'n Plaaslike tegnologie-entoesias, Jonathan Nelson, het onlangs negende plek behaal in 'n internasionale rekenaar-kompetisie. Hy bedryf sy eie Youtube-kanaal wat as Wootdini bekend staan. Justin Kennerley het gaan uitvind presies wat die kompetisie behels......

Die verhoor van 'n oud-Gautengse polisievrou wat aangekla word van die moord op haar familielede, word in die hoogeregshof in  Palm Ridge  voortgesit. Nomia Ndlovu word ook aangekla van sameswering om haar suster en vyf kinders te vermoor. Ndlovu het onskuldig gepleit op al 20 aanklagte teen haar. Die staat voer aan dat Ndlovu mense gehuur het om die moorde te pleeg sodat sy die lewensversekering kon eis. Sy is vasgetrek nadat een van die huurmoordenaars die polisie gekontak het. Sosiale media was behoorlik aan die gons na haar eerste verskyning gister toe sy met groot bravade vir die kameras gewaai het. Die kliniese sielkundige en voormalige hoof van die polisie se  forensiese sielkunde eenheid, Dr. Gerhard Labuschagne sê, Ndlovu se optrede in die hof is tipies die van 'n reeksmoordenaar.

Alicia Lamprecht se sewe maande-oue seuntjie, Henco, doen baie goed na hy gister tydens 'n motorkaping ontvoer is. Hy sal vandag deur 'n pediater ondersoek word. Lamprecht het by 'n vriendin in Observatory in Kaapstad gekuier, toe die se hondjie by die erf probeer uithardloop het. Lamprecht was al gereed om te ry, maar het probeer om die hondjie, wat 'n meter van haar motor was, te keer. Die volgende oomblik het 'n onbekende man in haar Volkswagen Polo gespring en met Henco, wat in sy karstoeltjie gesit het, weggejaag. Lamprecht sê haar hele wereld het op daardie oomblik ineengestort.