Kultur

D'Nominatioune fir déi Lëtzebuerger Theaterpräisser sinn eraus. D'Schauspillerin Nora Zrika ass eng vun de fënnef nominéierten Nowuesstalenter - dat fir hir Leeschtung am Calle Fuhr sengem Theaterstéck "Gipfelstürmer". De Joé Birchen gëtt vun der Actrice gewuer, wat fir Erausfuerderunge si sech huet misse stellen - an nach villes méi.

Dëse Summer rediffuséiere mir all Sonndeg tëschent eelef an zwielef eis RadiOdysseeën. Bei den aktuellen Hexekesseltemperaturen hunn d'Kerstin Thalau an d'Erzielerinne Luisa Bevilacqua plus Betsy Dentzer sech fir d'Episod "good witches/ bad witches" decidéiert. Mat dobäi war am Mee d'Historikerin an Ethnologin Antoinette Reuter, déi viru ronn 45 Joer zu Lyon hir zweet Diplomaarbecht zum Theema kathoulesch Reform a Vollekskultur am Herzogtum Lëtzebuerg ofgeschloss hat.

D'Kerstin Thalau huet mat der Antoinette Reuter nach emol d'Kapitel Hexeverfolgung opgeschloen.

Begrëffer wéi "Kuff d'Schmull", "Gampes" oder "Kitten" gehéieren haut zum gängege Sproochgebrauch. Am Fong komme se awer aus dem Jéineschen, enger Zort Geheimsprooch, déi vun Händler geschwat gouf. Muer (23.8.) steet d'Jéinescht am Zentrum vun engem Owend mat Texter a Musek, deen am Haff nieft der Kathedral stattfënnt. D'Claudine Muno huet sech am Virfeld mat den Organisateuren ënnerhalen.

De Bléck iwwer de Programm vun der neier Kinoswoch mam Michel Delage

Bartleby Delicate geet weider, och wann ENGLBRT grad op Live-Presenz setzen, a Seed To Tree an dräi Wochen eng nei Pack erausbréngen. An der Mëtt heivunner bréngt de Georges Goerens, deen all dës Projete gemeinsam huet, d'Resultater vun zwou musikalesche Renconteren eraus. Déi zwou Singelen si Kollaboratioune mat bayresche Museker, an do wollt de Marc Clement natierlech méi wëssen.

"Le livre de l'Una" heescht de Roman vum bosnesche Schrëftsteller Faruk Sehic. Hie selwer war Kämpfer am Bosnie-Krich tëschent 1992 a 1995. A sengem Roman erschaaft hien eng Welt, an där d'Natur eng wichteg Roll spillt, wou d'Hypnos Erënnerunge mat Fantasie vermëscht a Poesie a Prosa anenee verschmëlzen.

D'Valerija Berdi huet mam Faruk Sehic iwwer säi Buch a seng Erliefnisser geschwat. "Le livre de l'Una" koum a franséischer Iwwersetzung bei Editions Agullo eraus.

D'Kolla sinn ee Vollek aus dem Norde vu Chile. U Weltoppenheet an Nohaltegkeet wëllt de Kolla-Festival mat sengem Numm erënneren. Déi éischt Editioun no der Pandemie ass am Park vun der Stad Miersch a bleift de Grondsätz vum Festival a sengen Organisateuren trei. Wéi? Dat verréit d'Marike Breedijk vun der Kolla-Ekipp dem Marc Clement.

E Mann, dee fir eng onbestëmmten Zäit agefruer war, gëtt no enger gréisserer Katastroph nees erwächt. Séier gëtt hie mat enger spezieller Missioun beoptraagt. Dat ass den Ausgankspunkt vun "Immobilité" (Editions Rivages), der franséischer Iwwersetzung vun engem Science-Fiction-Roman vum Amerikaner Brian Evenson.

Um Festival Etonnants voyageurs, Enn Mee zu Saint-Malo, huet sech de Michel Delage mam fréiere Mormon Brian Evenson ënnerhalen. Mat virop der Fro: ass "Immobilité" an déi "post-apokalyptesch" Literatur ze klasséieren?

Cory Hanson heescht de Kënschtler, deen den Owend (17.8.) live an de Rotonden am Kader vun de Congés annulés op der Bün steet. Et ass e ganz villsäitege Museker, dee mat senger Band Wand Psychedelesches spillt an als Solo-Artist gär emol d'Grenze vum Genre Country sprengt. D'Claudine Muno ass live an de Rotondeë fir mam Cory Hanson viru sengem Optrëtt e Gespréich ze féieren.

D'Hisae Ikenaga huet, wéi den Numm et scho suggéréiert, mexikanesch-japanesch Originnen. Si ass 1977 zu Mexico-City gebuer, do och opgewuess, huet duerno Konscht zu Mexico, da Kyoto, Barcelona a Madrid studéiert, éier si, viru knapps zéng Joer, hei an der Groussregioun ukoum. Hir multimedial Installatiounen hunn zu Lëtzebuerg ewell vill Succès; d'Hisae Ikenaga war Laureatin vum Luxembourg Encouragement for Artists Prize, kuerz LEAP, si gëtt vun enger Galerie vertrueden, stellt heefeg aus. Momentan presentéiert si, zum Beispill, d'Installatioun "Visceral rack", also emotionaalt Regal, an der Cecil's Box vum Cercle Cité. D'Kerstin Thalau am Gespréich mat der Hisae Ikenaga