سنة ٢٠٢٤ كانت سنة كبيسة، أظن واضح، بالحسابات الرياضية فالسنة الكبيسة هي اللي تقبل القسمة على ٤، وهي اللي شهر فبراير فيها بيكمل ٢٩ يوم. لكن أظن احنا مش محتاجين إثبات رياضي على إنها كانت سنة كبيسة، يكفي جدا الإحساس والأحداث!

٢٠٢٤ كانت سنة لا يمكن وصفها بالبياض، حملت على مدار شهورها أحداثا جسام، ٣-٤ حروب، ٥-٦ اغتيالات، أزمات اقتصادية طاحنة، خلافات سياسية مهولة ،أزمة لاجئين ، أزمات استيراد وأزمات مواد خام مخلية كل حاجة في الدنيا ناقصة، استمرار لمذبحة الأشجار وغزو الكباري، استمرار لهدم مباني تراثية بمبرر اننا عندنا منها كتير، خلافات كتير وتخوين كتير بين الأصدقاء أو أفراد العائلة الواحدة فيما يخص شراءهم كيس شيبسي أو باكو بسكوت، وتنتهي السنة على خبر برتقالي غامق واحنا بنرحب بعودة الطفل الأعظم حاكما للبيت الأبيض من جديد.

ما اعرفش بالظبط انتو حالكم إيه أو تأثرتم ازاي باللي حصل لنا السنة دي لكن أنا على سبيل المثال ضاعفت جرعة دوا الاكتئاب، غيرت دوا القلق لأنه ما بقاش بيحوق، ومررت بعدد من هجمات الفزع أو البانيك أتاكس اللي بتطل برأسها كل شهرين مع كل خبر غامق جديد.

كانت سنة صعبة ، تحسها ملخص ١٠ سنين حد حب يلملنا أحداثهم كلها في شكل فوتومونتاج دموي وسريع ، ممكن أحداثها تتفك بسهولة عشان تملى ٣-٤ كتب تاريخ للمراحل التعليمية المختلفة. سنة متعبة ومرهقة وحزينة ومؤلمة. لكن ثانية واحدة، السنة لسه ما انتهتش، لسه باقي فيها شهر بحاله: ديسمبر المجيد.

صحيح بالنظر لباقي أشهر السنة دي مش متوقع يعني ان الأفراح تعم والسلام يسود والكل يمشي يرقص ويغني في شوارع الكوكب. لكن خلينا نتفاءل بالخير يمكن نلاقيه.

دلوقتي احنا لسه عندنا فرصة حوالي ٢٥ يوم نعمل ديتوكس لأحداث هذا العام الكئيب. لو قررنا اننا مثلا نتحاشى فيه الخلافات المعتادة في آخر كل عام. 

ممكن نبطل خناقات الأهلي والزمالك مثلا، وممكن نسيب اللي عايز يقاطع يقاطع واللي مش حابب لا نتهمه بإن صوابعه متغمسة بالدم. ممكن نبطل خناقة الكريسماس المعتادة مثلا، ونهدى العروق اللي بتستنفرها شجرة الكريسماس أو صورة بابا نويل. ممكن نبطل نبكي على أسعار اللبس الشتوي. خلاص بأه المفروض اتعودنا ان تمن الجاكت الصوف حاليا يوازي تمن سيارة مانيوال ١٢٨من كام سنة، فخلاص مالوش لازمة البكاء على اللبن المسكوب. 

ديسمبر برضه بيكون فيه امتحانات كتير، فهل يا ترى ممكن الأمهات تخف الصويت في آذان عيالهم وقت المذاكرة والامتحانات و تدي هدنة للشبشب الطائر ونستمتع بكام يوم ما يتسببش في ثقب طبلة ودن العيال ولا بجلطات شريانية للأمهات؟

هل ممكن نبتسم في وش بعض في الشارع حتى لو ماكانش فيه سبب للابتسام؟ هل ممكن نبطل سباق السيارات في الشوارع كل صباح؟ هل ممكن نشتري لزمايلنا في الشغل هدية رمزية من غير ما نربط ده بالسيكريت سانتا ولا بأجندات الدعاية بتاعة بداية السنة؟

فيه حاجات كتير ممكن نعملها عشان الكام يوم الفاضلين من السنة يمروا في سلام. يمكن نعمل قفلة أفضل لهذا العام الكبيس، اللي كان ناوي ما يخلصش من غير ما يخلص علينا، بس احنا ممكن نقوله عليك واحد وننهيه بعيدا عن الأحزان.