បទសម្ភាស

By RFI ខេមរភាសា / Khmer

បទសម្ភាស episodes

September 01, 2022 លោកស្រី ភឿង សកុណា៖ ប្រតិកម្មរបស់មហាជនលើរឿងប្រលងបវរកញ្ញាគឺដោយសារគាត់ស្រលាញ់វប្បធម៌ជាតិ
ក្រុមការងារអន្តរក្រសួង ដែលដឹកនាំដោយក្រសួងវប្បធម៌នៅថ្ងៃព្រហស្បតិ៍នេះ បានបើកកិច្ចប្រជុំជុំវិញការ បង្ហាញភាពស៊ិចស៊ី ដែលបានកើតឡើងតាមរយៈការប្រលងបវរកញ្ញា Miss Grand Cambodia រៀបចំឡើងដោយក្រុមហ៊ុនមហាហង្សកាលពីពេលថ្មីៗនេះ។ លោកស្រី ភឿង សកុណា រដ្ឋមន្ត្រីក្រសួងវប្បធម៌ និងវិចិត្រសិល្បៈ បានទទួលស្គាល់ថាប្រតិកម្មរបស់មហាជនជុំវិញការប្រលងបវរកញ្ញា ដែលមានគ្រងឈុតស៊ិចស៊ី ក៏ដោយសារតែពួកគាត់មានការយកចិត្តទុកដាក់ យល់ដឹង និងស្រលាញ់វប្បធម៌ជាតិ។ តាមលោកស្រីរដ្ឋមន្ត្រី មហាជនគឺជាភ្នែកជាច្រៀករបស់ស្ថាប័នរដ្ឋ ជួយណែនាំគ្នានៅពេលដែលមានការខុសឆ្គង និងជួយលើកទឹកចិត្តគ្នានៅពេលដែលមានស្នាដៃសម្រេចថ្មី។
10 min
August 31, 2022 លោក ឈឹម សុធារ៉ា៖ «ពានរង្វាន់ណូបែលអាស៊ី» ជាការលើកទឹកចិត្តមួយ តែមានការងារច្រើនទៀតដែលត្រូវធ្វើសម្រាប់ដោះស្រាយបញ្ហាជំងឺផ្លូវចិត្តនៅស្រុកខ្មែរ
ភ្ញៀវប្រចាំថ្ងៃរបស់វិទ្យុបារាំងអន្ដរជាតិនាថ្ងៃនេះ គឺលោកវេជ្ជបណ្ឌិត ឈឹម សុធារ៉ា នាយកប្រតិបត្តិអង្គការចិត្តសង្គមអន្ដរវប្បធម៌ ហៅកាត់ថា TPO។ មូលនិធិ Raymon Magsaysay នៅថ្ងៃទី៣១ ខែសីហានេះ បានប្រកាសផ្ដល់ពានរង្វាន់ Raymon Magsaysay ឬហៅម្យ៉ាងទៀតថា «ពានរង្វាន់ណូបែលអាស៊ី» លើកទី៦៤ ឆ្នាំ២០២២ ដល់លោកវេជ្ជបណ្ឌិត ឈឹម សុធារ៉ា។ សម្រាប់លោកវេជ្ជបណ្ឌិត ពានរង្វាន់នេះ គឺជាការលើកទឹកចិត្តដ៏មហិមាសម្រាប់រូបលោក ដែលបានចំណាយពេលសិក្សា និងបម្រើការងារនៅក្នុងវិស័យពិគ្រោះនិងព្យាបាលអ្នកជំងឺផ្លូវចិត្តនៅកម្ពុជាអស់រយៈពេល៣ទសវត្សមកហើយ។ ប៉ុន្តែយ៉ាងណាក៏ដោយ ការខិតខំប្រឹងប្រែងរបស់លោកតែម្នាក់ឯងមិនទាន់គ្រប់គ្រាន់ទេ។ លោកវេជ្ជបណ្ឌិតចង់ឃើញសង្គមខ្មែរ រួមគ្នាផ្តោតការយកចិត្តទុកដាក់លើជំងឺផ្លូវចិត្ត និងជាពិសេស ទៅថ្ងៃមុខ លោកសង្ឃឹមថារដ្ឋាភិបាលនឹងអាចពិចារណាផ្ដល់ការធានារ៉ាប់រងសុខភាពផ្លូវចិត្តដល់ពលរដ្ឋផងដែរ។
12 min
August 30, 2022 លោក សុខ ថុល៖ អាជ្ញាធរបន្តរក្សាឱសានវាទឲ្យអ្នកជួបជុំចាកចេញពីចំការលោកខឹម វាសនា នៅយប់នេះ
អាជ្ញាធរខេត្តសៀមរាបនៅតែប្រកាន់ជំហរដដែលឲ្យពលរដ្ឋដែលជាអ្នកគាំទ្រគណបក្សសម្ព័ន្ធដើម្បីប្រជាធិបតេយ្យ(LDP) ចាកចេញពីកន្លែងប្រមូលផ្តុំគ្នានៅចំការលោក ខឹម វាសនា នាជើងភ្នំគូលែន ខណៈដែលអាជ្ញាធរមើលឃើញថាការចាកចេញមានតិចតួច។ នៅថ្ងៃនេះដែរ គណបក្ស LDP ប្រចាំខេត្តសៀមរាបបានចេញលិខិតសុំការអនុញ្ញាតជួបជុំគ្នារហូតដល់ដំណាច់ខែកញ្ញា ក៏ប៉ុន្តែលោក សុខ ថុល នាយករដ្ឋបាល និងជាអ្នកនាំពាក្យសាលាខេត្តសៀមរាបបញ្ជាក់ប្រាប់វិទ្យុបារាំងRFI ថា អាជ្ញាធរខេត្តនឹងមិនអនុញ្ញាតទេ ដោយសារសកម្មភាពនេះ ជាការជួបជុំគ្នាបែបសាសនា តែក្រោយមកបានប្រែក្លាយទៅជារូបភាពជួបជុំបែបនយោបាយ ដែលមិនសមស្របតាមច្បាប់។ ទោះយ៉ាងណា អ្នកនាំពាក្យសាលាខេត្តរូបនេះ មិនបានបញ្ជាក់ទេថាអាជ្ញាធរនឹងបង្ក្រាបដោយរូបភាពណាទេ ប្រសិនបើយប់នេះ អ្នកគាំទ្រ LDP នៅតែមិនព្រមចាកចេញ។
10 min
August 29, 2022 លោក ពុយ គា៖ ទឹកមាត់កម្ពុជាកាន់តែប្រៃ នៅពេលធ្វើជាប្រធានអាស៊ានប្ដូរវេនលើកទី៣
ភ្ញៀវប្រចាំថ្ងៃរបស់វិទ្យុបារាំងអន្ដរជាតិ RFI នាថ្ងៃនេះ គឺលោក ពុយ គា អ្នកកាសែតជំនាញទាក់ទងនឹងនយោបាយនៃអាស៊ាន និងជាអ្នកឆ្លើយឆ្លងព័ត៌មានឲ្យទីភ្នាក់ងារព័ត៌មាន Kyodo របស់ជប៉ុន។ នៅក្នុងកិច្ចសម្ភាសថ្ងៃនេះ អ៊ឹម រចនា បានសាកសួរលោក ពុយ គា អំពីការងាររបស់កម្ពុជាក្នុងតំណែងជាប្រធានប្ដូរវេនអាស៊ាន ដែលនឹងត្រូវបិទបញ្ចប់ក្នុងរយៈពេល៣ខែខាងមុខ។ សម្រាប់លោក ពុយ គា នៅក្នុងរយៈពេល៣ខែទៅមុខទៀតនេះ កម្ពុជា ក្នុងនាមជាប្រធានផ្លាស់វេនអាស៊ាន នៅមានការងារជាច្រើនទៀតដែលត្រូវធ្វើ។ ប៉ុន្តែការងារទាំងអស់នោះ ទំនងជាមិនពិបាកហួសពីសមត្ថភាពរបស់កម្ពុជាទេ នៅពេលដែលទឹកមាត់កម្ពុជា «ប្រៃជាងមុន» ក្រោយមានបទពិសោធធ្វើជាប្រធានផ្លាស់វេនអាស៊ាន២ដងកន្លងមក។
14 min
August 27, 2022 អ្នកស្រី សុខ ស្រីនួន៖ ខ្ញុំបារម្ភពីការចាប់ខ្លួន ប្រសិនគ្មានប្រាក់៥លានរៀលបង់ផាកពិន័យ
គណៈកម្មាធិការជាតិរៀបចំការបោះឆ្នោត(គ.ជ.ប) បានបង្គាប់ឲ្យអ្នកស្រី សុខ ស្រីនួន ជំទប់ទី២ឃុំ ព្រះធាតុមកពីគណបក្សភ្លើងទៀនបង់ប្រាក់ផាកពិន័យ៥លានរៀលទៅគណៈកម្មការរៀបចំការបោះឆ្នោតខេត្តត្បូងឃ្មុំ ក្នុងរយៈពេល៣០ថ្ងៃ។ នេះគឺជាចំណាត់ការធ្វើឡើងទៅតាមបណ្តឹងរបស់មន្ត្រីគណបក្សកាន់អំណាច បន្ទាប់ពីសមាជិកគណបក្សប្រឆាំងរូបនេះផ្សព្វផ្សាយរូបភាពទឹកប្រាក់២ម៉ឺនរៀលភ្ជាប់នឹងរូបភាពគណបក្សប្រជាជនកម្ពុជា។ មន្ត្រីគណបក្សកាន់អំណាចចាត់ទុកថានេះជាការបរិហាកេរ្តិ៍ ហើយប្តឹងទៅតុលាការបន្ថែមពីលើបណ្តឹងទៅគ.ជ.ប។ អ្នកស្រី សុខ ស្រីនួន សំដែងការបារម្ភពីការចាប់ខ្លួន ប្រសិនគ្មានប្រាក់ ៥លានរៀលបង់ផាកពិន័យនេះ។
13 min
August 26, 2022 លោក វីធិត ម៉ានតាផន៖ «ដំណើរទស្សនកិច្ចខ្ញុំនៅកម្ពុជា មានភាពស្ថាបនា តែមិនមែនខ្ញុំយល់ស្របរាល់គ្រប់បញ្ហា»
ដំណើរទស្សនកិច្ចនៅកម្ពុជាចំនួន១១ថ្ងៃ របស់លោក វីធិត ម៉ានតាផន អ្នករាយការណ៍ពិសេសទទួលបន្ទុកសិទ្ធិមនុស្សរបស់អង្គការសហប្រជាជាតិប្រចាំកម្ពុជា បានបញ្ចប់នៅថ្ងៃសុក្រទី២៦សីហានេះ។ មុនចាកចេញពីកម្ពុជា លោក វីធិត ម៉ានតាផន បានធ្វើសន្និសីទសារព័ត៌មានដោយចាត់ទុកដំណើរទស្សនកិច្ចរបស់លោក មានភាពស្ថាបនា។ ឆ្លើយទៅនឹងសំណួរ ជួប នរក្សា លោក វីធិត ម៉ានតាផន បានបញ្ជាក់ថា ទោះបីដំណើរទស្សនកិច្ចរបស់លោកមានភាពស្ថាបនា ដោយលោកបានជួបគ្រប់តួអង្គក៏ដោយ តែមិនមែនមានភាពន័យថា លោកយល់ស្របលើគ្រប់បញ្ហានោះទេ។ តាមលោក វីធិត ដំណើរមកកម្ពុជាពេលនេះ គឺក្នុងបំណងពិនិត្យមើលតថភាពសិទ្ធិមនុស្ស និងប្រជាធិបតេយ្យជាក់ស្តែង ដើម្បីឲ្យលោកអាចធ្វើរបាយការណ៍ផ្ទាល់មាត់ទៅក្រុមប្រឹក្សាអង្គការសហប្រជាជាតិ នាខែតុលាខាងមុខ។
14 min
August 25, 2022 លោក ឃឹម ហ្វីណង់៖ ស្ថាប័នពាក់ព័ន្ធនឹងប្រឹងប្រែងជួយឲ្យពលរដ្ឋនៅភូមិធម្មជាតិរុនតាឯក រស់នៅបានសុខស្រួល
ភ្ញៀវប្រចាំថ្ងៃរបស់វិទ្យុបារាំងអន្ដរជាតិនារាត្រីនេះ គឺលោក ឃឹម ហ្វីណង់ អភិបាលស្រុកបន្ទាយស្រី នៃខេត្តសៀមរាប។ អាជ្ញាធរខេត្តសៀមរាប និងអាជ្ញាធរនៃក្រសួងពាក់ព័ន្ធគ្រប់លំដាប់ថ្នាក់ កំពុងរៀបចំហេដ្ឋារចនាសម្ព័ន្ធបន្ថែមថ្មី នៅភូមិធម្មជាតិរុនតាឯក នៃស្រុកបន្ទាយស្រី សម្រាប់ពលរដ្ឋដែលយល់ព្រមរុះរើសំណង់ខុសច្បាប់ចេញពីតំបន់រមនីយដ្ឋានអង្គរ។ លោក ឃឹម ហ្វីណង់ អភិបាលស្រុកបន្ទាយស្រី លើកឡើងថា ការងារដែលត្រូវធ្វើមានច្រើន និងទាមទារការចូលរួមពីគ្រប់ភាគីពាក់ព័ន្ធ។ តែលោកមានជំនឿថា ក្រុមការងារតម្រង់ទិសដឹកនាំដោយលោករដ្ឋមន្ដ្រី ជា សុផារ៉ា និងរាជរដ្ឋាភិបាលកម្ពុជា នឹងប្រឹងប្រែងធានាឲ្យបានថា ប្រជាជនដែលរស់នៅភូមិធម្មជាតិរុនតាឯក រស់នៅបានសុខស្រួល ទាំងក្នុងជីវភាពប្រចាំថ្ងៃ និងជាពិសេសផ្នែកសេដ្ឋកិច្ច។
12 min
August 24, 2022 លោក អាត់ ធន់៖ ការស្នើសុំតម្លើងប្រាក់ឈ្នួលកម្មករកាត់ដេរឆ្នាំ២០២៣ អាចមានភាពវិជ្ជមានច្រើន
ការចរចាត្រីភាគីក្រោមរូបភាពក្រុមប្រឹក្សាជាតិប្រាក់ឈ្នួលអប្បបរមា ដើម្បីកំណត់ប្រាក់ឈ្នួលកម្មករ និយោជិតវិស័យវាយនភណ្ឌ កាត់ដេរ ផលិតស្បែកជើង និងសម្ភារៈធ្វើដំណើរឆ្នាំ២០២៣ នាថ្ងៃទី២៤ ខែសីហានេះបានប្រព្រឹត្តទៅដោយមិនទាន់មានចំណុចព្រមព្រៀងគ្នាណាមួយនៅឡើយ។ ភាគីសហជីពកម្មករ បានស្នើតម្លើងប្រាក់ឈ្នួល ២១៥ដុល្លារ តែភាគីនិយោជកបានរក្សាជំហរប្រាក់ឈ្នួល ១៩៤ដុល្លារ ដូចការតម្លើងសម្រាប់ឆ្នាំ២០២២។ ខណៈដែលការចរចានៅបន្តច្រើនជុំទៀត លោក អាត់ ធន់ ប្រធានសហភាពការងារកម្ពុជាបានថ្លែងប្រាប់វិទ្យុបារាំង RFI ថាការចរចាប្រាក់ឈ្នួលកម្មករកាត់ដេរសម្រាប់ឆ្នាំ២០២៣ មានការរំពឹងទុកជាវិជ្ជមានខ្ពស់ជាងឆ្នាំ២០២២ ដោយសារកត្តាមួយចំនួន ក្នុងនោះក៏មានកត្តានយោបាយផងដែរ។
14 min
August 23, 2022 លោក មាស សុភ័ណ្ឌ៖ ក្រសួងនឹងតាមដានការផ្សាយរបស់អង្គភាពសារព័ត៌មាន ជុំវិញការគោរពច្បាប់និងក្រមសីលធម៌ វិជ្ជាជីវៈសារព័ត៌មាន
នៅក្នុងពិធីចែកសញ្ញាបត្រដល់និស្សិតសាកលវិទ្យាល័យអាស៊ី-អឺរ៉ុបនាព្រឹកថ្ងៃអង្គារនេះ លោកនាយករដ្ឋមន្ត្រី ហ៊ុន សែន បានដាក់បញ្ជាឲ្យក្រសួងព័ត៌មានចាត់វិធានការដកអាជ្ញាបណ្ណសារព័ត៌មានណា ដែលមានការជេរប្រមាថ។ បទបញ្ជារបស់នាយករដ្ឋមន្ត្រីដូច្នេះ បានធ្វើឡើងបន្ទាប់ពីក្រសួងព័ត៌មានបានដកអាជ្ញាបណ្ណពីសារព័ត៌មាន sbtpost របស់លោកសាន្ត ប៊ុនធឿន ពាក់ព័ន្ធនឹងទង្វើអសីលធម៌ ជេរប្រមាថជាសាធារណៈ។ លោក មាស សុភ័ណ្ឌ អ្នកនាំពាក្យក្រសួងព័ត៌មានថ្លែងប្រាប់វិទ្យុ RFI ថាជាវិធានការ ក្រសួងនឹងពិនិត្យតាមដានការផ្សព្វផ្សាយក៏ដូចជាការធ្វើអត្ថាធិប្បាយរបស់អង្គភាពសារព័ត៌មាន និងអ្នកសារព័ត៌មាននានា ថាតើមានការអនុលោមទៅតាមច្បាប់ស្តីពីរបបសារព័ត៌មាន និងក្រមសីលធម៌វិជ្ជាជីវៈសារព័ត៌មានដែរ ឬយ៉ាងណា។
11 min
August 22, 2022 លោក សុន ឆ័យ៖ អ្នករាយការណ៍ពិសេសUNនឹងតាមឃ្លាំមើលសំណុំរឿងរបស់ខ្ញុំនៅតុលាការនាពេលខាងមុខនេះ
ភ្ញៀវប្រចាំថ្ងៃរបស់វិទ្យុយើងនារាត្រីនេះគឺលោក សុន ឆ័យ អនុប្រធានគណបក្សភ្លើងទៀន។ ថ្នាក់ដឹកនាំនៃគណបក្សភ្លើងទៀន កាលពីថ្ងៃអាទិត្យទី២១សីហា បានទទួលជួបលោក វីទីត មុនតាប៊ន អ្នករាយការណ៍ពិសេសទទួលបន្ទុកសិទ្ធិមនុស្សរបស់អង្គការសហប្រជាជាតិប្រចាំកម្ពុជា។ ក្នុងជំនួបនោះ ថ្នាក់ដឹកនាំរបស់គណបក្សភ្លើងទៀន បានបញ្ជាក់ប្រាប់អ្នករាយការណ៍ពិសេសទទួលបន្ទុកសិទ្ធិមនុស្ស អំពីស្ថានភាពបោះឆ្នោតឃុំ-សង្កាត់ និងការធ្វើទុក្ខបុកម្នេញលើសកម្មជននយោបាយគណបក្សភ្លើងទៀន។ លោក សុន ឆ័យ បានបញ្ជាក់បន្ថែមថា ជំនួបនេះគឺលោក វីទីត មុនតាប៊ន ចង់ជួបលោករូបដោយផ្ទាល់ ដើម្បីស្វែងយល់និងឃ្លាំមើលក្តីក្តាំរបស់លោកនៅតុលាការពេលខាងមុខ៕
10 min