Kultur

D'Ekipp vum Grousse Kino hat dësen dänesche Prisongsthriller de leschte Samschdeg beschwat.

Karaoke am MUDAM, Liesunge bei der Gëlle Fra, an dräi Vernissagen um selwechten Dag: dat a villes méi am Kulturagenda vun der Woch, geschriwwe vun engem grippege Nicolas Calmes am Homeoffice, ageschwat vum Joé Birchen.

Wou kënnt dat Wuert hier? De Jean Portante hëlt eis nees mat op eng eetymologesch Rees.

Den Dënschdeg Owend huet de Samuel Hamen bei der zeremonieller Präisiwwerreechung am Nationale Literaturarchiv zu Miersch säi Servais-Präis entgéintgeholl. “Wie die Fliegen” ass den Titel vum Roman, deen de Jury ënner der Presidentschaft vum Sébastian Thiltges ausgewielt huet.

D’Valerija Berdi mat Andréck vun deem Owend.

D’Séraphine Mirage, Drag Queen Personnage vum Tom Hecker, hat an der Escher Bibliothéik virun enger gudder Dosen Nolauschterer e sougenannten Diva Storytelling Owend. Wat gelies gouf a wéi dat war, erzielt Iech den Nicolas Calmes. An engem kuerzen Interview kënnt den Tom Hecker och op säi rezenten RTL Face-à-face mam ADR Deputéierten Tom Weidig ze schwätzen.

Mat sengem Sachbuch "La Bataille des journalistes. Réflexion sur le monde de l'information à la dérive" (Editions Guy Binsfeld) stéisst de Laurent Moyse oppen Dieren op a geet politesch ze brenzlegen Erklärungen aus dem Wee, mengt de Michel Delage a senger Buchkritik.

Op Initiativ an Engagement vun der ASBL Lët’z Arles ass Lëtzebuerg, zanter dem 3. Juli a bis Enn September, fir déi 7. Kéier op de renomméierte Rencontres d’Arles vertrueden; dës Kéier mat der Foto-Expo “L’odre des choses” vum Michel Medinger. De Michel Medinger, Joergang 1941, gehéiert hei am Land, mat senge schwaarzwäissen Nature-mortes-Inszenéierungen, zu de bekanntste Fotokënschtler, a war och erfollegräiche Liichtathleet. Aus gesondheetleche Grënn konnt hien awer virun enger Woch net beim Vernissage mat dobäi sinn, och am Virfeld keen Ausstellungsprojet entwéckelen. D’Kerstin Thalau am Gespréich mat der Duechter Isabelle Medinger, déi hire Papp zu Arles vertrueden huet.

D'Noemi Deitz ass Musekswëssenschaftlerin, Museksautorin a Museksredakteurin. 2021 huet si iwwer d'Komponistin Helen Buchholz promovéiert. Hire Fokus bei all deene Projeten ass Musek, Gender a Lëtzebuerg. Am Abrëll dëst Joer koum hiert Buch “Helen Buchholtz. Komponieren zwischen zwei Welten” eraus. Si erzielt dem Marie Trussart ënner anerem, wat d'Helen Buchholz als Komponistin esou spannend mécht, a wéi si eréischt Joerzéngten no hirem Doud iwwerhaapt entdeckt gouf.

Am drëtte Band vun de Choreographical Talks, eng Serie vu Bichelcher, déi den nationale Literaturzentrum erausgëtt, ass d’Anne-Mareike Hess een oppent Buch. Firwat genee, weess de Marc Clement, dee sech d’Bichelchen ugelies huet.

“Innerer Frieden, äusserer Wandel.“ heescht d‘Buch, dat de Fari Khabipour publizéiert huet. An dësem Wierk befaasst sech de Psycholog mat Erzéiungsmethoden, déi dozou féieren, eis zu zefriddenen an esou och friddleche Mënschen ze maachen. De Konschtfotograf Gery Oth huet d‘Buch illustréiert an d‘Valerija Berdi huet mat hinnen zwee iwwer dëst Wierk geschwat. Hei en Extrait aus dem Gespréich. De ganzen Interview ass an eiser Mediathéik ze lauschteren.