Kultur

Op där enger Säit heescht e Rio Grande, op där anerer Río Bravo. Fir d'Amerikaner ass et also einfach de groussen, fir d'Mexikaner de rosene Floss. Op ronn 2.000 km deele sech béid Natiounen d'Gewässer, éier et am Mier verschwënnt. Oder besser: si kéinten et als eppes Gemeinsames wouer huelen, mee d'Iddi vu Grenz dominéiert.

Wéi sech d'Situatioun scho beim Donald Trump sengem Walkampf 2016 nach méi zougespëtzt huet, huet d'Kënschtlerin Zoe Leonard decidéiert, déi wouer Natur vum Rio ze dokumentéieren. Gutt fënnef Joer drop presentéiert si d'Resultat am Mudam. Explikatioune vum Kerstin Thalau

Si ass zeréck! No Pandemie-bedéngter Paus ass 2022 nees eng Biennale vu Stroossen. Bis den 8. Juni ginn am Stroossener Centre Barblé 70 Wierker vu 36 selektionéierte Kënschtler presentéiert. An hirer Totalitéit solle si dem Public weisen, woufir zäitgenëssesch Konscht haut steet. Hei am Land anscheinend fir manner Abstraktioun, dofir méi Figuratioun, esou de Constat vum multidisziplinäre Jury, ronderëm d'Konschtexpertin Nathalie Becker oder de Streetartist Sumo. Dräi Präisser hunn d'Memberen och verdeelt. D'Kerstin Thalau am Gespréich mam Laureat vum Prix d'Encouragement, Jeff Dieschburg, Joergang 1988

Den Isaiah Wilson huet sech als Choreograph an Dänzer vu senger Kreatioun "331 grams" mat der Positioun vum Mann an der Gesellschaft vun haut beschäftegt. De Romain Butti huet mam Dänzer um Monodrama Festival geschwat.

De sloweenesch-italieenesche Schrëftsteller, ee vun de leschte groussen Auteure vu KZ-Literatur, ass de Méindeg am Alter vun 108 Joer gestuerwen. Hie gouf 1913 zu Triest gebuer, dat deemools nach zu Éisträich-Ungarn gehéiert hat. A sengem staark autobiographesch gepräägte Wierk hat sech de Pahor fir déi sloweenesch Minoritéit an Italien, a géint Faschismus, Nazismus a Kommunismus agesat.

De Boris Pahor war am Mäerz 2016 hei zu Lëtzebuerg. Hei de Bäitrag, deen de Michel Delage deemools gemaach hat.

Viru genee 610 Joer ass si gebuer, an op engem 30. Mee gestuerwen. Rieds geet vun der Jeanne d'Arc, la Pucelle d'Orléans, der historescher Heldin vu Frankräich. Wien ass dann dës jonk Fra, Duechter vun enger Bauerefamill?

Mat der Perséinlechkeet vun der Jeanne d'Arc hu sech d'Regisseurin Maja Delinic an de Schauspiller Philipp Sommer am Kader vum Monodrama-Festival auserneegesat an hirem Stéck "Der Fall d'Arc". D'Valerija Berdi huet mat den zwee Kënschtler geschwat.

Dee wichtegste Filmfestival vun der Welt ass de leschte Weekend mat enger zweeter Palme d'Or fir de Schweed Ruben Östlund op en Enn gaangen. Belsch Cineasten hu sech an der offizieller Kompetitioun ganz gutt aus der Affär gezunn, an och de Lëtzebuerger Filmmilieu konnt sech freeën.

E Bäitrag vum Michel Delage.

Den amerikaneschen Acteur Ray Liotta, deem seng markantst Haaptroll wuel déi am Martin Scorsese sengem "Goodfellas" (1990) war, ass d'lescht Woch am Alter vu 67 Joer gestuerwen.

Am Mäerz 2017 war de Ray Liotta Invité um Luxfilmfest. Den Jamie Reinert hat deemools d'Geleegenheet, mat him ze schwätzen.

Wat ass fundamental? Fir de Schauspiller Steve Karier ass et de "Fundamental Monodramafestival", also säi Fest fir Performancë fir een eenzelne Kënschtler, dat hie virun 12 Joer lancéiert huet. Fir d'Dänzerin a Choreografin Emanuela Iacopini ass et d'Mamm. Mam Solo-Danzstéck "Mother" wëll si am Kader vum Monodrama-Festival an der Banannefabrik zu Bouneweg der Kreatioun, dem kreativen Drang, en Homage danzen. D'Kerstin Thalau war op eng Prouf vu "Mother".

An zwee Filmer,  "Corsage" an "Plus que jamais" ass déi Lëtzebuerger Schauspillerin Vicky Krieps ze Cannes ze gesinn an dat mat grouusem Succèes. Eisen ARD-Korrespondent Jan Tussing mat Andréck vum Filmfestival.

Mat der Ambitioun, Dänzerinnen an Dänzer mat de verschiddenste Backgrounden iwwer den Hip-Hop zesummenzeféieren, schafft de Kollektiv "Knowedge" u Kreatiounen, déi net nëmmen den Nowuess fir sech wëll begeeschteren, mee och de Genre vum urbanen Danz méi däitlech an der kënschtlerescher Landschaft hei zu Lëtzebuerg ze verankeren.