Die Afrikaanse been van Wikipedia, is die grootste verteenwoordiger van Afrika-tale op dié inligtingsplatform. 'n Besonderse mylpaal is boonop dié week bereik, toe die 100-duisend-kerf wat artikels betref, oorgesteek is. Marlinée Fouché berig die vrywilligers wat hierby betrokke is, poog om aan die inhoud 'n eg-Suid-Afrikaanse geur te gee...

Sanparke het Nasionale Parke Week, wat tradisioneel in September plaasvind, uitgestel na November. Die woordvoerder van SANPARKE, Reynold Thlakuli sê die besluit is geneem weens die heersende pandemie. 

Die DA wil hê dat die ondersoek na die Speaker van die Nasionale Vergadering, Nosiviwe Mapisa-Nqakula, oor afpersing, hervat moet word. Dit nadat die fluitjiebaser wat die saak aanvanklik aan die groot klok gehang het aangedui het dat hulle WEL sal saamwerk met die parlement  oor die kwessie. Die fluitjieblaser het deur middel van Bantu Holomisa destyds beweer dat Mapisa-Nqakula hulle begin afdreig het vir geld, nadat hulle 'n weermag kontrak ontvang het, terwyl sy die minister van verdediging was. Die parlementêre staande komitee van verdediging het die ondersoek na Mapisa-Nqakula laat vaar nadat hulle gevind het die fluitjieblaser wou nie saamwerk met die ondersoek nie. Die DA se skadu minister van Verdediging, Kobus Marais sê dit het intussen aan die lig gekom dat die fluitjieblaser wel hulle samewerking sal gee. 

Sanparke het planne aangekondig vir 'n nuwe nasionale park, wat in die Oos-Kaap geleë sal wees. Die Kaapse Grasveld Nasionale Park sal in samewerking met die Wêreld Natuurlewe Fonds ontwikkel word. Dié park van sowat 30 duisend hektaar sal Naudenek-pas, berge van die Oos-Kaap wat aan Lesotho grens, en die Oos-Kaapse Drakensberg strategiese waterbron, insluit. Die koördineerder van die WWF, Themba Nsibande, sê as die park realiseer sal dit kritiese beskerming bied aan Suid-Afrika se bedreigde grasvelde.