Í þessari viku eru 20 ár frá því að íslensk þýðing á fyrstu Harry Potter bókinni var gefin út á Íslandi. Við ræðum við þýðanda bókarinnar, Helgu Auðardóttur.

Og það verður meiri fjölkynngi í þætti dagsins. Tómas Ævar Ólafsson pistlahöfundur Lestarinnar er handviss um að langvinn flensa sem hann lagðist í á dögunum sé til komin vegna bölvunar sem lögð var á hann. Í pistli dagsins prófar Tómas sig áfram með galdra - hann er kominn í kuklið.

Við höldum áfram að skoða fyrirbærið innblástur hér í Lestinni á miðvikudögum. Að þessu sinni ræðir Anna Gyða við Hjalta Jón Sverrisson, prest í laugarneskirkju, sem fær innblástur frá skjólstæðingum sínum, til að mynda verðandi brúðhjónum.

En við byrjum á tónlist. Hún inniheldur ekkert blót eða klámyrði en þess meira af guði og gospel. Hún er níunda plata Kanye West til að komast í fyrsta sæti Billboard listans strax við útgáfu en hún er gríðarlega umdeild, ekki síst meðal annarra trúrækinna svartra Bandaríkjamanna. Hún átti að heita Yhandi en heitir þess í stað Jesus is King.

Við heimsækjum sýningu myndlistarkonunnar Berglindar Ágústsdóttur, La Luna es mi Amiga - Tunglið er vinkona mín - sem hún vinnur út frá ævintýralegu ferðalagi um Perú í Suður Ameríka. Kaþólsk gleði, töfralyf og brosandi fjöll koma meðal annars við sögu

Halldór Armand Ásgeirsson flytur pistil í Lestinni á þriðjudegi, og fjallar að þessu sinni um ókeypis drasl.

Miklar deilur hafa sprottið upp vegna beinskeyttrar ræðu danska rithöfundarins Jonas Eika þegar hann hlaut bókmenntaverðlaun Norðurlandaráðs í síðustu viku. Þar gagnrýndi hann stefnu danmerkur og annarra norðurlanda í flóttamannamálum. Við kynnum okkur Eika og flóttamannamálin í Lestinni í dag

Í bókinni Leitin að tilgangi lífsins segir austurríski sálfræðinginn og geðlækninn Viktor Frankl frá upplifnum sínum sem fangi í útrýmingarbúðum nasista og þeim lærdómum sem hann dró af reynslunni um mannssálina og tilgang tilverunnar. Gunnlaugur Jónsson, framkvæmdatjóri Fjártækniklasans, segir frá bókinni, sem hann álítur að varpi áhugaverðu ljósi á heiminn.

Klónanir hafa verið í umræðunni undanfarnar vikur vegna frétta um klónun fyrrverandi forsetahunds þjóðarinnar, Sáms. Klónanir eru einmitt viðfangsefni nýrra gamanþátta frá Netflix, Living with yourself, Paul Rudd leikur meðaljón sem ákveður að verða að betri manni - með því að láta klóna sig. Áslaug Torfadóttir rýnir í tvöfaldan Paul Rudd í þætti dagsins.

Lestin rennir líka við á gömlu almenningssalerni og ræðir við myndasöguhöfunduna Ægi Má og Björn Heimi Önundarson, um nýútgefna bók Áskell Jónsson tekst á við tæpa frændann, og stöðuna í íslensku myndasögusenunni

Tónlistarkonan Jelena Ciric flytur sitt fjórða og síðasta innslag um tónlistarfólk sem er staðsett á milli tveggja menningarheima, blandað tónlistarfólk. Að þessu sinni spjallar hún við Loga Pedro Stefánsson, en þau eiga að ýmislegt sameiginlegt.

Það er hrekkjavökustemning í Lestinni í dag. Gunnar Theodór Eggertsson rýnir í tvær nýjar kvikmyndir í þætti dagsins, annars vegar nýja tölvuteiknimynd um Addams-fjölskylduna ,og hins vegar gay-splatter-vampírumyndina Þorsta eftir Steinda Jr., Gauk Úlfarsson og leikhópinn X.

Tónlistarhátíðin Iceland Airwaves hefst í næstu viku. Tugir erlendra listamanna koma fram á hátíðinni auk fjölmargra heimamanna. Það er ærið verkefni að kynna sér alla þá tónlistarmenn sem koma fram og finna það besta og áhugaverðasta. Davíð Roach Gunnarsson, tónlistargagnrýnandi, sparar hlustendum vinnuna og segir frá nokkrum af mest spennandi listamönnunum sem koma fram á Iceland Airwaves í ár.

Á morgun kemur út fyrsta breiðskífa hljómsveitarinnar Une Misére, Sermon, plata sem þungarokksaðdáendur hafa beðið eftir með öndina í hálsinum. Jón Már Ásbjörnsson, söngvari, og Gunnar Ingi Jones, gítarleikari, stíga um borð í Lestina í dag og ræða um fegurðina í eymdinni.

Og Lestin heldur áfram að rifja upp ris og fall McDonald's í örseríunni Mc' blessi Ísland. Tilefnið er sá áratugur sem liðinn er frá því að skyndibitarisinn yfirgaf landið. Í dag höldum við í ferðalag í leit að 10 ára gömlum hamborgara.

633 börn, þar af 66 ein síns liðs sóttu um alþjóðlega vernd á Íslandi á árunum 2016 til 2018. Að undanförnu hafa Unicef og vöruhönnuðrinn Búi Bjarmar Aðalsteinsson, skoðað hvernig staðið er að móttöku flóttabarna hér á landi út frá sjónarhóli barnanna sjálfra. Búi Bjarmar verður í Lestinni í dag.

Galdrar og álög eru allt í kringum okkar. Tómas Ævar Ólafsson pistlahöfundur Lestarinnar er til að mynda handviss um að langvinn flensa sem hann lagðist í á dögunum sé til komin vegna bölvunar sem var lögð á hann.

Við höldum áfram að skoða fyrirbærið innblástur hér í Lestinni á miðvikudögum. Að þessu sinni ræðir Anna Gyða Sigurgísladóttir við Sunnu Ástþórsdóttur, verkefnastjóra hjá Nýlistasafninu um hvað fyllir hana innblæstri og hvernig þetta merkilega fyrirbæri lýsir sér.

Þá er þriðji hluti örseríunnar Mc'blessi Ísland að sjálfsögðu á sínum stað í tilefni af 10 ára ártíð McDonald's. Í dag er sjálft hamborgarahrunið tekið fyrir, þar sem skyndibitarisinn riðaði til falls og íslenskur hálfbróðir, Metro, kom í hans stað.

Þann 29. október 1969, fyrir nákvæmlega 50 árum síðan, voru fyrstu skilaboðin send milli tveggja tölva á vesturströnd Bandaríkjanna yfir hið svokallaða ARPAnet. Þetta tölvunet á vegum Bandaríkjahers var forveri og fyrsti vísirinn að því interneti sem við þekkjum í dag. Í Lestinni í dag kynnum við okkur söguna af upphafi internetsins. Sæmundur Þorsteinsson, lektor við rafmagns- og tölvuverkfræðideild Háskóla Íslands, hjálpar okkur að skilja þessa áhugaverðu sögu.

Lestin heldur áfram að rifja upp ris og fall McDonald's í örseríunni Mc' blessi Ísland. Tilefnið er sá áratugur sem liðinn er frá því að skyndibitarisinn yfirgaf landið en að þessu sinni verður litið til tímabilsins inn á milli upphafs og endis, þar sem reksturinn gekk sinn vanagang. Við beinum kastljósinu að starfsfólkinu.

Ný plata Kanye West, Jesus is King, er komin út eftir langa bið. Platan tók óvænta stefnu, átti upprunalega að heita Yhandi en þegar trúarhiti tók að færast í rapparann breyttist hún í óð til almættisins.

Og Halldór Armand Ásgeirsson flytur að venju pistil á þriðjudegi, og að þessu sinni fjallar hann um 400 ára gamalt skáldverk, grátklökkann forsætisráðherra og tekur til varna fyrir depurðina.

Á föstudag eru 10 ár liðin frá því að McDonald?s lagði upp laupana á Íslandi. Ástæðan var sögð bág staða krónunnar í kjölfar hruns og almenningur tók brotthvarf skyndibitarisans nærri sér - upplifði það sem enn annað höggið í þá þegar laskað þjóðarstoltið. Við gátum ekki rekið banka, og nú gátum við ekki einu sinni rekið McDonald?s! Margir vonuðu eflaust að aðeins væri um tímabundin aðskilnað að ræða en nú, tíu árum síðar hafa Big Mac og félagar enn ekki snúið aftur. Á næstu dögum lítur Lestin yfir söguna, upprunan, áhrifin og endalokin í fjögurra hluta örseríunni Mc?blessi Ísland.

Rokkhljómsveitin Grísalappalísa kom eins og stormsveipur inn í íslenskt tónlistarlíf árið 2012 með hreissilegum súrkálsrokkbræðingi og bókmenntalegum textum um óheflaðar tilfinningar og villt líferni. Síðar í vikunni kemur út þriðja hljóðversplata septetins, Týnda Rásin, en hún verður sú síðasta áður en Grísalappalísa leggur upp laupana. Lestin brunar inn á týndu rásina með Grísalappalísu, Gunnar Ragnarsson, söngvari, og Tumi Árnason, saxófónleikari, verða leiðsögumenn okkar.

Marta Sigríður Pétursdóttir rýnir í pólsk-íslensku heimildamyndina In Touch, sem gefur okkur merkilega innsýn í líf fólks í litlum bæ í norðaustur Póllandi, en um þriðjungur íbúanna, 400 manns, hefur flust búferlum til Íslands á undanförnum árum og áratugum. Það er ekki síst tengslin og tengslaleysið við hina brottfluttu sem fjallað er um í þessari athyglisverðu heimildarmynd.

Jelena Ciric heldur áfram að fjalla um tónlistarmenn af blönduðum uppruna en þennan mánudaginn tekur hún fyrir Lorely Rodriguez. Rodriguez er alin upp í Bandaríkjunum en móðir hennar er frá Hondúras. Þessir ólíku menningarheimar mætast í raftónlist hennar sem hún semur undir listamannsnafninu Empress of

Fyrr í vikunni var nýr keisari krýndur í Japan. Aki­hito keis­ari, sagði sig frá völd­um í apríl síðastliðnum og sonur hans Naruhito tekur nú við. Hátíðin fór fram eftir árþúndagömlum hefðum með ýmis konar táknum og ritúölum. Sakauppgjöf, umræður um kynjajafnrétti og frestaðar skrúðgöngur vegna fellibyls hefur verið meðal þess sem hefur einkennt krýninguna að þessu sinni. Í Lestinni í dag hringjum við til Japan og fræðumst um japanska keisarann og þessa veglegu athöfn. Kristín Ingvarsdóttir, lektor í japönskum fræðum við Háskóla Íslands, er í Tokyo.

Við kynnum okkur deilur um Libra, nýjan gjaldmiðil sem Facebook ætlar að setja í loftið á næstunn, og athyglisverðar umræður í þingnefnd Bandaríkjaþings um málið.

Tilvistarkreppa mæðgna á Akranesinu er viðfangsefni nýrrar íslenskrar kvikmyndar, Agnes Joy eftir Silju Hauksdóttur. Kvikmyndagagnrýnandi Lestarinnar, Marta Sigríður Pétursdóttir, rýnir í myndina.

Bandaríska tónlsitarkonan Lana Del Rey gaf út nýja plötu nú í haust. Norman Fucking Rockwell heitir platan og hefur fengið prýðilegar viðtökur. Davíð Roach Gunnarsson hefur verið að hlusta og fjallar um plötuna í þætti dagsins.

Persóna Freyju Haraldsdóttur hefur tekið á sig ýmsar myndir í fjölmiðlum. Henni hefur verið stillt upp sem fórnarlambi. Henni hefur verið hampað fyrir það að vera "dugleg". Hún er einnig reglulega máluð litum frekjunnar. Mál hennar gegn Barnaverndarstofu, um rétt hennar til að fá hæfi sitt sem mögulegt fósturforeldri meta, var flutt fyrir hæstarétti í dag. Hún lítur á afstöðu Barnaverndarstofu sem hæfishroka, og það gerir líka hópur fatlaðra mæðra sem mætti í dómssal í dag til að sýna henni stuðning. En hvað er hæfishroki og hvernig birtist hann í fjölmiðlum?

Tómas Ævar Ólafsson pistlahöfundur hefur ekki verið með okkur hér í Lestinni undanfarnar vikur. Hann hefur verið með flensu, verið með ýmsa dularfulla kvilla sem hann finnur engar skýringar á - nema kollegi hans hafi rétt fyrir sér og þetta er hreinlega bölvun sem hefur verið lögð á hann.

Og við höldum áfram að fræðast um það sem fyllir fólk eldmóði og innblæstri þessa dagana. Viðmælandi Önnu Gyðu Sigurgísladóttur þessa vikuna er Viðar Eggertsson, leikstjóri, leikari, útvarpsmaður og eldri borgari í þjálfun. Hann segir frá því hvernig hann upplifir innblástur þessa dagana.

En við byrjum í Evrópu. Allt það besta og áhugaverðasta sem er að gerast í útvarpi og hlaðvarpi í Evrópu var verðlaunað á evrópsku ljósvakahátíðinni Prix Europa sem fór fram í Þýskalandi fyrr í mánuðinum. Íslenska útvarpsleikritið Sol hlaut meðal annars þriðju verðlaun í flokki útvarpsskáldsskapar. Þorgerður E. Sigurðardóttir, útvarpsleikhússtjóri, er gestur Lestarinnar í dag.

Halldór Armand Ásgeirsson flytur að venju pistil í Lestinni á þriðjudegi og fjallar í dag um niðurskurð og hagræðingu. Meðal þess sem hann snertir á pistlinum er Jókerinn, Thomas Picketty og niðurskurður á stafrófinu.

„Kvikmyndahús eru orðin að skemmtigörðum,“ sagði hinn virti bandaríski kvikmyndaleikstjóri Martin Scorcese á dögunum og gagnrýndi bíómyndir Marvel-myndasögurisans harkalega. Orð leikstjórans hafa kveikt heitar umræður á netinu um gildi og gæði ofurhetjukvikmynda sem hafa verið áberandi í kvikmyndahúsum undanfarinn áratug. Í Lestinni í dag verður spurt hvort Scorcese hafi eitthvað til síns máls, eða hvort þetta sé bara nöldur í gömlum karli? Ásgrímur Sverrisson og Gísli Einarsson takast á um gildi og gæði Marvel-kvikmyndanna - og þeim er heitt í hamsi.

Og við höldum á söguslóðir. Hressingarskálinn við Austurstræti var reistur árið 1805 og var þá kallað „svenska húsið.“ Síðan þá hefur ýmisstarfssemi verið rekin í húsinu - það hefur verið embættisbústaður, kaffihús og McDonalds - en nú vonast nýjir eigendur til að það muni glæða íslenska tónleikamenningu lífi.