Miðvikudagurinn 21. ágúst:

Skólinn, Vg, hinsegin bækur, ME-sjúkdómur, Frosti & Smári

Þórdís Sigurðardóttir sem veitir Miðstöð menntunar og skólaþjónustu forstöðu tekur undir margt af þeirri alvarlegu gagnrýni sem komið hefur fram á grunnskólakerfið. Sigurjón Magnús Egilsson ræðir við Orra Pál Jóhannsson þingflokksformann um Vg. Rithöfundarnir Kristín Ómarsdóttir og Halla Þórlaug Óskarsdóttir segja frá Queer bókmenntahátíð og Helga Edwardsdóttir varaformaður ME félagsins segir frá þessum sjúkdómi og ráðum við honum. Í lokin spilum við viðtal Frosta Logasonar við Gunnar Smára Egilsson um efnahagsmál og kynusla.

Þriðjudagurinn 20. ágúst

Borgin, áfengi, kyn, kona í buxum og víkingar

Sanna Magdalena Mörtudóttir borgarfulltrúi ræðir samband stjórnmála og áfengis en mörgum finnst þörf á bragarbót. Alex Diljar Birkisbur Hellsing, Veiga Grétarsdóttir Sulebust, Kitty Anderson og Una Theodór Braga ræða hvað er kyn fyrir einstaklingum og samfélagi. Auður Styrkársdóttir segir okkur frá Þuríði formanni, sem var kona í karlmannsbúningi. Og Guðrún Dröfn Whitehead lektor í safnafræði við Háskóla Íslands hefur skrifað bók þar sem hún leitar svara við því.

Mánudagurinn 19. ágúst

Áfengi og pólitík, Gaza, stjórnsýslan og þátttaka í lýðræðinu

Jódís Skúladóttir þingmaður VG varpar sprengju í umræðuna og upplýsir að hún hafi gert athugasemd innan forsætisnefndar Alþingis vegna drykkju þingmanna við þinglok í vor. Magga Stína segir fréttir af Gaza og Þorvaldur Ingi Jónsson, þrautreyndur ríkisstarfsmaður segir mikla sóun eiga sér stað í stjórnsýslunni og að spara mætti stórfé með betri vinnubrögðum. Ole Anton Bieltvedt kaupsýslumaður og dýraverndarsinni skrifar oft greinar um samfélagsmál. Hann kemur til okkar og segir hvers vegna.

Sunnudagurinn 18. ágúst:

Synir Egils: Óvinsæl ríkisstjórn veikra flokka, verðbólga og okurvextir

Bræðurnir Sigurjón Magnús og Gunnar Smári Egilssynir taka á móti gestum og ræða við þá um helstu fréttir og pólitíkina. Að þessi sinni koma þau Drífa Snædal, talskona Stígamóta, Katrín Júlíusdóttir, fyrrverandi ráðherra og Þórður Snær Júlíusson, fyrrum ritstjóri Heimildarinnar og ræða veika stöðu stjórnarflokkanna og forystukreppu innan þeirra, helstu verkefni stjórnmálanna í vetur, harðnandi tón í kjaramálum lækna, kennara og annarra menntaðra stétta, viðvarandi verðbólgu og háa vexti. Á eftir taka þeir bræður stöðuna á pólitíkinni.

Laugardagurinn 17. ágúst

Helgi-spjall: Erpur

Erpur Eyvindarson kemur í helgi-spjall við Rauða borðið og segir okkar frá því hvernig hann varð sá sem hann er; frá ætt sinni og uppruna, fjölskyldu og vinum, kynslóð og Kópavogi og þeim þráðum sem mynda þann sem hann er í dag.

Föstudagur 16. ágúst

Heimsmyndir - Svanhildur Tinna Ólafsdóttir

Svanhildur Tinna Ólafsdóttir barnasálfræðingur kom í þáttinn að ræða heimsmynd barna á einhverfurófinu. Félagslegur veruleiki fólks sem af einhverjum ástæðum á erfitt með samskipti. Hver er hann og er það að einhverju marki spurning um viðhorf og þjálfun? Svanhildur varpaði ljósi á þær spurningar.

Föstudagurinn 16. ágúst

Vikuskammtur: Vika 33

Í Vikuskammt við Rauða borðið koma í dag þau Almar Blær Sigurjónsson leikari, Esther Bíbí Ásgeirsdóttir bassaleikari og safnvörður, Þorbjörn Rúnarsson tenór og kennari og Þorgerður María Þorbjarnardóttir formaður Landverndar og ræða fréttir vikunnar sem einkenndust af því að sumarleyfin eru að klárast og daglegt líf að finna venjubundnari takt og átökin um grundvallarmál samfélagsins að brjótast fram.

Mánudagur 15. ágúst

Grimmi og Snar - #21 Auðmýktin er kannski einn af stóru skiptilyklunum 🔧

Talnaspekingurinn 6️⃣1️⃣🔢8️⃣ Estrid Þorvaldsdóttir kom í Grimma og Snar. Rætt var um: Hvað vil ég, auðmýkt, Gaba og Gabor. Grimmi og Snar voru á einlægu nótunum 🥺

Rauða borðið: Ungt fólk, Gaza, vanlíðan, vindmyllur og fyndni

Í Rauða borði kvöldsins ræðir Björn Þorláksson við Gunnhildi Fríðu Hallgrímsdóttur varaþingmann og Harvard-nema í hagfræði sem útilokar ekki að íslensk efnahagsstjórn kunni að vera sú versta í heimi.

Magga Stína segir okkur fréttir frá Gaza og Grímur Atlason framkvæmdastjóri Geðhjálpar mætir til skrafs við Björn og Steinunni Ólínu um geðheilbrigði ungmenna sem er framhald af umræðu Samstöðvarinnar sem hófst í vikunni um stöðu og líðan ungs fólks í landinu. Halla Hrund Logadóttir orkumálastjóri kemur síðan til okkar og ræðir kosti og galla vindorkugarða á Íslandi. Hún er sammála Landvernd um að klára þurfi stefnumótun og að tímaröð framkvæmda þeirra sem fyrirhugaðar eru kunni að vera röng. Að lokum ræðir Gunnar Smári við sagnfræðinginn og rithöfundinn Þórunni Valdimarsdóttur en á dögunum komu út eftir hana ljóðabók og önnur merk bók um það kostulega en rannsóknarverða fyrirbæri, íslenska fyndni.

Fimmtudagur 15. ágúst

3. þáttur - Katrín Harðar og Hjálmtýr Heiðdal

Í þriðja þætti Útvarps Palestínu fá Magga Stína og Sara Stef til sín Katrínu Harðardóttur, aðgerðarsinna og Hjálmtý Heiðdal, formann félagsins Ísland-Palestína sem hafa, hvor á sinn hátt, veitt stjórnvöldum viðnám og gert kröfu um að þau beiti sér skv. þeim alþjóðasáttmálum sem Ísland er aðili að. Þau hafa líka skipulagt mótmælagöngur og sniðgönguherferðir þar sem almenningi er gert kleyft að tjá óánægju sína en frá 7. október hefur orðið ljóst að meirihluti íslensku þjóðarinnar stendur með Palestínu.