Kultur

Scho gemierkt, datt Alldagsprodukter méi schlecht gi sinn, mee net onbedéngt méi bëlleg? Dat huet System! "Verkrempelung" nennt dat den däitschen Essayist Gabriel Yoran. Hei en Extrait aus dem leschten Episod vum B-Radio.

Zu Lagos gebuer an zu Lëtzebuerg opgewuess, mécht den Oké Popmusek, déi aus afrikanescher Spiritualitéit, Gender-Fluiditéit a vill Liewensfreed gestréckt ass. Um Mikro vum Marc Clement erzielt dee jonke Museker, wat hien dreift, a wat seng Musek him bedeit.

De Jeff Schinker an de Marc Clement hu sech 3 nei Placken ugelauschtert. “Indietronica” vun de Londoner Archive, déi kierzlech hiren 13. Studioalbum “Glass Minds” presentéiert hunn ... schonn am Titel eng schéi Metapher dorop, wéi duerchsiichteg déi nei Technologien eis Gedanke maachen. Bei sengem 11. Album als Solokënschtler an ënner dem Numm Apparat ass de Sascha Ring mat an eisem Mix: “A Hum of Maybe” heescht seng nei Plack, d’Vibratioun vun der Ongewëssheet an elektronescher Form? An zulescht huet d’Amsterdamer Türk-Pop Retro-Combo Altin Gün hir 6. Plack “Garip” dobaussen, eng Aart nostalgesch Reflektioun vun den transkulturellen Erliefnesser, déi eis Zäit esou faszinéierend maachen, soe mir elo mol à discuter.

“Here comes the Luxembourg City Filmfestival”; muer den Owend ass d’Opening ceremony. Mee elo schonn, a bis ufanks Abrëll, kënnt Dir parallel dozou “Here comes the sun” entdecken: dem Cercle Cité seng Kontributioun zum Festival, am Ratskeller an der Paschtoueschgaass. D’Multimedia-Expo ass mat “Art, énergie et intelligence naturelle” ënnertitelt. Zesummegestallt gouf se vun Elektron, also der Plattform fir d’Lienen tëschent Konscht, digitalen Technologien, Wëssenschaft a gesellschaftlechen Erausfuerderungen, déi d’Françoise Poos an de Vincent Crapon virun dräi Joer lancéiert hunn. “Here comes Kerstin Thalau” fir dem Duo eng Partie sonneg Froen zu hirer Expo ze stellen.

Wat géing Dir maachen, wann Dir all Dag ee Wonsch fräi hätt? Esou geet et engem klenge Meedchen an der neiste Kannersendung vun der brittescher BBC, déi de Lëtzebuerger Sean McCormack realiséiert huet. D‘Claire Barthelemy huet mat him zu London iwwer Inspiratioun, Karriär a queer Visibilitéit geschwat.

Den Iwwerbléck vun der aktueller Filmprogrammatioun mam Michel Delage

Dem südafrikanesche Cineast Olivier Hermanus säin Drama handelt vu Léift, Erënnerung a populäre Gesang, mam Duo Paul Mescal a Josh O'Connor an den Haaptrollen. De Michel Delage, d'Valerija Berdi a Kerstin Thalau beschwätzen de Film.

Sozialen Drama iwwer eng Transfuge de classe an enger existenzieller Sakgaass an eng homosexuell Coming-of-Age-Geschicht iwwer Léift, déi vläicht eesäiteg bleift - den Nicolas Calmes an de Jeff Schinker rezenséieren "Connemara", eng däitschsproocheg Bünenadaptéierung vum Nicolas Mathieu sengem véierte Roman am Kapuzinertheater an dem Edsun säi "Moth", dat de Freideg seng Première am Mierscher Theater hat.

Mat dem Gesetzesprojet 8410 gëtt sech Lëtzebuerg e legale Kader fir en Observatoire fir d’Kultur, deen eng vun de Recommandatioune vum Kulturentwécklungsplang 2018-2028 war. Wat genee deen Observatoire ass, wat seng Missiounen, Ziler a seng Repercussiounen op de Kultursecteur wäerte sinn, dat erkläert eis d’Laurence Brasseur, Coordinatrice vum Observatoire de la culture.