ព្រឹត្តិការណ៍កម្ពុជាប្រចាំថ្ងៃ

By RFI ខេមរភាសា / Khmer

ព្រឹត្តិការណ៍កម្ពុជាប្រចាំថ្ងៃ episodes

March 13, 2022 អ្នកឃ្លាំមើលសង្គម៖ ការរើសអើងនិន្នាការនយោបាយនៅតែជាក្តីបារម្ភធំក្នុងសង្គមខ្មែរ
កាលពីពេលថ្មីៗនេះ មានករណីស្នើសុំលុបចោលវីឌីអូមិនឱ្យផ្សព្វផ្សាយនៅលើបណ្តាញសង្គម របស់កីឡាការនីនិងស្ត្រីជាអ្នកជំនួញមានឥទ្ធិពលនៅកម្ពុជា។ ការស្នើនោះធ្វើឡើងនៅក្រោមហេតុផលថា វីឌីអូនោះមានផ្សារភ្ជាប់ទៅនឹងនយោបាយ ព្រោះមានវត្តមានស្ត្រីមួយរូបមកពីអតីតបក្សប្រឆាំងដែរ។ អ្នកឃ្លាំមើលសង្គមរួមមាន អង្គការសង្គមស៊ីវិលផ្នែកសិទ្ធិមនុស្ស អ្នកវិភាគ និងសារព័ត៌មាន បានគូសបញ្ជាក់ដូចគ្នាថា សកម្មភាពខាងលើនេះជារឿងបែបឯកជនមែន តែវាបានឆ្លុះបញ្ចាំងឱ្យឃើញពីសង្គមខ្មែរ កំពុងកើតមានការរើសអើងផ្នែកនយោបាយធ្ងន់ធ្ងរ ដែលកំពុងវាយបំបែកស្រទាប់សាមគ្គីភាពនៅក្នុងសង្គម។
13 min
March 12, 2022 សង្គមស៊ីវិល៖ កម្ពុជាអាចប្រឈមនឹងការរំលោភសិទ្ធិមនុស្សធ្ងន់ធរ បើមិនលុបបំបាត់ទាសភាពនៅក្នុងប្រទេស
ក្នុងសេចក្តីថ្លែងការណ៍រួម អង្គការសង្គមស៊ីវិលជាតិនិងអន្តរជាតិចំនួន៣៦ស្ថាប័ន បានស្នើឱ្យរដ្ឋាភិបាលកម្ពុជាដោះស្រាយបញ្ហា និងលុបបំបាត់ទាសភាពនៅកម្ពុជា ដើម្បីឆ្លើយតបទៅនឹងការរំលោភសិទ្ធិមនុស្សយ៉ាងធ្ងន់ធ្ងរ។ បើតាមអង្គការទាំងនោះ ជនបរទេសរាប់ពាន់នាក់ត្រូវបានបង្ខំឱ្យធ្វើប្រតិបត្តិការបោកប្រាស់តាមប្រព័ន្ធអ៊ីនធឺណេត ដែលដាក់គោលដៅនៅក្រៅប្រទេសកម្ពុជា។ នៅក្នុងសំណុំរឿងនេះដែរ អ្នកឃ្លាំមើលបញ្ហាសង្គម អំពាវនាវឱ្យរដ្ឋាភិបាលរឹតបន្តឹងលើជនអន្តោប្រវេសន៍្តឱ្យកាន់តែខ្លាំង ដើម្បីទប់ស្កាត់បទល្មើសឧក្រិដ្ឋនានា និងសម្រាប់ការពារមុខមាត់របស់កម្ពុជាផងដែរ។ ក៏ប៉ុន្តែរដ្ឋាភិបាលវិញ អះអាងថា អាជ្ញាធរកម្ពុជាបានដោះស្រាយបញ្ហានេះស្ទើរតែជោគជ័យទាំងស្រុង។
13 min
March 11, 2022 តើវិស័យអចលនទ្រព្យ អាចស្ទុះឡើងវិញទេ នៅពេលរដ្ឋអនុគ្រោះពន្ធចំណេញមូលធន២ឆ្នាំទៀត?
អគ្គនាយកដ្ឋានពន្ធដារនាពេលថ្មីៗនេះ បានសម្រេចបន្តលើកលែងការប្រមូលពន្ធលើចំណេញមូលធន២០% រយៈពេល២ឆ្នាំបន្ថែមទៀត ចំពោះអាជីវកម្ម អ្នកវិនិយោគិន និងវិស័យអចលនទ្រព្យទាំងអស់ក្នុងប្រទេសកម្ពុជា។ ការអនុវត្តគោលការណ៍ផ្អាកការប្រមូលពន្ធមូលធននេះ នឹងត្រូវចាប់ផ្តើមពីថ្ងៃទី១ ខែមករា ឆ្នាំ២០២២ ដល់ថ្ងៃទី៣១ ខែធ្នូ ឆ្នាំ២០២៣។ បើតាមអគ្គនាយកដ្ឋានពន្ធដារ ការពន្យាពេលប្រមូលពន្ធមូលធនបន្ថែមនេះ ដើម្បីជួយសម្រួលបន្ទុក និងចូលរួមលើកកម្ពស់ការស្តារសេដ្ឋកិច្ចឡើងវិញ ក្រោយវិបត្តិជំងឺកូវីដ១៩។ ទន្ទឹមនឹងនេះ អ្នកជំនាញសេដ្ឋកិច្ច និងអ្នកធ្វើការលើវិស័យអចលនទ្រព្យ បានបង្ហាញការយល់ឃើញថា នេះជាការលើកទឹកចិត្តមួយផ្នែកធំចំពោះអាជីវកម្ម និងវិស័យឯកជនទាំងអស់។ បន្ថែមពីនេះ អ្នកជំនាញសេដ្ឋកិច្ចអះអាងថា តាមរយៈការពន្យាពេលប្រមូលពន្ធមូលធន កម្ពុជានឹងអាចទាក់ទាញអ្នកវិនិយោគិនបានកាន់តែច្រើន ខណៈចំនួនពន្ធមូលធន២០% ស្ថិតក្នុងបរិមាណតិចជាងបណ្តាប្រទេសក្នុងតំបន់ និងក្រៅតំបន់។
13 min
March 10, 2022 យុទ្ធសាស្ត្រចុះចូលពីអ្នកគាំទ្របក្សប្រឆាំងជាមួយបក្សកាន់អំណាចមុនបោះឆ្នោតនៅមានប្រសិទ្ធភាពទេ?
ចាប់តាំងពីខែមករា ឆ្នាំ២០២២មក ឃើញថាមានសកម្មភាពអ្នកគាំទ្របក្សប្រឆាំង និងអតីបក្សប្រឆាំង រាប់រយ រាប់ពាន់នាក់ បានចូលរួមជីវភាពនយោបាយជាមួយគណបក្សកាន់អំណាច ខណៈការបោះឆ្នោតក្រុមប្រឹក្សាឃុំសង្កាត់អាណត្តិទី៥នេះ នៅសល់តែ៣ខែទៀតប៉ុណ្ណោះ។ ក៏ប៉ុន្តែបក្សប្រឆាំង ក៏ដូចជាអ្នកតាមដាននយោបាយមួយចំនួនយល់ថា យុទ្ធសាស្ត្រនេះ ជារូបភាពចាស់គំរិត បែបចិត្តសាស្ត្រនយោបាយមុនការបោះឆ្នោត ហើយមិនមានប្រសិទ្ធភាពទេ។ ដោយឡែកគណបក្សកាន់អំណាចវិញ បានលើកឡើងថា ការចុះចូលជីវភាពនយោបាយរបស់អ្នកគាំទ្របក្សប្រឆាំងគឺជាសិទ្ធិនយោបាយរបស់ពួកគេ ហើយសកម្មភាពនេះមិនមានលាក់លៀម ឬកាត់តអ្វីទេ។
13 min
March 09, 2022 ការចាប់ខ្លួនស្ត្រីជាអ្នកតវ៉ានៅក្រុមហ៊ុនណាហ្គាវើលដ៍ជារូបភាពមួយប៉ះពាល់ដល់សិទ្ធិនារី?
មុនមួយថ្ងៃនៃទិវាសិទ្ធិនារីអន្តរជាតិមកដល់ កម្លាំងសមត្ថកិច្ច បានចាប់ខ្លួនអ្នកតវ៉ាប្រមាណ១៨០នាក់ ក្នុងនោះមានស្ត្រី១៥៥នាក់បញ្ជូនទៅកាន់មណ្ឌលចត្តាឡីស័កនៅក្នុងខណ្ឌព្រែកព្នៅ ខណៈ បុគ្គលិក និងអតីតបុគ្គលិកក្រុមហ៊ុនណាហ្គាវើលដ៍ បាននាំគ្នាតវ៉ាជាថ្មី ជំរុញឲ្យមានដំណោះស្រាយវិវាទការងារ។ ការចាប់ខ្លួនអ្នកតវ៉ាដែលភាគច្រើនជាស្ត្រី នៅកៀកថ្ងៃសិទ្ធិនារីបែបនេះត្រូវបានរិះគន់ពីសំណាក់អ្នកការពារសិទ្ធិមនុស្ស ប៉ុន្តែអាជ្ញាធររាជធានីភ្នំពេញ អះអាងថា ការតវ៉ារបស់ក្រុមនេះគឺដោយសារតែមានអ្នកនៅពីក្រោយ។
12 min
March 08, 2022 តើកម្ពុជា-អាមេរិកនឹងបាត់ប្រយោជន៍ទេ ប្រសិនបើកិច្ចប្រជុំពិសេសផ្ទាល់អាស៊ាន-អាមេរិក ត្រូវខកខាន?
កិច្ចប្រជុំពិសេសអាស៊ាន-អាមេរិក ដែលគ្រោងធ្វើនៅចុងខែមីនាឆ្នាំ២០២២នេះ ត្រូវបានលើកពេលទៅថ្ងៃក្រោយ ដោយសារប្រទេសអាស៊ាន និងអាមេរិកមិនអាចរកពេលវេលាសមស្របអាចជួបប្រជុំគ្នាបាន។ ភាគីទាំងពីរបានលើកពីហេតុផលជាប់រវល់រៀងៗខ្លួន ជាហេតុធ្វើឲ្យកិច្ចប្រជុំប្រចាំឆ្នាំនេះ នៅមិនទាន់អាចកំណត់ពេលវេលាជាក់លាក់បាននៅឡើយ។ តើកិច្ចប្រជុំអាស៊ាន-អាមេរិក មានសារៈសំខាន់យ៉ាងណាជាពិសេសពេលកម្ពុជាធ្វើជាប្រធានអាស៊ាន ហើយប្រសិនបើកិច្ចប្រជុំអាស៊ាន-អាមេរិកដោយផ្ទាល់ បែរជាខកខាន តើអ្វីទៅជារឿងគួរឲ្យសោកស្តាយសម្រាប់កម្ពុជា និងសហរដ្ឋអាមេរិក?
13 min
March 07, 2022 តើការធ្វើពហិការបស់គណបក្សមួយចំនួន ធ្វើឲ្យប៉ះពាល់ដល់ដំណើរការបោះឆ្នោតដោយសេរី និងយុត្តិធម៌ដែរទេ?
គណបក្សសម្ព័ន្ធដើម្បីប្រជាធិបតេយ្យ(LDP) បានចេញមុខធ្វើពហិកាមិនចូលរួមការបោះឆ្នោតឃុំ សង្កាត់នៅអាណត្តិនេះទេ ពីព្រោះតែគ.ជ.ប បានលុបចោល ទម្រង់«១១០២» ជាឯកសារសម្រាប់ផ្ទៀងផ្ទាត់ការរាប់សន្លឹកឆ្នោត។ សម្រាប់គ.ជ.ប ការធ្វើពហិការនេះ មិនប៉ះពាល់ដល់ ដំណើរការបោះឆ្នោតទេ ខណៈដែលមានគណបក្សនយោបាយយ៉ាងតិចចំនួ១៧ បានដាក់បេក្ខជនឈរឈ្មោះចូលរួមប្រកួតប្រជែង។ ទោះជាយ៉ាងណាអ្នកឃ្លាំមើលការបោះឆ្នោត នៅតែចង់ឲ្យគ.ជ.ប រក្សាទុកទម្រង់«១១០២» ឲ្យនៅដដែល ដើម្បីធានានូវបរិយាកាសនយោបាយដល់គ្រប់គណបក្ស។ តើការធ្វើពហិការបស់គណបក្សមួយចំនួន ធ្វើឲ្យប៉ះពាល់ដល់ដំណើរការបោះឆ្នោតដោយសេរី និងយុត្តិធម៌ដែរទេ?
12 min
March 06, 2022 តើសាររបស់ឯកអគ្គរដ្ឋទូតអាមេរិកមានមានន័យយ៉ាងណា សម្រាប់ដោះស្រាយករណី លោក កឹម សុខា?
ឯកអគ្គរដ្ឋទូតអាមេរិកប្រចាំកម្ពុជា បានលើកឡើងថា កម្ពុជានឹងទទួលបានអត្ថប្រយោជន៍ពីការស្តាឡើងវិញនូវនីតិសម្បទារដោយផ្តល់នូវសេរីភាព សិទ្ធិនយោបាយ និងការចូលរួមការបោះឆ្នោតដល់លោក កឹម សុខា។ ការលើកឡើងយ៉ាងដូច្នេះ គឺបន្ទាប់ពីលោកបានជួបលោក កឹម សុខា នៅរសៀលថ្ងៃទី៤ខែមីនា។លោកទូតរូបនេះអះអាងថាលោករីករាយដែលបានជួបលោក កឹម សុខា។ ប៉ុន្តែលោកសំដែងការមិនរីករាយឡើយ ខណៈដែលសវនាការរបស់លោក កឹម សុខា ដោយមានហេតុផលនយោបាយ នៅតែបន្តអូសបន្លាយ ដោយគ្មានដំណោះស្រាយ។ តើសាររបស់ឯកអគ្គរដ្ឋទូតអាមេរិកមានមានន័យយ៉ាងណា សម្រាប់ដោះស្រាយករណី លោក កឹម សុខា?
12 min
March 04, 2022 ហេតុអ្វីកម្ពុជាគាំទ្រអ៊ុយក្រែនប្រឆាំងរុស្ស៊ី នៅក្នុងសង្គ្រាមរុស្ស៊ី-អ៊ុយក្រែន?
ប្រទេសកម្ពុជាបានសម្រេចបោះឆ្នោតគាំទ្រអធិបតេយ្យ និងបូរណភាពទឹកដីរបស់អ៊ុយក្រែន ហើយទាមទារឲ្យរុស្ស៊ីដកកងទ័ពចេញពីអ៊ុយក្រែនជាបន្ទាន់ និងដោយគ្មានលក្ខខណ្ឌ។ មិនត្រឹមតែប៉ុណ្ណោះ កម្ពុជា ក៏បានចូលរួមជា co-sponsors ក្នុងចំណោមប្រទេស៩៤ដែរ នៃការចូលរួមផ្តួចផ្តើមសេចក្តីព្រាងនៃសេចក្តីសម្រេចចិត្តអង្គការសហប្រជាជាតិថ្កោលទោសលើការឈ្លានពានរបស់រុស្ស៊ីទៅលើអ៊ុយក្រែន។ ជុំវិញជំហររបស់កម្ពុជាដូច្នេះ អ្នកតាមដាននយោបាយ និងគណបក្សនយោបាយនានាបានបង្ហាញពីទស្សនវិស័យយូរអង្វែងមួយដ៏ត្រឹមត្រូវ និងគិតដល់ប្រយោជន៍ជាតិ។
13 min
March 03, 2022 តើកម្ពុជាពិតជាប៉ះពាល់សេដ្ឋកិច្ចពីសង្គ្រាមរុស្ស៊ី-អ៊ុយក្រែនមែនឬ?
សង្គ្រាមរុស្ស៊ី-អ៊ុយក្រែន បានបន្តអស់រយៈពេលមួយសប្តាហ៍ហើយ ដោយសង្គ្រាមនៅប្រទេសអឺរ៉ុបខាងកើតនេះ ត្រូវបានគេមើលឃើញថាបានធ្វើឲ្យប៉ះពាល់ជាទូទៅដល់ពិភពលោក។ ដោយឡែកសម្រាប់ប្រទេសកម្ពុជា ក៏ទទួលរងនូវឥទ្ធិពលនៃសង្គ្រាមនេះដែរ ដោយជាបឋមប្រមុខរដ្ឋាភិបាលកម្ពុជាបានប្រកាសកាលពីម្សិលមិញថាតម្លៃប្រេងនៅកម្ពុជាបានឡើងថ្លៃ ខណៈដែលទីផ្សារប្រេងឆៅពិភពលោក បានឡើងរហូតជាង១០០ដុល្លារក្នុងមួយបារ៉ែល។ លើសពីនេះ ប្រទេសកម្ពុជាក៏មានផលប៉ះពាល់សេដ្ឋកិច្ចរយៈពេលខ្លី និងរយៈពេលវែងដែរ ប្រសិនបើសង្គ្រាមរុស្ស៊ី-អ៊ុយក្រែន បានរាលដាល និងអូសបន្លាយដល់ប្រទេសជាសមាជិកសហភាពអឺរ៉ុប។
11 min