Kultur

Eng aktuell Netflix-Miniserie. 1881: Den James A. Garfield gëtt éischter iwwerraschend amerikanesche President. Seng Zäit un der Spëtzt vum Land ass awer nëmme vu kuerzer Dauer, nodeems et zu engem fatalen Zesummentreffe mam Glécksritter Charles Guiteau kënnt. De Gilles Schreurs stellt déi aktuell Netflix-Miniserie vir.

London war eemol déi gréisst Hafestad vun der Welt an d’Thamse, de Floss deen duerch d’Stat leeft, huet dausende vu Joren Mënschheetsgeschicht materliewt. Och haut nach ginn Objeten aus der Vergaangenheet un d’Ufer gespullt. Dat zitt dann och Schatzsicher un. D’Claire Barthelemy bericht vu London.

Nieft dem Temple of Metal a gudde Concerten, déi zum Deel och vum Atelier organiséiert ginn, huet d’Rockhal och nach eng Programméierung, déi aus Tribute-Bands, Balleten oder de Chippendales besteet. De Jeff Schinker, deen alles, awer kee Fan vum spéide Coldplay-Wierk ass, war sech de Coldplay-Tribute-Owend vun der däitscher Coverband A Sky Full of Stars an d’Rockhal ukucken - a féiert eis net just duerch säin Owend, mee och duerch eng méi philosophesch Approche vun der Tribute Band.

De Stater Conservatoire soll fir déi nächst Rentrée am September 2026 eng nei Direktioun kréien. De Marc Meyers huet nämlech gëschter annoncéiert, datt hie säi Posten als Direkter op den 1. September d’nächst Joer opgëtt. No 15 Joer un der Spëtzt wéilt hien d’Direktioun enger neier Generatioun iwwerloossen, seet de Marc Meyers am 100,7-Interview.

Et ginn Nouvellë vu Lët‘z Arles, also vun der ASBL, déi sech zanter 10 Joer dofir asetzt, datt op de renomméierte Rencontres de la photo vun Arles Lëtzebuerger Fotokonscht eng Plaz huet. Lët’z Arles vergi jo ewell zwee Luxembourg Photo Awards, kuerz LUPA: den Haapt-LUPA beinhalt eng Ausstellung wärend de Rencontres zu Arles; un de LUPA Mentorship ass eng Kënschtler:inne-Residenz zu Arles plus en Encadrement duerch Profie gekoppelt. And the LUPA Mentorship 2026 goes to ... Néckel Scholtus, Fotografin a -Pedagogin, 1982 zu Esch gebuer. D’Kerstin Thalau huet virun eiser Kulturen-Emissioun mat der frëschgebakener Laureatin geschwat.

"Christmas à la Hollywood". De Chrëschtconcert vun de Solistes Européens, Luxembourg (SEL) de 15. Dezember an der Philharmonie huet geliwwert, wat e versprach huet: en Owend voller festlecher Musek fir a Chrëschtdagsstëmmung ze kommen. De Christoph König, Chefdirigent vun den SEL, ass selwer e grousse Fan vum Kitsch a vu Chrëschtdag, an huet e Programm op d'Bee gestalt, dee klassesch Wierker wéi dem Tschaikowski seng “Nussknacker Suite” mat amerikaneschen Hits vum Leroy Anderson verbënnt. Säi Wierk "The Typewriter" ass weltberüümt a bréngt och bei dësem Concert d'Nolauschterer an d’Nolauschterinnen zum Laachen. E Concert, dee vun Ufank bis Schluss wéi eng richteg Christmas Show ass!

Dir kënnt en nach bis de 14. Januar 2025 an der Mediathéik vum Opus op opus.radio lauschteren, fir a Chrëschtdagsstëmmung ze kommen oder ze bleiwen.

A siwen Erzielungen erlaabt de Jean-Paul Maes en Abléck a Liewensepisode vu Mënschen, déi u sech ganz gewéinlech sinn. Onerwaart Situatioune bréngen hiren Alldag aus dem Konzept a jidderee geet mat esou Momenter an de Konsequenzen anescht ëm. D'Valerija Berdi an de Michel Delage hunn dem Jean-Paul Maes säi Buch "De Léiw gëtt rout" (Kremart Editions) gelies.

Den Iwwerbléck vun der aktueller Filmprogrammatioun mam Michel Delage

De Michel Delage an d'Vesna Andonovic beschwätzen dem Chinees Bi Gan säin neie Film, e Fantasiewierk tëschent Dram a Realitéit.

"Ich mag Weihnachtsstimmung und auch ein bisschen Weihnachtskitsch", seet de Christoph König, Chefdirigent vun de Solistes Européens, Luxembourg (SEL). Haut den Owend, 15.12., triede si ënner dem Motto "Christmas à la Hollywood" an der Philharmonie op. An Dir kënnt de Concert um hallwer 8 live um Opus iwwer DAB+ oder online op opus.radio an um Radio 100,7 lauschteren.

En ongewéinlecht Instrument

Um Programm stinn nieft der berüümter Suite aus dem “Nussknacker” vum Tschaikowski och Wierker, déi deene meeschte Klassik-Fans vläicht net ganz bekannt sinn an awer ëmmer iwwerall ze héiere sinn. Et si Chrëschtwierker vum Leroy Anderson. Dat Bekanntsten ass wuel säin "The Typewriter", bei deem net nëmmen den Orchester Musek mécht, mee och eng Schreifmaschinn.

Matsangen erlaabt

Dat Besonnescht bei dësem Concert ass, datt de Public bei de Chrëschtlidder deels matsange kann. Et gëtt e Concert voller beréierender Musek, bei deem richteg Chrëschtstëmmung opkënnt. Weider Abléck an de Programm gëtt den Dirigent Christoph König am Harmonesche Moien.

Programmm:

Engelbert Humperdinck: Hänsel et Gretel, Prélude

Piotr Illitch Tchaïkovski: Nussknacker-Suite, op.71a

Leroy Anderson: Greatest Hits

Sandpaper Ballett

Sleigh Ride

A Trumpeter’s Lullaby

Jazz Pizzicato

Forgotten Dreams

Fiddle-Faddle

The Typewriter

The Syncopated Clock

Belle of the Ball

The Waltzing Cat

Bugler’s Holiday

Interpreten:

Solistes Européens, Luxembourg

Christoph König, Direktioun

Den Opus iwwerdréit dëse Concert Live, de 15. Dezember 2025 um 19:30 Auer. Rediffuséiert gëtt de Concert de 26. Dezember um 8 Auer an en ass bis de 14. Januar 2026 an der Mediathéik op www.opus.radio disponibel.