Kultur

Ee jonke Lëtzebuerger Stand Up Comedian bréngt et entgéint all Erwaardunge fäerdeg, vu senger Konscht ze liewen. Viru Kuerzem hat hien seng éischt stonnelaang Solo Show. Dem Scott Reuter säi Special heescht A Threesome With Myself.

Post Punk aus Wales, an op Walisesch, proposéiert de Gudde Wëlle muer den Owend mat Adwaith. Dräi jonk Waliserinnen, déi d‘Poesie vun hirer Sprooch duerch d‘Musek wëlle weiderginn. De Marc Clement wollt méi wëssen an hat d‘Sängerin Hollie Singer an d‘Bassistin Gwen Anthony doheem zu Carmarthen ugeruff.

Wéi esou dacks gëtt de Festival de Cannes vun enger Rei Protester a Skandaler encadréiert. Gläichzäiteg gëtt de Public vu moies fréi bis owes spéit vun de Kinossäll op der Croisette verschléckt. De Jeff Schinker ass zu Cannes a liwwert eis éischt Andréck.

D’Gemeng Stroossen invitéiert op déi 12. Editioun vun hirer Biennale fir Zäitgenëssesch Konscht. Am Centre Culturel Paul Barblé fannen ënnert anerem Molereien, Skulpturen a Fotografie vun 30 Kënschtlerinnen a Kënschtler hier Plaz, an do dernieft goufen der dräi vun hinne mat engem Präis vun der Gemeng Stroossen ausgezeechent. De Joé Birchen war fir eis e puer Andréck sammelen.

Wann d’Klangkënschtler vum italieenesche Kollektiv Polisonum annoncéieren, datt si de Phänomen “Ouerewierm” an Ugrëff huele wëllen, kann een dovunner ausgoen, datt si net eng Aart Insektizid fir e Sënnesorgan entwéckelen. Di lescht Joren hunn d’Memberen, mat Hëllef vun enger spezieller Software, 10.000 musikalesch Ouerewierm, déi tëscht 2000 an 2022 erop an erof gespillt goufen, analyséiert. Interesséiert huet si zum Beispill d’Répétivitéit bei Musek an Text. Mat de charakteristeschste Schnëppel hunn si d’Soundinstallatioun “Superimposition” montéiert. An déi kënnt dir bis den 30. Juni am Cercle Cité lauschteren...a kucken! D’Kerstin Thalau am Gespréich mat den Expo-Curatricen Anastasia Chaguidouline a Francesca Ceccherini.

Gehierverbrannt - esou bezeechent den Nicolas Calmes "Trick",dat lescht Stéck vum Ian de Toffoli, dat aktuell am Kasemattentheater ze gesinn ass.Gehierverbrannt am Gudden, am Schlechten, oder Béides? Dat ass d’Fro.

De Michel Delage an de Jeff Schinker beschwätzen de Blockbuster vun der Woch - a verroden iech, ob et derwäert ass, den neie Prequel vum Planet of the Apes-Reboot kucken ze goen.

D’Luxembourg Museum Days; de Koll an Aktioun Festival; een engleschsproochegt Theaterstéck ënner der Organisatioun vum Anne Simon; an de KonschTour zu Veianen: dat a vill méi ass d’Kulturaktualitéit vun der Woch. Presentéiert vum Nicolas Calmes.

De Michel Delage an de Jeff Schinker beschwätzen de Blockbuster vun der Woch.

Et war eng enk Course tëscht der Schwäiz a Kroatien. D'Schwäiz krut am meeschte Punkte vun der Jury a Kroatien vum Public. A wouru läit et, dass Lëtzebuerg am meeschte Punkten aus Israel krut? D'Sophie Schroeder mécht ee Bilan.