DW Amharic-በዛሬው የዓለም ዜና ፤በኦሮሚያ ክልል ጉጂ ዞን ሰባቦሩ ወረዳ አንዲት ነፍሰ ጡር እናት በታጣቂዎች መገደላቸውን።የሲቪክ ማኅበረሰብ ድርጅቶች ረቂቅ ማሻሻያ አዋጅ ላይ ማስተካከያ እንዲደረግ ያቀረበው ምክረ ሀሳብ ውጤት ማምጣቱን ኢሰመኮ መግለፁን፣የሱዳን ፈጥኖ ደራሽ ሀይሎች በሰሜን ዳርፉር በተፈቃዮች መጠለያ ጣቢያ ባደረሱት ጥቃት 40 ሰላማዊ ሰዎች መገደላቸውን፣ የአውሮፓ ሕብረት፣ብሪታንያ እና ጃፓን በጋዛ «እየተከሰተ» ነው ባሉት ረሀብ ላይ እርምጃ እንዲወሰድ ማሳሰቡን እና የተባበሩት መንግሥታት ድርጅት በጋዛ በአልጀዚራ ጋዜጠኞች ላይ የተፈጸመውን ግድያ ማውገዙን።ያስቃኛል።

የኢትዮጵያ አየርመንገድ ኦሮሚያ ክልል ቢሾፍቱ ከተማ አቅራቢያ ለሚገነባው ግዙፍ የአቡሴራ አየርማረፊያ ግንባታ የፋይናንስ እንቅስቃሴዎች ውክልና ሰነድ ከአፍሪካ ልማት ባንክ ጋር ዛሬ ተፈራረመ፡፡ የናይጄሪያ ጦር ከ100 በላይ «ዓመጸኛ ወንጀለኞች» ያላቸውን መግደሉን አስታወቀ። እስራኤል በጋዛ በሚገኙ የአልጀዚራ ጋዜጠኞች ላይ በፈጸመችው የአየር ጥቃት 5 የአልጀዚራና 1 የፍልስጤም የግል መገናኛ ብዙኀን ዘጋቢ መገደላቸውን የጋዛ የስቪል መከላከያ ተቋም እና አልጀዚራ አስታወቁ።

በሰሜን ኮርዶፋን 18 ሰዎች በሱዳን ፈጥኖ ደራሽ ኃይል ጥቃት፤ በኤል ፋሽር 63 ሰዎች በተመጣጠነ ምግብ እጦት ሕይወታቸውን አጥተዋል ተባለ። ኤርትራውያን ከፈረንሳይ ወደ ብሪታኒያ የቀዘቀዙ አትክልቶች ጭኖ በመጓዝ ላይ በነበረ ተሽከርካሪ ውስጥ ተገኙ። በናይጄሪያ ወሮበሎች 13 ጸጥታ አስከባሪዎች ገደሉ። እስራኤል ጋዛን ብትቆጣጠር "ሌላ ጥፋት" እንደሚከተል የተመ ባለሥልጣን አስጠነቀቁ። ጠቅላይ ሚኒስትር ቤንያሚን ኔታንያሁ ሀገራቸው ጋዛን የምትቆጣጠረው ለአጭር ጊዜ እንደሚሆን ተናግረዋል። የዩክሬን እና የሩሲያን ጦርነት ለማብቃት የሚፈጸም ሥምምነት ኪየቭን ሊያካትት እንደሚገባ የአውሮፓ ኅብረት የውጪ ጉዳይ ኃላፊ አሳሰቡ።

በመተከል ዞን ድባጢ ወረዳ ባጋጠመ የመኪና አደጋ የ12 ሰዎች ሕይወት ማለፉን የወረዳው አስተዳደር አስታወቀ። 67 ሰዎችን ከሃገር በሕገወጥ መንገድ ሊያስወጣ ሞክሯል ተብሎ የተጠረጠረ ግለሰብ በቁጥጥር ሥራ ማዋሉን በደቡብ ኢትዮጵያ ክልል የጋሞ ዞን ፖሊስ መምሪያ አስታወቀ ፡፡ በደቡብ ጃፓን የምትገኘዋ የናጋሳኪ ከተማ በዩናይትድ ስቴትስ በአቶሚክ ቦምብ የተደበደበችበት 80ኛ አመት ዛሬ ዘክራ ውላለች።

-የኢትዮጵያ ሕዝብ የሚደርስበትን እልቂት ለመግታት በሥልጣን ላይ ያለዉን መንግስት በሠላማዊ፣ ዴሞክራሲያዊና ሕዝባዊ ትግል መቀየር እንዳለበት የሐገሪቱ ተቃዋሚ ፓርቲዎች ስብስብ ጥሪ አደረገ።--የትግራይ ክልል ገዢ ፓርቲ ህወሓት ከኤርትራ መንግስት ጋር ግንኙነት መጀመሩን በይፋ አረጋገጠ።የኢትዮጵያ ብሔራዊ ምርጫ ቦርድ ከሕጋዊ ፓርቲነት ያገደዉ የህወሓት ሊቀመንበር ዶብረፅዮን ገብረ መድሕን የኢትዮጵያ ፌደራዊ መንግሥትን ወቅሰዋል።--እስራኤል ያወደመቻትን የጋዛ ሰርጥ ርዕሠ-ከተማ ጋዛ ከተማን በጦር ሐይል ለመቆጣጠር መወሰኗ ከዉጪም ከዉስጥም ዉገዝትና ተቃዉሞ ገጥሞታል።

የነሐሴ 1 ቀን 2017 ዓ.ም. አርዕስተ ዜና

ከሶማሊያ ተነስተው ወደ የመን በጀልባ በመጓዝ ላይ ከነበሩ ስደተኞች መካከል 7 ኢትዮጵያውያን በረሀብ እና በውኃ ጥም መሞታቸውን የተመ የፍልሰተኞች ጉዳይ ድርጅት IOM አስታወቀ።

የሱዳን ጠቅላይ ሚኒስትር ካሚል ኢድሪስን ያነጋገሩት የግብጹ ፕሬዝዳንት አብዱል ፈታህ አልሲሲ ግብጽ የሱዳንን አንድነት፣ ሉዓላዊነት እና የግዛት አንድነት የሚደግፍ ጽኑ አቋም እንዳላት አረጋገጡ።

የሩስያው ፕሬዝዳንት ቭላድሚር ፑቲን ስለዩክሬን ከትራምፕ ጋር እንደሚነጋገሩ አረጋገጡ። ጉባኤው መቼና የት እንደሚካሄድ፣ የዩክሬን ፕሬዝዳንት ቮሎዶሚር ዜሌንስኪ መሳተፍ አለመሳተፋቸውም አልተነገረም።

በአማራ ክልል ሰሜን ወሎ ዞን በጃራ የሀገር ውስጥ መጠለያ ጣቢያ ንፋስ ቀላቅሎ በጣለ ዝናብ 28 ሰዎች መጎዳታቸው፤ የተፈናቃዮቹ መጠለያም መውደሙ ተነገረ።

የተመድ እስራኤል በጋዛ የምታካሂደውን ዘመቻ ማስፋፋቷ ለበርካቶች እልቂት ምክንያት ሊሆን ይችላል ሲል አስጠነቀቀ። የእስራኤል ጠቅላይ ሚኒስትር ሀገራቸው ጋዛ ውስጥ ሃማስን ሙሉ ለሙሉ ማሸነፍ ይኖርባታል እያሉ ነው።

ወደ ሞስኮ የተጓዙት የአሜሪካው ፕሬዝደንት ልዑክ ስቲቭ ዊትኮፍ ከሩሲያው ፕሬዝደንት ቭላድሚር ፑቲን ጋር ለሰዓታት መነጋራቸው ተገለጸ።

የጀርመን ካቢኔ በሕገ-ወጥ ሥራ ላይ መሰማራትና ሕገወጥ የገንዘብ ውዝውርን ለመቆጣጠር የሚያስችል ረቂቅ ሕግ ዛሬ አፀደቀ።

-ኢትዮጵያዉያን በሕገ-ወጥ መስመሮች ወደ ዉጪ እንዳይጓዙ በዤኔቭ የኢትዮጵያ ኤምባሲ መከረ።ኤምባሲዉ ባለፈዉ ዕሁድ የአደን ባሕረ ሰላጤን ለማቋረጥ ሲሞክሩ 76 ኢትዮጵያዉያን ስደተኞች በመሞታቸዉ ሐዘኑን ገልጧልም።--ሩዋንዳ ከዩናይትድ ስቴትስ የሚባረሩ 250 ስደተኞችን ልትቀበል ነዉ።የዩናይትድ ስቴትስ ፕሬዝደንት የዶናልድ ትራምፕ መስተዳድር «ሕገ ወጥ» እና «የመጥፎዎች መጥፎ» የሚላቸዉን ስደተኞች ወደ ሶስተኛ ሐገራት እያባረረ ነዉ።--የእስራኤል ጠቅላይ ሚንስትር የቢኒያሚን ኔታንያሁ መንግሥት ጋዛ ዉስጥ የከፈተዉን ጦርነት ለማጠናከርና ጋዛን ሙሉ በሙሉ ለመግዛት አቅዷል መባሉን የተለያዩ የእስራኤል የቀድሞ ባለሥልጣናት ተቃወሙት።

የሐምሌ 29 ቀን 2017 ዓ.ም. አርዕስተ ዜና

ኢትዮጵያውያን የሚያመዝኑባቸውን ስደተኞች የጫነች ጀልባ በአደን ባህረ ሰላጤ ሰጥማ ቢያንስ 68 ስደተኞች መሞታቸውን የተባበሩት መንግሥታት የፍልሰተኞች ጉዳይ ድርጅት በምህጻሩ IOM አስታወቀ። የየመን ባለሥልጣናት በበኩላቸው በአደጋው ቢያንስ 76 ስደተኞች ሞተዋል ብለዋል።

በአማራ ክልል ሰሜን ጎንደር ዞን ደባርቅ ወረዳ የሚገኙ ተፈናቃዮች በእርዳታ እጦት ሠዎች እየሞቱ ነው፣ አብዛኛዎቹም ለልመና ወጥተዋል ሲሉ ለዶቼቬለ ተናገሩ ።

ጋዛ ውስጥ የታገቱት ሰዎች ይዞታ ዋነኛ ዓለም አቀፍ አጀንዳ መሆን አለበት ስትል እስራኤል አሳሰበች።

በሰሜን ምዕራብ ናይጄሪያ ታጣቂዎች ከ50 በላይ ሰዎችን በጅምላ አገቱ። ሩሲያ በዩክሬን ቁጥጥር ሥር በሚገኙት የዶኔትስክ እና ኼርሶን ግዛቶች በሣምንቱ መገባደጃ በፈጸመችው ድብደባ ሰባት ሰዎች መገደላቸውን የአካባቢው ባለሥልጣናት ዛሬ እሁድ አስታወቁ። የፍልስጤም ቀይ ጨረቃ ማኅበር በኻን ዩኒስ በሚገኝ ዋና መሥሪያ ቤቱ ላይ በተፈጸመ ጥቃት አንድ ሠራተኛው ሲገደል ሌሎች ሦስት መቁሰላቸውን አስታወቀ። የአውሮፓ ኅብረት የውጪ ጉዳይ ኃላፊ ካያ ኻላስ በሐማስ እጅ የሚገኘው እስራኤላዊ ታጋች ሁኔታ "አስደንጋጭ" ሲሉ አወገዙ። በምሥራቃዊ ሩሲያ ካምቻትካ ግዛት የሚገኝ እሳተ ገሞራ ከ600 ዓመታት ገደማ በኋላ ለመጀመሪያ ጊዜ ፈነዳ።