Guston og verk hans.

Víðsjá heimsækir Norræna húsið í dag til að skoða sýninguna Undirniðri en þar eiga verk listamenn frá öllum Norðurlöndunum. Sýningunni er ætlað að endurspegla hvernig við öll tengjumst í flóknu rótarkerfi um leið og einstaklingurinn getur í auknum mæli einangrað sig bæði líkamlega og hugmyndafræðilega. Sýningarstjóri Undirniðri er Arnbjörg María Danielssen og hún segir hlustendum frá.

Haldið verður áfram að stikla stóru í sögu borga á tímum farsótta. Fjallað verður um þorp andagiftar á hjara veraldar, þangað sem borgarbúar Katalóníu sóttu í heilsusamlega sumarmánuði og listamenn komu víða að í leit að örvandi félagsskap.

Guðrún Elsa Bragadóttir heldur áfram að fjalla um stöðu kvenna í kvikmyndaiðnaðinum og loks segir Gauti Kristmannsson hlustendum skoðun sína á skáldsögunni Lygalíf fullorðinna eftir Elenu Ferrante.

Umsjón: Guðni Tómasson

Víðsjá fer niður í miðbæ Reykjavíkur, í heimsókn í Berg contemporary þar sem sýningin Gróður opnaði um liðna helgi. Rætt er við Lilju Birgisdóttur, Katrínu Elvarsdóttur og Ninu Zurier en þær sýna allar ný ljósmyndaverk á sýningunni.

Jón Hallur Stefánsson verður tekin tali um skáldsöguna Tíkina eftir hina kolumbísku Pilar Quintana en þýðing Jóns Halls á sögunni kom nýverið út hjá forlaginu Angústúru.

Ólöf Gerður Sigfúsdóttir í sjónmenningu í pistli sínum og fjallar í dag um sýninguna Á sameiginlegri jörð sem nú er uppi á Korpúlfsstöðum.

Hlustendur heyra brot úr ljóðlistarmyndbandi Hallgríms Helgasonar og tónlist af nýrri plötu Gyðu Valtýsdóttur.

Umsjón: Guðni Tómasson

Í Víðsjá í dag verður meðal annars haldið í heimsókn í Listasafn Reykjanesbæjar og rætt við nýjan safnstjóra safnsins, Helgu Þórsdóttur, sem tók við rekstri þess fyrr á árinu. Þar er nú uppi sýningin Áfallalandslag en á henni eiga verk Ósk Vilhjálmsdóttir, Halldór Ásgeirsson, Rannveig Jónsdóttir og Gjörningaklúbburinn. Listasafnið hefur nýverið stækkað nokkuð þegar annar salur var tekinn undir samtímamyndlist þar á bæ.

Hugað verður að listaverki eftir Ragnar Kjartansson í kirkju einni í Mílanó.

Leiklistargagnrýni: Snæbjörn Brynjarsson segir hlustendum skoðun sína á leikritinu Oleanna eftir David Mamet sem er fyrsta frumsýning Borgarleikhússins á nýju starfsári.

Þjóðminjasafnið verður einnig heimsótt í þættinum en þar er sýningin Saga úr jörðu nú uppi. Hrönn Konráðsdóttir fornleifafræðingur segir fá sýningunni sem að rekur sögu fornleifarannsókna á Hofsstöðum í Mývatnssveit.

Fjallað um bók vikunnar sem er endurtekin - Farenheit 451eftir Ray Bradbury. Þórdís Bachmann segir frá bókinni (endurtekið)

Víðsjá í dag verður helguð breska myndlistardúóínu Gilbert and George sem hafa unnið að list sinni saman síðan á sjöunda áratug síðustu aldar og haft mikil áhrif á ýmsa þá sem hafa komið í kjölfarið, en sýning á verkum þeirra er nú uppi í Hafnarhúsi Listasafns Reykjavíkur. Gestir þáttarins verða myndlistarmennirnir Ilmur Stefánsdóttir, Eirún Sigurðardóttir úr Gjörningaklúbbnum og Ragnar Kjartansson.

Lesarar í þættinum eru Gunnar Hansson og Leifur Hauksson.

Umsjón Guðni Tómasson

Víðsjá 16. sept

Í siðustu viku var fjallað í Víðsjá um holræsi og áhrif farsótta á borgir og í þætti dagsins verður haldið áfram þaðan sem frá var horfið. Nú verður litið aftur til þess tíma þegar Barcelonaborg sprengdi utan af sér miðaldamúrana og varð nútímaleg borg með birtu og andvara fyrir alla. Fyrsti kafbáturinn, útópískir sósíalistar og draumar um betri heim koma lika við sögu.

Guðrún Elsa Bragadóttir heldur áfram að ræða stöðu íslenskra kvenna í kvikmyndaiðnaðinum í pistli sínum í dag og hugað verður að líkamlegu leikhúsi og upplifun pólskra innflytjenda af því að koma inn í íslenskt samfélag þegar Pálína Jónsdóttir og Ewa Marcinek koma í heimsókn í Víðsjá og segja frá sýningunni Polishing Iceland sem Reykjavik Ensemble frumsýnir að nýju í Tjarnarbíói annað kvöld.

Umsjón Guðni Tómasson

Víðsjá 15. september 2020

Í sumar var tekin skóflustunga að nýjum vistvænum íbúðum fyrir ungt fólk í Gufunesi. Íbúðirnar verða á bilinu 30 til 68 fm og munu kosta frá 17-34 milljónir. Á bak við jafn hagkvæmar einingar liggja miklar rýmispælingar sem Sólveig Berg, arkitekt hjá Yrki, mun segja betur frá í Víðsjá í dag. Einnig verður haldið í heimsókn í Nýlistasafnið þar sem nú stendur yfir yfirlitssýningin á verkum Ástu Ólafsdóttur en sýningin heitir Hjartsláttur. Auk þess verður fjallað um bók vikunnar á Rás 1 að þessu sinni en það er bókin Býr Íslendingur hér? Minningar Leifs Muller skráðar af Garðari Sverrissyni. Þar segir Leifur frá hremmingum sínum í heimsstyrjöldinni síðari; hvernig hann var svikinn í hendur Gestapo í Noregi, fangelsaður og síðar sendur til Sachsenhausen-fangabúðanna skammt frá Berlín. Garðar Sverrisson verður gestur Víðsjár, segir frá bókinni og les upp úr henni brot.

Auk þess leikur Hallfríður Ólafsdóttir heitin Dans sælu andanna úr Orfeus og Evridís eftir Gluck.

Víðsjá 10.9.2020

Í Víðsjá í dag verður haldið í Þjóðminjasafn Íslands til að skoða sýninguna Teiknað fyrir börnin sem verður opnuð í myndasal safnsins um helgina. Þar fá gestir innsýn í myndheim Halldórs Péturssonar sem myndskreytti fjölann allan af bókum á sinni tíð, teiknaði forsíður vinsælla tímarita, vann frímerki og peningaseðla og teiknaði andlitsmyndir. Guðrún Elsa Bragadóttir hefur pistlaröð sína um íslenskar konur í kvikmyndaiðnaðinum og Ólöf Gerður Sigfúsdóttir, nýr sjónrýnir Víðsjár, kveður sér hljóðs og segir hlustendum frá fyrirbærinu Minisophy eða Smáspeki sem hönnuðurinn Katrín Ólína og heimspekingurinn Sigríður Þorgeirsdóttir standa að. Auk þessa verður í Víðsjá dagsins fjallað, að gefnu tilefni, um holræsi, skítkast og farsóttir. 

Umsjón: Guðni Tómasson

Víðsjá 9.9.2020

Þjóðlagasveitin Brek kemur í heimsókn í Víðsjá í dag og það liggur við að slegið verði upp hlöðuballi í hljóðveri. Brek leikur lög fyrir hlustendur og segir frá eigin starfi, en sveitin tekur núna þátt í verkefni sem heitir Global Music Match og ætlað er að tengja saman tónlistarmenn sem vinna á svipuðum nótum í veröldinni. Einnig verður í Víðsjá rætt við Hildigunni Sverrisdóttur nýskipaðan deildarforseta Arkitektúrdeildar við Listaháskóla Íslands. Hildigunnar bíða spennandi tímar með nemum skólans en jafnframt miklar áskoranir, á tímum þegar loftslagsbreytingar móta það hvernig við byggjum og búum.

Bók vikunnar á Rás 1 að þessu sinni er furðusagan eða glæpafantasían Sólhvörf eftir Emil Hjörvar Petersen sem kom út hjá Bjarti árið 2017 og er önnur bókin í bókaflokki sem gerist jöfnum höndum í mannheimum og hulduheimum. Aðalpersónurnar eru mæðgurnar Bergrún og Brá sem vegna yfirnáttúrulegra hæfileika sinna eru fengnar til að aðstoða við rannsókn glæpamáls sem teygir anga sína til hulduheima, nánar tiltekið til Grýlu gömlu og jólasveinanna sem hér hafa svoítið annað yfirbragð en í vinsælum jólakvæðum. Rætt verður við Emil Hjörvar í Víðsjá í dag.

Umsjón: Guðni Tómasson

Víðsjá 8. september 2020

Í Víðsjá í dag verður rætt við Æsu Sigurjónsdóttur og Sigrúnu Ölbu Sigurðardóttur um bókina Fegurðin er ekki skraut sem fjallar um íslenska samtímaljósmyndun. Hreinn Valdimarsson og Bjarni Rúnar Bjarnason segja nánar frá samstarfi Ríkisútvarpsins og Sinfóníuhljómsveitar Íslands en við þá var rætt í afmælisveislu stofnanna tveggja, Klassíkin okkar, sem fór fram á föstudag. Myndlistarmaðurinn Hrafnkell Sigurðsson segir frá sýningu sinni Freeze frame (fæðing guðanna) sem nú hefur verið opnuð í Ásmundarsal.

Umsjón Guðni Tómasson