បទសម្ភាស

គណបក្ស​ស្ត្រី​ដើម្បី​ស្ត្រី​ គឺ​ជា​គណបក្ស​ថ្មី​មួយ​ ស្ថិត​នៅ​ក្នុង​ចំណោម​គណបក្ស​ផ្សេង​ទៀត​ ដែល​បាន​ចូល​រួមការប្រកួត​ប្រជែង​ការ​បោះឆ្នោត​ជ្រើសតាំង​តំណាង​រាស្ត្រ​អាណត្តិ​ទី៧​នេះ។​ គណបក្ស​នេះ​ដាក់​អាទិភាព​ខ្ពស់​ទៅ​លើ​ស្ត្រី ​ដោយ​មាន​គោល​នយោបាយ​ចំនួន​១១​ចំណុច​ ដើម្បី​ការពារ​ស្ត្រី ​និង​ធានា​ដោះស្រាយ​បញ្ហា​សេដ្ឋកិច្ច​របស់​ប្រជាពលរដ្ឋ។​ លោកស្រី ​ស៊ឹង​ សុធី ប្រធាន​គណបក្ស​ស្ត្រី​ដើម្បី​ស្ត្រី ​ថា​គោល​នយោបាយ​ទាំង​១១​ចំណុច​ គឺ​ជា​ការ​ចាក់​ចំ​បេះដូង​ប្រជាពលរដ្ឋ​ ដែល​ត្រូវការ។​ នៅ​ទន្ទឹម​នឹង​ការ​អវត្តមាន​គណបក្ស​ប្រឆាំង​ដ៏​មាន​ឥទ្ធិពល​នៅ​ក្នុង​ការ​បោះឆ្នោត​លើក​នេះ​ លោកស្រី ​ស៊ឹង សុធី​ បាន​ឆ្លៀត​អំពាវនាវ​ឲ្យ​អ្នក​គាំទ្រ​បក្ស​ប្រឆាំង​ មក​គាំទ្រ​គណបក្ស​របស់​លោកស្រី ​ដើម្បី​ធ្វើ​ជា​តំណាង​គណបក្ស​ប្រឆាំង​ដ៏​ធំ។​ បើ​តាម​ប្រធាន​គណបក្ស​ជា​ស្ត្រី​រូប​នេះ​ គឺ​ជឿជាក់​ថា​ ខ្លួន​អាច​អង្គុយ​កៅអី​នាយក​រដ្ឋមន្ត្រី​បាន​១០០% ​បើ​សិនអ្នកគាំទ្របក្សប្រឆាំង មកគាំទ្រខ្លួន។

គណ​បក្ស​ខ្មែរ​រួប​រួម​ជាតិ​បាន​ដាក់​ចេញ​គោល​នយោបាយ​អទិ​ភាព​៩​ចំណុច ​ផ្តោត​លើ​បញ្ហា​អយុត្តិធម៌​សង្គម ​និង​អំ​ពើ​ពុក​រលួយ​។​ គណ​បក្ស​នេះ​ដែល​រួម​គ្នា​រវាង ​លោក ​ញឹក ​ប៊ុនឆៃ ​និង​លោក ​យ៉ែម​ បុញ្ញឬទ្ធិ​ មាន​គោល​ដៅ​ធំ​គឺ​ទៅ​ដណ្តើម​កៅ​អី​តំណាង​រាស្ត្រ​ឲ្យ​បាន​ ខណៈ​ដែល​គណ​បក្ស​ប្រឆាំង​ធំ​ជាង​គេ​មិន​ត្រូវ​បាន​អនុញ្ញាតិ​ឲ្យ​ចូល​រួម​ប្រកួត​។​ ភាព​ខ្លាំង​របស់​គណ​បក្ស​នេះ ​ត្រូវ​បាន​លោក ​យ៉ែម​ បុញ្ញឬទ្ធិ ​ពន្យល់​ថា​ គឺ​មាន​លោក​ ញឹក​ ប៊ុនឆៃ ​ជា«អ្នក​តស៊ូ​មក​ពី​ទិស​ខាង​លិច​»​ និង​មាន​លំ​នាំ​នៃ​ការ​រួម​បញ្ចូល​ដូច​គណ​បក្ស​ប្រ​ឆាំង​កាល​ពី​១០​ឆ្នាំ​មុន​។

គណបក្សកម្លាំងប្រជាធិបតេយ្យ ជាគណបក្សដ៏ថ្មីថ្មោងបំផុតក្នុងចំណោមបណ្តាគណបក្សផ្សេងទៀត ដែលចូលរួមប្រកួតប្រជែងការបោះឆ្នោតជ្រើសតាំងតំណាងរាស្ត្រ នីតិកាលទី៧នេះ។ ជាការចូលរួមលើកឡើង លោក អ៊ុន វិសិទ្ធគុន ប្រធានគណបក្សកម្លាំងប្រជាធិបតេយ្យ បញ្ជាក់ថា ជាការស្ទាបស្ទង់ពីនយោបាយ ខណៈដែលលោកសង្កេតឃើញថា ប្រជាពលរដ្ឋតាមខេត្តមួយចំនួនបានគាំទ្រគណបក្សកម្លាំងប្រជាធិបតេយ្យ។ នៅក្នុងការបោះឆ្នោតនេះ គណបក្សកម្លាំងប្រជាធិបតេយ្យ បានដាក់ចេញគោលនយោបាយចំនួន៩ចំណុច ដើម្បីប្រកួតជាមួយគណបក្សដទៃ។ បន្ថែមពីនេះ លោក អ៊ុន វិសិទ្ធគុន បញ្ជាក់ថា វិស័យសុខាភិបាល គឺជាវិស័យអាទិភាពបំផុត ដែលត្រូវកែប្រែ ប្រសិនបើបក្សឈ្នះឆ្នោត។ តាមប្រធានគណបក្សរូបនេះ រាល់ការចំណាយរបស់ប្រជាពលរដ្ឋ នៅតាមមន្ទីរពេទ្យ គឺរដ្ឋាភិបាលបក្សកម្លាំងប្រជាធិបតេយ្យជាអ្នករ៉ាប់រង។

គណបក្ស​ធម្មាធិបតេយ្យ​បាន​ធ្វើ​យុទ្ធនាការ​ឃោសនា​រក​សម្លេង​ឆ្នោត​នៅ​ក្នុង​ឱកាស​នៃ​ការ​បោះឆ្នោត​ជ្រើសតាំង​តំណាង​រាស្ត្រ​នីតិកាលទី៧នេះ​ តាម​រូបភាព​ហែរ​ក្បួន​តូចៗ​ជា​ច្រើន​កន្លែង​ ដោយ​គណបក្ស​មាន​គោលនយោបាយ​ចំនួន​៨​ចំណុច​សំខាន់ៗ​ មិន​ខុស​ពី​គណបក្ស​ដទៃ​ទៀតទេ។ ​ក៏ប៉ុន្តែ​លោកស្រី ​ពោធិតី​ សាវត្ថី ​ដែល​ជា​ប្រធាន​គណបក្ស​ធម្មាធិបតេយ្យ ​បាន​បញ្ជាក់​ថា​ក្នុង​ចំណោម​គោល​នយោបាយ​ចំនួន​៨​ចំណុច​នេះ ​មាន​២ចំណុច​ ជា​គោល​នយោបាយ​គន្លឹះ​ នោះ​គឺ​ចំណុច​ទី១​ និងទី៤។​ ប្រធានគណបក្សជាស្ត្រី ដែលធ្លាប់រស់នៅក្នុងប្រទេសហូឡង់ជាង២០ឆ្នាំរូបនេះ បញ្ជាក់ថាជម្ល៉ោះដីធ្លីបច្ចុប្បន្នចូលដល់ដំណាក់កាលមួយគួរឲ្យព្រួយបារម្ភយ៉ាងខ្លាំង ដោយលោកស្រីប្រៀបប្រដូចការបាត់បង់ដីធ្លីរបស់ពលរដ្ឋថាជាការសម្លាប់ពួកគាត់ដោយប្រយោល និងជំរុញឲ្យពលរដ្ឋធ្វើចំណាកស្រុកនៅពេលគ្មានដីធ្លីសម្រាប់ធ្វើកសិកម្ម។ រីឯគោលនយោបាយគន្លឹះមួយទៀត ត្រូវបានលោកស្រី សាវត្ថី លើកឡើងថាជាកំណែទម្រង់ប្រព័ន្ធកសិកម្ម និងធារាសាស្ត្រ ធ្វើយ៉ាងណាឲ្យជនបទមានប្រព័ន្ធធារាសាស្ត្រគ្រប់គ្រាន់បំរើឲ្យការធ្វើកសិកម្ម។

អំឡុងពេលឃោសនារកសម្លេងឆ្នោតរយៈពេល២១ថ្ងៃនេះ គណបក្សខ្មែរតែមួយ បានបង្ហាញនូវគោលនយោបាយរបស់ខ្លួនចំនួន៨ចំណុច ដែលចំណុចទាំងនោះផ្តោតទៅលើប្រព័ន្ធយុត្តិធម៌ ព្រំដែនដីគោក ការសិក្សាអប់រំ សុខមាលភាពប្រជាពលរដ្ឋ វិស័យការងារ វិស័យកសិកម្ម មនុស្សចាស់ជរាគ្មានទីពឹង និងជនពិការ និងចុងក្រោយគឺការបង្កើតច្បាប់ភូមិបាលដើម្បីរារាំងប្រជាពលរដ្ឋកុំឲ្យលក់ដីស្រែ។ គោលនយោបាយចំណុចចុងក្រោយនេះ«កុំលក់ដីស្រែ»នេះ ត្រូវបានលោក គុជ លី ស្ថាបនិក និងជាប្រធានគណបក្សខ្មែរតែមួយយល់ថាជាគោលនយោបាយសំខាន់ជាងគេ ដែលគណបក្សផ្សេងទៀតមិនមាន។ ទាក់ទងទៅនឹងយុទ្ធនាការឃោសនាបោះឆ្នោតរយៈពេល៥ថ្ងៃកន្លងទៅនេះ លោក គុជ លី យល់ឃើញថាអាចទទួលយកបានចំពោះសន្តិសុខសណ្តាប់ធ្នាប់ ក៏ប៉ុន្តែលោកមិនសប្បាយចិត្តចំពោះពេលវេលានៃការឃោសនា ដែលញាំញីទៅដោយទឹកភ្លៀង។

ភ្ញៀវប្រចាំថ្ងៃរបស់វិទ្យុបារាំងអន្តរជាតិថ្ងៃនេះ គឺលោក ម៉ម សុណង់ដូ ប្រធានគណបក្សសំបុកឃ្មុំសង្គមប្រជាធិបតេយ្យ។ ​គណបក្ស​សំបុកឃ្មុំ បាននិងកំពុង​យុទ្ធនាការរកសំឡេងឆ្នោតសម្រាប់ការបោះឆ្នោត​​ជ្រើសតាំង​តំណាងរាស្ត្រ​នីតិកាល​ទី៧ ដោយការចែកខិត្តបណ្ណ​ផ្សព្វផ្សាយនៅតាមផ្ទះ​របស់ប្រជាពលរដ្ឋតែប៉ុណ្ណោះ។ មូលហេតុនោះត្រូវបានលោក ម៉ម សុណង់ដូ អះអាងថាមកពីបញ្ហាថវិកា។ ក្នុងចំណោម​គោលនយោបាយចំនួន​៧ចំណុច ប្រធានគណបក្ស​សំបុកឃ្មុំ នឹង​​ដោះស្រាយ​បញ្ហាក្នុងវិស័យសង្គមកិច្ច គឺការអភិវឌ្ឍដោយគ្មានទឹកភ្នែកពលរដ្ឋ និងការ​ជួយ​ឧបត្ថម្ភ​ពលរដ្ឋចាស់ជរាមុនគេ​ ប្រសិនបើបក្សសំបុកឃ្មុំ​សង្គមប្រជាធិបតេយ្យ​ឈរជាតំណាងរាស្ត្រ​។

គណបក្សហ្វុនសិនប៉ិច បានបើកយុទ្ធនាការឃោសនាទ្រង់ទ្រាយធំដំបូងនៅថ្ងៃទី០២ ខែកក្កដាកន្លងទៅនៅភ្នំពេញ ដើម្បីស្វែងរកសម្លេងគាំទ្រនៅក្នុងឱកាសនៃការបោះឆ្នោតជ្រើសតាំងតំណាងរាស្ត្រនីតិកាលទី៧ នៅថ្ងៃទី២៣ ខែកក្កដា ខាងមុខ។ លោក ញឿន រ៉ាដែន អ្នកនាំពាក្យគណបក្សហ្វុនស៊ិនប៉ិច បានថ្លែងថា គណបក្សរាជានិយមមួយនេះ មានគោលនយោបាយចំនួន៩ចំណុច ដែលបានរំលេចនៅក្នុងយុទ្ធនាការនេះ នៅពេលខ្លួនឈ្នះឆ្នោត។ ចំណុចទាំង៩នោះ រួមមានការការពាររាជបល្ល័ង្គ គាំទ្រដល់កិច្ចព្រមព្រៀងសន្តិភាពទីក្រុងប៉ារីស លើកកម្ពស់សិទ្ធិបញ្ចេញមតិជំនឿសាសនា បញ្ចប់ទុក្ខវេទនារបស់ពលរដ្ឋដោយសារប្រព័ន្ធតុលាការ ដោះសា្រយបញ្ហាអត់ការងារធ្វើរបស់យុវជន តម្លើងប្រាក់ខែកម្មករ បញ្ចុះតម្លៃជីកសិកម្ម បញ្ចុះតម្លៃអគ្គិសនី និងធ្វើឲ្យកំចីរបស់ប្រជាជនមានអត្រាការប្រាក់ទាប។ បន្ថែមពីនេះ គណបក្សហ្វុនស៊ិនប៉ិចនឹងជំរុញវិស័យអប់រំឲ្យទំនើប បំបាត់គ្រឿងញៀន លើកកម្ពស់វិស័យសុខាភិបាល ឧបត្ថម្ភប្រាក់ដល់មនុស្សចាស់ និងគ្រប់គ្រងធនធានធម្មជាតិឲ្យបានល្អផងដែរ។

នៅ​ថ្ងៃ​ទី​២​នៃ​យុទ្ធនា​ការ​ឃោសនា​បោះ​ឆ្នោត​ វិទ្យុ​បារាំង​អន្តរ​ជាតិ​RFI ​បាន​សម្ភាស​គណ​បក្ស​ប្រ​ជា​ធិប​តេយ្យ​មូល​ដ្ឋាន​។ ​គណ​បក្ស​ដែល​មាន​លេខ​រៀង​ទី​១១​ នេះ​បាន​ដាក់​ចេញ​គោល​នយោបាយ​ចំនួន​១១​ចំណុច​ ក្នុង​នោះ​ក៏​មាន​ដែរ​ការ​សន្យា​ដោះ​ស្រាយ​បំណុល​របស់​ប្រជា​ពលរដ្ឋ ​បើ​គណ​បក្ស​នេះ​ទៅ​ដឹក​នាំ​រដ្ឋា​ភិបាល​។​ ប៉ុន្តែ​ប្រសិន​បើ​គណ​បក្ស​នេះ​បាន​ជាប់​ត្រឹម​តែ​តំ​ណាង​រាស្ត្រ​មួយ​អាសនៈ​ នោះ  ​ការ​ងារ​ដំបូង​គឺ​ស្នើ​ដូរ​សមាស​ភាព​គ.ជ.ប​បច្ចុប្បន្ន​នេះ​ចេញ​។​ នេះ​ជាការ​លើក​ឡើង​របស់​ លោក ​យ៉េង​ វីរៈ​ ប្រ​ធាន​គណ​បក្ស​។

ចាប់ពី​ថ្ងៃទី​០១​កក្កដា ​រហូត​ដល់​ថ្ងៃ​ទី​២១​កក្កដា ​គឺ​ជា​យុទ្ធនាការ​ឃោសនា​របស់​គណបក្ស​នយោបាយ​ទាំង​១៨​ ដែល​នឹង​ត្រូវ​ចូល​រួម​ប្រកួត​ប្រជែង​ការ​បោះឆ្នោត​ជ្រើសតាំង​តំណាងរាស្ត្រ​នីតិកាល​ទី៧។​ នៅ​ថ្ងៃ​ដំបូង​នេះ ​គណបក្ស​ប្រជាជនកម្ពុជា​ ដែល​ជា​គណបក្ស​កាន់​អំណាច​ បាន​ជួប​ជុំ​សមាជិក​របស់​ខ្លួន​ជាង​៧​ម៉ឺន​ ដើម្បី​ដង្ហែ​ក្បួន​ឃោសនា។​ លោក​ សុខ ឥសាន​ អ្នក​នាំពាក្យ​គណបក្ស​ប្រជាជនកម្ពុជា​ បញ្ជាក់​ថា​ គណបក្ស​ប្រជាជនកម្ពុជា​នឹង​លើក​យក​គោលនយោបាយ​អាទិភាព ​ដែល​ខ្លួន​ដាក់​ចេញ​ មក​ឃោសនា​ប្រាប់​ប្រជាពលរដ្ឋ។​ តាម​លោក​ សុខ ឥសាន ​បក្សប្រជាជន​កម្ពុជា ​ក៏​នឹង​ត្រៀម​បញ្ចូល​ឈាមជ័រ​អ្នក​បន្តវេន​ កញ្ចប់​គណៈ​រដ្ឋ​មន្ត្រី​ថ្មី​ ប្រសិន​បើ​គណបក្ស​ប្រជាជន​កម្ពុជា​ឈ្នះ​ឆ្នោត។​

រដ្ឋាភិបាលកម្ពុជាទើបតែប្រកាសឲ្យអនុវត្តរបបថែទាំសុខភាពតាមប្រព័ន្ធមូលនិធិសមធម៌សុខាភិបាល សម្រាប់បុគ្គលបម្រើការក្នុងសេវាកម្សាន្តទេសចរណ៍ នៃសេដ្ឋកិច្ចក្រៅប្រព័ន្ធ។ បុគ្គលបម្រើការក្នុងសេវាកម្សាន្តទេសចរណ៍ នៃសេដ្ឋកិច្ចក្រៅប្រព័ន្ធ ដែលសំដៅ ដល់អ្នកបម្រើសេវាកម្មតាមរង្គសាល ខារ៉ាអូខេ កន្លែងម៉ាស្សា ជាដើម។ លោក ចន ណារិទ្ធ អនុរដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ និងជាអគ្គលេខាធិការក្រុមប្រឹក្សាជាតិគាំពារសង្គម បានឲ្យដឹងថា​ ប្រព័ន្ធមូលនិធិសមសុខាភិបាលនេះ នឹងរ៉ាប់រងការព្យាបាលរបស់អ្នកទាំងនោះ នៅមន្ទីរពេទ្យរដ្ឋ។ តាមលោក ចន ណារិទ្ធ ក្រុមអ្នកបម្រើសេវាកម្មតាមខារ៉ាអូខេ រង្គសាល ជាដើមនោះ ងាយប្រឈមនឹងហានិភ័យសុខភាព ដែលរដ្ឋាភិបាលត្រូវផ្តល់ការគាំពារ។