Kultur

Dëse Summer goufen an der Escher Konschthal, ënner dem Daach, zwee Projectrooms ageweit: fir Konschtprojeten, déi zum Deel bannent enger Residenz am Escher Bridderhaus entstane sinn.

"Les jeux sont faits. Rien ne va plus" ass eng vun den zwou aktuellen Installatiounen iwwerschriwwen. Eng Dokumentatioun vun der Kënschtlerin Hsia Fei Chang hirer dagdeeglecher Tortur als Croupière an engem Paräisser Casino. D'Hsia Fei Chang koum 1973 a Südkorea op d'Welt, lieft a schafft zanter den 1990er zu Paräis; zanter knapps 20 Joer stellt si och reegelméisseg zu Lëtzebuerg aus. D'Kerstin Thalau am Gespréich mat der Performerin

De Cabaret Vert ass ee vun deene gréisste Museksfestivallen a ganz Frankräich. Wéi vill anerer huet en als kleng Rockbün op enger Wiss ugefaangen an ass a 17 Joer zu engem multikulturellen Event mat Comicberäich a masseg Büne gewuess. En ass och guer net wäit ewech vun eis hei, grad emol 140 km bei Charleville-Mézières an den Ardennen.

Fir ee klengen Iwwerbléck iwwer ee kolossale Line-Up, deen desen DOnneschde lasgepaff gëtt, huet de Marc Clement aus der Museksredaktioun sech mat engem vun de Festivaldirekteren, dem Cédric Cheminaud, ënnerhalen.

Déi däitschsproocheg Schrëftstellerin Ann Cotten fält mat hirer Literatur zimmlech aus der gewinnter Rumm. Hir Texter sinn net ganz einfach ze verstoen, experimentell, fragmentaresch an da kennt och nach en ongewinnt Gendern dra vir. Si schreift Lyrik a Prosa, an hiren Aen ass dës Trennung awer just eppes fir d'Librairen ... D'Valerija Berdi war der Ann Cotten zu Leipzig begéint.

Haut den Owend (12.8.) steet d'Johanna Kivimägi, alias Hanakiv, am Kader vun de Congés Annulés an de Rotonden op der Bün. Gebierteg kënnt si aus Estland, mëttlerweil lieft si an England a erschaaft do eng ganz eege Musek, an där sech Aflëss vum traditionelle Folk aus hirer Heemecht mat Jazz, Klassik an Electro vermëschen.  Am Interview beim Claudine Muno huet si erzielt, wéi hir Kompositiounen entstinn.

Bis d'Rentrée rediffuséiere mir all Sonndeg tëschent eelef an zwielef eis RadiOdysseeën. Da kritt Dir déi mat, déi Dir verpasst hutt, respektiv hutt d'Geleeënheet, déi eng oder aner nach emol ze lauschteren. Schuede kann dat jo näischt: zum Beispill beim Sujet Gebuert. Wéi gëtt déi an der Erzielkonscht thematiséiert? A ginn et Lienen zum Alldag vun enger Hiewan, déi hire Beruff esouwuel zu Lëtzebuerg wéi och am Senegal ausgeüübt huet? Dat wollten d'Kerstin Thalau an d'Erzielerinne Luisa Bevilacqua a Betsy Dentzer am Fréijoer 2023 erausfannen. Fir Iech anzestëmmen hei eng Geschicht, déi d'Betsy Dentzer am Maroc entdeckt huet.

Queer, schwaarz Kënschtler hunn an deene leschte Joren an der Musekszeen esou vill Presenz an Intensitéit bewise wéi nach ni virdrun. Vun Yves Tumor an Tyler the Creator bis Ah-mer-ah-su an Anohni ginn et Perspektiven a Sounds ze entdecken, déi engem am Alldag net esou séier géife begéinen. Als Trans-Mann an urban Musekslegend huet de Beverly Glenn-Copeland all Aen op sech geriicht bei der Release vu senger zanter 1986 drëtter LP. Si heescht "The Ones Ahead", an de Marc Clement huet eragelauschtert.

Zanter 2011 lieft déi syresch Schrëftstellerin a Journalistin Samar Yazbek am Exil. Weltwäit engagéiert si sech fir d'Rechter vun de Fraen, och an hirer Literatur. D'Valerija Berdi ass der Samar Yazbek um Literaturfestival Etonnants voyageurs begéint.

Mat hirem zweeten Album "Gigi's Recovery" huet sech déi iresch Band The Murder Capital agereit an d'Lëscht vun de villverspriechendsten neie Rockbands. Den Owend (9.8.) sti si an de Rotonden am Kader vun de Congés annulés op der Bün. An d'Claudine Muno huet d'Geleeënheet der Band virun hirem Optrëtt e puer Froen ze stellen.

Scho virun der Ouverture vum Mudam am Joer 2006 gouf eng Konschtsammlung fir de Pei-Musée opgebaut. Wat sech zanter gutt 25 Joer gedoen huet, kann de Public a reegelméissege Kollektiouns-Ausstellunge gesinn. Allerdéngs, aus Plazgrënn, just e Brochdeel dovunner. Fir déi aktuell Expo "deep deep down" sollt déi komplett Sammlung an hirer Globalitéit intellektuell a physesch gräifbar gemaach ginn.

D'Kerstin Thalau ass vun der Responsabeler vun der Kollektioun, der Marie-Noëlle Farcy, méi iwwer d'Ëmsetzung vun enger Iddi gewuer ginn.

Als "wedding band", also als Museksgrupp, déi op Hochzäite spillt, huet d'Tuareg-Formatioun Etran de L'Aïr ugefaangen. Mëttlerweil presentéiere si hiren Desert Blues, deen dacks manner blueseg wéi danzbar ass, och op den internationale Concertsbünen. Ënner anerem den Owend an de Rotonden zu Hollerech am Kader vun de Congés annulés. D'Claudine Muno ass op der Plaz an huet d'Band live am Interview.