ព្រឹត្តិការណ៍​កម្ពុជា​ប្រចាំថ្ងៃ

កម្ពុជាទើបទទួលបានពានរង្វាន់ជាប្រទេសគោលដៅទេសចរណ៍វប្បធម៌ឈានមុខគេក្នុងតំបន់អាស៊ីសម្រាប់ឆ្នាំ២០២៣។ ពានរង្វាន់ដែលផ្តល់ដោយស្ថាប័នផ្តល់ពានរង្វាន់វិស័យទេសចរណ៍បានទទួលការសាទរ  ពិសេសពីសំណាក់ភាគីប្រតិបត្តិករក្នុងវិស័យទេសចរណ៍។ តាមប្រតិបត្តិករ កំណើនភ្ញៀវទេសចរអន្តរជាតិដែលមកកម្សាន្តក្នុងប្រទេសកម្ពុជានៅមានកម្រិតនៅឡើយ។ ដូច្នេះសួរថា តើពានអន្តរជាតិមួយនេះអាចចូលរួមជួយផ្តល់សន្ទុះដល់វិស័យទេសចរណ៍កម្ពុជាបានកម្រិតណាដែរ?

នៅ​ក្នុង​ឆ្នាំ​២០២៣​ ចំនួន​ឧកញ៉ា​នៅ​កម្ពុជា​បាន​កើន​ឡើង​ ២៤២​រូប​បន្ថែម​ ទៀត​ដែល​ ធ្វើ​ឲ្យ​ចំនួន​ឧកញ៉ាសរុប​មាន​ជាង ១៥០០​រូប​។ ​នេះបើ​តាម​សៀវ​ភៅ​រាជ​កិច្ច ​ដែល​ត្រូវ​បាន​ដក​ស្រង់​ចុះ​ផ្សាយ​ដោយ​គេហ​ទំព័រ ​«កំណត់ត្រា»​។ ​តាម​ក្រុម​អ្នក​ឃ្លាំមើល ​ក្រុម​ឧកញ៉ា​ទាំង​នេះបាន​ចូល​រួម​ចំណែក​យ៉ាង​ខ្លាំង​ក្នុង​ការ​កសាង​សេដ្ឋកិច្ច​ជាតិ ប្រសិន​បើ​ពួកគេ​រក​ស៊ី​ស្រប​ច្បាប់​។​ បើ​ធៀប​នឹង​ចំនួន​ប្រជាជន​កម្ពុជា​ប្រមាណ ​១៧​លាន​នាក់ តើ​កំណើន​ឧកញ៉ា​យ៉ាង​ច្រើន​បែប​នេះ​ឆ្លុះ​បញ្ចាំង​យ៉ាង​ណា ​ខណៈ​ដែល​មាន​ពលរដ្ឋ​ជិត​ ២០% ​រស់នៅ​ក្រោម​បន្ទាត់​ក្រីក្រ​?

ករណីចាក់ថ្មចូលក្នុងទន្លេមេគង្គក្នុងខេត្តកំពង់ចាម នៅតែជាប្រធានបទវែកញែកខ្លាំងពីសាធារណជន និងក្រុមអង្គការសង្គមស៊ីវិល ចំពោះការអនុវត្តច្បាប់លើបុគ្គលដែលបានល្មើសច្បាប់។ អ្នកការពារបរិស្ថាន និងសង្គមជំរុញឱ្យមន្ត្រីអ្នកអនុវត្តច្បាប់ដាក់ទោសលើឧកញ៉ា ទន់ ឆៃអ៊ាងដែលជាអ្នកចាក់ថ្មចូលទន្លេមេគង្គ និងមិនត្រូវឃុបឃិតគ្នាឱ្យបុគ្គលរូបនេះរួចទោសឡើយ។ បន្ថែមពីនេះ ពួកគេក៏ចង់ឃើញឧកញ៉ារូបនេះទទួលទោសដូចគ្នានឹងការដាក់ទោសលើសកម្មជនការពារបរិស្ថាន ឬពលរដ្ឋធម្មតា រួមនឹងស្នើឱ្យដកគោរមងារជាឧកញ៉ាផង ដើម្បីរក្សាភាពស្អាតស្អំដល់ឧកញ៉ាដទៃទៀត។

មួយរយៈកាលចុងក្រោយនេះ ប្រជាកសិករបានបង្ហាញក្តីបារម្ភចំពោះតម្លៃស្រូវដែលកំពុងធ្លាក់ចុះនៅលើទីផ្សារ។ ជាក់ស្តែងតម្លៃស្រូវធ្លាប់លក់បាន ១៣០០រៀលក្នុងមួយគីឡូក្រាម បានធ្លាក់មកត្រឹម៩០០រៀលក្នុងមួយគីឡូក្រាម។ ជុំវិញបញ្ហានេះ អ្នកជំនាញផ្នែកកសិកម្ម បានលើកជាយោបល់ឲ្យរដ្ឋាភិបាលទម្លាក់កញ្ចប់ថវិកា អន្តរាគមន៍ចំពោះតម្លៃស្រូវកសិករដែលកំពុងធ្លាក់ថ្លៃនេះ។

ថ្មីៗនេះ មានករណីចាក់ថ្មចូលផ្ទៃទន្លេមេគង្គជម្រៅ៥៥ម៉ែត្រស្ថិតក្នុងស្រុកស្រីសន្ធរ ខេត្តកំពង់ចាមពីបុគ្គលម្នាក់ដែលមិនស្គាល់អត្តសញ្ញាណ។ សកម្មភាពនេះត្រូវបានរដ្ឋបាលខេត្តកំពង់ចាមអះអាងថា ពុំមានច្បាប់អនុញ្ញាតទេ។ តាមសេចក្តីប្រកាសព័ត៌មានរបស់រដ្ឋបាលខេត្តនៅថ្ងៃទី២២ កុម្ភៈ អាជ្ញាធរខេត្តបានតម្រូវឱ្យម្ចាស់ដីដែលកំពុងចាក់ថ្មចូលផ្ទៃទន្លេនោះត្រូវបញ្ឈប់សកម្មភាពជាបន្ទាន់ និងត្រូវកាយថ្មចេញឱ្យអស់ក្នុងរយៈពេលកំណត់៧០ថ្ងៃ។ ចំណែកអភិបាលរងខេត្តកំពង់ចាមក៏បានបញ្ជាក់ដែរថា រដ្ឋបាលខេត្តកំពុងរៀបចំពាក្យបណ្តឹងទៅតុលាការ និងបន្តចុះពិនិត្យទីតាំងចាក់ថ្មនេះបន្តទៀត។ តែអ្វីដែលក្រុមអ្នកវិភាគចង់បានលើសពីនេះ គឺការដកមន្ត្រីនៅមូលដ្ឋានចេញពីតួនាទីដោយពួកគេយល់ថា ជាករណីឃុបឃិតរវាងម្ចាស់ដី និងអាជ្ញាធរនៅមូលដ្ឋាន៕

នៅថ្ងៃព្រហស្បតិ៍ ទី២២កុម្ភៈនេះ ប្រមុខរដ្ឋាភិបាលកម្ពុជាលោក ហ៊ុន ម៉ាណែត បានអះអាងអំពីការបន្តពង្រឹងសេវាសាធារណៈ ដោយផ្តោតទៅលើវិស័យអប់រំ និងវិស័យសុខាភិបាល។ តាមលោកហ៊ុន  ម៉ាណែតសេវាសាធារណៈទាំងពីរនេះនឹងត្រូវផ្តោតយកចិត្តទុកដាក់ចេញពីថ្នាក់មូលដ្ឋានជាមុន។ ក្រុមអ្នកតាមដានបញ្ហាសង្គមកត់សម្គាល់ថា នេះជាយន្តការល្អ  តែរដ្ឋត្រូវមានយន្តការត្រួតពិនិត្យ និងបើកទូលាយចំពោះមតិវាយតម្លៃរបស់ប្រជាពលរដ្ឋដែលទទួលសេវាទាំងនោះនៅថ្នាក់មូលដ្ឋានដូចគ្នា។

មន្ត្រីជាន់ខ្ពស់រដ្ឋាភិបាលកម្ពុជាបានអះអាងថា ក្នុងរយៈពេល៦ខែនៃការដឹកនាំរបស់រដ្ឋាភិបាលថ្មី កម្ពុជាទទួលបានលទ្ធផលផ្លែផ្កានៃការទូតសេដ្ឋកិច្ចច្រើនលើសពីការរំពឹងទុក។ នេះជាការអះអាងធ្វើឡើងនៅក្នុងសន្និសីទ​សារព័ត៌មានរបស់អង្គភាពអ្នកនាំពាក្យរដ្ឋាភិបាល ក្នុងថ្ងៃទី១៩ កុមុ្ភៈ ឆ្នាំ២០២៤។ សន្និសីទដដែលនេះ ក៏បានរំលេចផងដែរថានៅខែមករា ឆ្នាំ២០២៤ ក្រុមប្រឹក្សាអភិវឌ្ឍន៍កម្ពុជា CDC បានអនុម័តគម្រោងវិនិយោគចំនួន៣២ ដែលមានទឹកប្រាក់សរុបប្រមាណ១៨៧លានដុល្លារ និងអាចបង្កើតការងារជិត ២៩០០០កន្លែង។ តែអ្នកជំនាញសេដ្ឋកិច្ចនៅក្រៅរដ្ឋាភិបាលអះអាងថា គ្រឹះសេដ្ឋកិច្ចកម្ពុជានៅទន់ខ្សោយមិនអាចប្រឈមនឹងវិបត្តិសេដ្ឋកិច្ចសកលបានឡើយ។