Komiði sæl og velkomin að Speglinum. Arnhildur Hálfdánardóttir er umsjónarmaður.

Hæstiréttur segir eigendur HD verks ekki hafa gert nægjanlega grein fyrir hvers vegna þeir hafa selt stærstan hluta fasteigna sinna eftir brunann á Bræðraborgarstíg í fyrra. Dómurinn staðfesti í dag að kyrrsetja ætti eignir fyrirtækisins vegna skaðabótakröfu eftirlifenda og aðstandenda þeirra sem fórust.

Samþykki Umhverfisstofnun nýtt starfsleyfi lyftæknifyrirtækisins Ísteka verða fylfullar blóðmerar fjórfalt fleiri en nú.

Umboðsmaður Alþingis brýnir mennta- og barnamálaráðherra til að kanna hvort reglur um heimildir og verklag varðandi svokölluð einveruherbergi í grunnskólum séu nægilega skýrar.

Indverskir bændur eru formlega hættir eins árs mótmælum gegn umbótaáformum stjórnvalda sem þeir segja að hefðu komið stórfyrirtækjum til góða.

Lengri umfjallanir:

Jólaboð frá í fyrra er enn efst á baugi í breskum stjórnmálum. Í fyrirspurnartíma forsætisráðherra í gær kom á óvart að forsætisráðherra baðst afsökunar á myndbandi samstarfsfólks síns. Tárvot afsögn aðalpersónunnar þar, fyrrum talsmanns forsætisráðherra, er engin sögulok. Óvæntar Covid reglur í Englandi áttu kannski að leiða athyglina frá jólaboðinu en tókst ekki. Í morgun eignaðist forsætisráðherra barn, að öllum líkindum sjöunda barn hans og fjármögnun á forsætisráðherraíbúðinni, enn eitt mallandi mál, tengt forsætisráðherra kom aftur í fréttaveltunni. Sigrún Davíðsdóttir segir frá.

Hættan á því að þú eða ég fái krabbamein er minni en hún var og batalíkur þeirra sem greinast meiri. Á móti kemur hækkandi meðalaldur þjóðarinnar. Á næstu 15 árum er útlit fyrir að krabbameinstilvikum fjölgi um tæpan þriðjung. Forsvarsmenn Krabbameinsfélagsins segja löngu tímabært að stjórnvöld bregðist við og fjármagni stefnu til framtíðar. Arnhildur Hálfdánardóttir ræðir við Höllu Þorvaldsdóttur, framkvæmdastjóra Krabbameinsfélags Íslands og Laufeyju Tryggvadóttur forstöðumann rannsókna- og skráningaseturs félagsins.

Þriðjungur af veltu á bókamarkaði skrifast á hljóðbækur. Stjórnarformaður Forlagsins telur að hefðbundnar bókaútgáfur hafi sofið á verðinum, líkt og plötuútgáfurnar gerðu margar þegar streymisveiturnar tóku völdin á tónlistarmarkaðnum. Anna Kristín Jónsdóttir ræðir við Halldór Guðmundsson, rithöfund og stjórnarformann Forlagsins.

Fyrrverandi stjórnarmaður KSÍ hefur beðist afsökunar á að hafa farið með rangt mál í skýrslu um ofbeldi innan knattspyrnuhreyfingarinnar.

Ráðgjafi forsætisráðherra Bretlands hefur sagt af sér eftir að myndskeið birtist í fjölmiðlum þar sem hún grínaðist með jólasamkvæmi sem haldið var í Downingstræti 10 í fyrra, þegar strangar fjöldatakmarkanir voru í gildi.

Um 300 eru heimilislausir í Reykjavík sem er fækkun frá fyrri árum. Átta eru á vergangi við slæmar aðstæður.

Fræðimaður sakar seðlabankastjóra um ritstuld. Hann hafi stuðst mjög við fimm ára gamla bók um landnám Íslands án þess að geta heimilda. 

Bólusetning er ekki ný af nálinni hér á landi. Sölvi Helgason var t.d. bólusettur norður í Skagafirði fimm ára gamall, fyrir tæpum tvö hundruð árum.

Lengri umfjallanir:

Þrjátíu ár eru liðin frá falli Sovétríkjanna. Rússnesk kona sem fæddist eftir hrunið segir margt af því slæma sem einkenndi Sovétríkin eiga sér samsvörun í stefnu Pútíns í dag.

Nýgengi sykursýki 2 hefur rokið upp á Íslandi undanfarin ár. Óvissa ríkir um hvernig heilsufar þjóðarinnar og lífslíkur eiga eftir að þróast næstu árin því rannsóknir skortir.

Spegillinn 7. desember 2021

Umsjón: Kristján Sigurjónsson

Tæknimaður: Markús Hjaltason

Nefnd sem kannað hefur viðbrögð Knattspyrnusambands Íslands vegna kynferðisofbeldismála sem tengdust landsliðsmönnum gagnrýnir tvo fyrrverandi formenn sambandsins en telur viðbrögð annarra stjórnar- og starfsmanna ekki bera einkenni þöggunar.

Aðkoma stjórnvalda í húsnæðismálum og að halda verðbólgu í skefjum eru brýnustu verkefnin í aðdraganda kjaraviðræðna á næsta ári. Þetta segir Drífa Snædal forseti Alþýðusambands Íslands.

Starfshópur sem innanríkisráðherra hefur skipað á að greina eðli starfsemi vistheimilisins á Hjalteyri og hvernig eftirliti var háttað.

Hanna Katrín Friðriksson þingflokksformaður Viðreisnar segir að menn verði að vera samstíga um framhaldið í raforkumálum með ólíka hagsmuni að leiðarljósi, það er náttúruverndina og þeirra sem þurfi á orkunni að halda. Það sé ekki hægt að eyða fleiri árum eða kjörtímabilum í að rífast um hlutina.

Þingmenn Grænlendinga á danska þinginu hafa lýst ánægju með að gert er ráð fyrir auknum útgjöldum til félagsmála á Grænlandi í samkomulagi um fjárlög Danmerkur.

Hlutur íslenskra jólatrjáa eykst jafnt og þétt í jólaversluninni

Lengri umfjöllun.

Tveir fyrrverandi formenn Knattspyrnusambands Íslands eru gagnrýndir í skýrslu sérstakrar nefndar um viðbrögð og málsmeðferð KSÍ vegna kynferðisofbeldismála sem tengdust landsliðsmönnum. Ekki er talið að aðstæður innan sambandsins hamli þátttöku kvenna í starfseminni en hvatt til þess að leitað verði leiða til að leiðrétta kynjahallann sem á henni er. Nefndin var skipuð af Íþrótta- og ólympíusambandi Íslands í haust að beiðni KSÍ og kynnti hún niðurstöður sínar í dag. Kjartan Bjarni Björgvinsson héraðsdómari og formaður nefndarinnar sagði að hún hefði fengið óheftan aðgang að skjalasafni sambandsins, skoðað hundruð skjala og tölvupósta og rætt við rúmlega 50 manns sem hafa starfað eða setið í stjórn KSÍ og tugi annarra sem tengjast atburðunum sem skoðaðir voru. Enginn hefði skorast undan að tala við nefndina eða veita henni gögn. Hann þakkaði sérstaklega þeim sem hefðu deilt með nefndinni frásögnum af kynferðislegu eða kynbundu ofbeldi, það hefði ekki verið þeim auðvelt og krafist hugrekkis. Kynferðisofbeldi lægi oft í þagnargildi því fólk treysti sér ekki til að segja frá af ótta við viðbrögðin. Flutt brot af kynningfundi nefndarinnar þar sem heyrist í Kjartani, Rán Ingvarsdóttur og Hafdísi Kristjánsdóttur nefndarmönnum. Anna Kristín Jónsdóttir tók saman.

Aðkoma stjórnvalda í húsnæðismálum og að halda verðbólgu í skefjum eru b

Spegillinn 6.desember

Umsjón: Kristján Sigurjónsson

Tæknimaður: Mark Eldred

Rennsli og rafleiðni í Gígjukvísl heldur áfram að minnka. Fluglitakóði var í dag færður frá gulum í appelsínugulan vegna aukinnar virkni eldstöðvar og möguleika á eldgosi.

Einn þyngsti dagur vetrarins á bráðamóttöku Landspítalans var í dag. Fjölmargir leituðu þangað eftir að hafa dottið illa í hálku.

Rauð veðurviðvörun hefur verið gefin út á hluta Írlands vegna óveðurslægðarinnar Barra sem fer yfir Bretlandseyjar á morgun og miðvikudag. Viðbúnaður er einnig í Bretlandi.

Eitt stærsta úrlausnarefni komandi kjaraviðræðna er hvernig bilið verði brúað á milli þeirra atvinnugreina sem farið hafa illa út úr faraldrinum og hinna sem betur standa. Þetta segir framkvæmdastóri Samtaka atvinnulífsins.

Formlegar viðræður um sameiningu Langanesbyggðar og Svalbarðshrepps hefjast senn.

Barnafjölskyldur á Íslandi fá minni fjárhagslegan stuðning en í flestum vestrænum hagsældarríkjum. Þetta sýna ný gögn frá OECD sem birt voru í Kjarafréttum Eflingar í dag.

Heilbrigðisráðherra Noregs, kynnir á morgun hertar sóttvarnaaðgerðir vegna fjölgunar kórónuveirusmita að undanförnu.

Bæjarráð Akureyrarbæjar hefur samþykkt lántöku á fyrsta græna láni sveitarfélagsins. Lánið er ætlað til umhverfisvænna fjárfestinga.

Lengri umfjöllun:

Grímsvötn gjósa mjög oft en oftast eru gosin frekar lítil og fylgja ekki hamfarir - frekar að jökulhlaup úr þeim hafi valdið skaða á Skeiðarársandi, segir Þorvaldur Þórðarson eldfjallafræðingur. Náið er nú fylgst með Grímsvötnum en hlaup úr þeim er í rénun. Í morgun var þar nokkur skjálftavirkni, stærsti jarðskjálftinn mældist 3,6, en hefur heldur dregið úr. Litakóði fyrir alþjóðaflug var færður úr gulum í appelsínugulan í morgun en það er gert ef eldstöð sýnir aukna virkni eða vaxandi líkur eru á eldgosi. Þorvaldur telur um helmingslíkur á gosi. Anna Kristín Jónsdóttir talar við Þorvald.

Lífskjarasamningurinn sem undirrritaður voru í aprílbyrjun 2019 gildir til 2. nóvember á næsta ári. Forystufólk Samtaka atvinnulífsins og í verkalýðshreyfingunni er sammála um að viðræður um nýjan kjarasamning þurfi að byrja sem fyrst á nýju ári. Annað mál er svo hversu samtaka og sammála þau verða um inntak og markmið þessara viðræðna. Í stjíórnarsáttmála nýrrar ríkisstjórnar er vikið að vinnumarkaðsmálum og þar er meðal annars sagt að stuðlað verði að bættum vinnubrögðum og aukinni skilvirkni við gerð kjarasamninga að höfðu samráði við aðila vinnumarkaðarins. Styrkja þarf hlutverk ríkissáttasemjara til að bæta undirbúning og verklag v

Íslensk erfðagreining hótar að hætta raðgreiningu kórónuveirunnar fyrir heilbrigðisyfirvöld, vegna úrskurðar Persónuverndar um að fyrirtækið og Landspítali hafi brotið persónuverndarlög

Heilbrigðisráðherra ætlar að aflétta samkomutakmörkunum um leið og færi gefst. Fyrst þurfi þó að meta hvaða áhrif omíkron-afbrigðið hafi á virkni bólusetninga og hraðprófa.

Tveir menn voru skotnir til bana í Kaupmannahöfn á innan við einum sólarhring. Sá þriðji er alvarlega særður.

Ætla má að íbúar á Norðurlandi vestra kaupi jólagjafir fyrir þrjú hundruð milljónir króna fyrir þessi jól.

Lengri umfjallanir:

Íslensk erfðagreining hótar að hætta raðgreiningu kórónuveirunnar fyrir heilbrigðisyfirvöld, vegna úrskurðar Persónuverndar um að fyrirtækið og Landspítali hafi brotið persónuverndarlög með því að taka COVID-veiku fólki blóð í þágu vísindarannsóknar án þess að upplýst samþykki og leyfi Vísindasiðanefndar lægi fyrir. Íslensk erfðagreining telur Persónuvernd hafa farið út fyrir valdsvið sitt og vill fá ákvörðun hennar um að fyrirtækið hafi brotið lög hnekkt fyrir dómstólum. Það kemur Þórólfi Guðnasyni sóttvarnalækni ekki á óvart að reglur hafi verið brotnar í upphafi faraldurs vegna ástandsins í samfélaginu.

Arnhildur Hálfdánardóttir ræddi þetta mál við Helgu Þórisdóttur, forstjóra Persónuverndar, Þórólf Guðnason, sóttvarnalækni og Kára Stefánsson, forstjóra Íslenskrar erfðagreiningar.

Á hráslagalegu desemberkvöldi var Angela Merkel, kanslari Þýskalands kvödd af þýska hernum. Merkel sat á rauðum palli fyrir framan aðra gesti við varnarmálaráðuneytið í Berlín og fylgdist með lúðrablásurum marséra í bjarma frá kyndlum. Athöfnin sem kölluð er Der grosse Zapfenstreich er sá mesti heiður sem þýski herinn getur nokkrum sýnt og var eiginlega hin opinbera kveðja til Merkel eftir sextán ár á kanslarastóli. Hún er reyndar ekki alveg stigin upp úr honum enn því jafnaðarmaðurinn Olaf Schulz, arftaki hennar tekur ekki við opinberlega fyrr en eftir nokkra daga. Anna Kristín Jónsdóttir gerir upp valdatíð Merkel.

3 kk, 4 kvk

Þrír hafa greinst með omíkron-afbrigði kórónuveirunnar hér á landi. Einn þeirra er á sjúkrahúsi, karlmaður á áttræðisaldri sem er fullbólusettur.

Rennsli í Gígjukvísl er orðið tífalt meira en í venjulega árferði. Það kæmi vísindamönnum ekki á óvart ef gos yrði í Grímsvötnum á næstunni.

Óljóst er hvað þeim gekk til sem fjarlægði sjö hraðaskilti við Sauðárkrók. Hámarkshraði við bæinn var nýlega lækkaður.

Sebastian Kurz, fyrrverandi kanslari Austurríkis, tilkynnti óvænt í dag að hann væri hættur í stjórnmálum. Hann lét af embætti fyrir nokkrum vikum vegna ásakana um fjármálaspillingu.

Lengri umfjallanir:

Fyrsta umræða um fjárlagafrumvarpið stóð á Alþingi í allan dag. Fjármálaráðherra gerir ráð fyrir kröftugum hagvexti en stjórnarandstöðuþingmanni finnst að ríkisstjórnin segi pass í fjárlagafrumvarpinu. Hagfræðingur saknar útfærslna á hvernig eigi að ná niður hallanum á ríkissjóði. Anna Kristín Jónsdóttir talar við Katrínu Ólafsdóttur, hagfræðing.

Umræðan um Omíkron er í algleymingi í Bretlandi, hvað eigi að gera, í landi þar sem ríkisstjórnin hefur verið áberandi óviljug til að grípa til hamlandi veiruráðstafana. Enn frekar stórmál þegar jólin eru fyrir dyrum. Jólaboðin eru ákaft rædd, ekki aðeins jólaboðin í ár heldur líka jólaboð í Downing stræti í fyrra. Pólitíska spurningin er hvort Covid reglurnar þá hafi verið brotnar, sem væri stjórnarandstöðunni kærkomið dæmi um að forsætisráðherra telji sig yfir aðra hafinn. Sigrún Davíðsdóttir segir frá.

Jökulhlaup er hafið í Grímsvötnum. Jarðeðlisfræðingur segir það eftir bókinni og að það nái hámarki um helgina.

Forsætisráðherra flytur stefnuræðu nýrrar ríkisstjórnar í kvöld.

Sendiherrar Evrópusambandsríkja samþykktu í dag refsiaðgerðir gegn hvítrússneskum embættismönnum og fyrirtækjum vegna ástandsins á landamærum Hvíta-Rússlands og Póllands.

Lyfjastofnun hafa borist tólf alvarlegar tilkynningar um aukaverkanir eftir örvunarbólusetningu.

Svalbarðsstrandarhreppur skoðar möguleika á að sameinast einhverju af fjórum nágrannasveitarfélögum.

Lengri umfjallanir

Margar þeirra aðgerða sem fyrrverandi ríkisstjórn tókst ekki að ljúka á síðasta kjörtímabili rata nær óbreyttar inn í nýjan stjórnarsáttmála. Aðrar virðast hreinlega hafa gufað upp. Formaður sambands íslenskra sveitarfélaga sýtir gistináttagjaldið sem ekki skilaði sér og formaður Samtaka fyrirtækja í velferðarþjónustu vonar að það komi ekki að sök þó ekkert sé minnst á hjúkrunarheimili í sáttmálanum. Arnhildur Hálfdánardóttir tók saman.

Skólayfirvöld í Gautaborg leita nú flestra leiða til að loka þremur einkareknum grunnskólum eftir að upp komst um umfangsmikið fjármálamisferli. Skólastjórnendur hafa verið gagnrýndir undanfarna tvo áratugi, meðal annars fyrir að skipta nemendum upp eftir kynjum og neyða þá til að taka þátt í bænahaldi. Annar einkarekinn skóli í Örebro, hefur greitt jafnvirði um 18 milljóna til félagsins sem rekur mosku í Ýmishúsinu í Reykjavík. Kári Gylfason, fréttaritari Spegilsins í Gautaborg fjallar um þetta.