يوم 1/ فبراير ... مكالمة الصباح

: أهلاً أبوي كيف حالك؟

: كل سنة وانت سالمة يابا 

: وانت سالم حبيبي، والله يا بابا مش حابة هالرقم أبداً

يقهقه والدي ضاحكاً: والله يابا حتى رقمي مش عاجبني بس شو بدنا نسوي؟

(ضحكت مجدداً): عنجد بابا، أول مرة بنزعج من رقم 

خلص يابا حطي الرقم اللي بدك إياه ولا يهمك 

ضحكنا ثم سألني مشيرا الى تهديد ترامب بضم كندا: شو رح تصيروا أميركان؟

والله بابا الناس والبلد مستنفرة، الدولار الكندي نازل والناس بلشت تحكي عن مقاطعة البضائع الأميركية!

هذا الزلمة بلشان في الكل المهم انه نشوفكم السنة 

ان شاء الله حبيبي أبوي 

المكالمة الثانية.... الأسبوع الثاني من فبراير 

بالصدفة رأيت اللون الأخضر على صورة حساب صديقي في تطبيق الفيسبوك 

 مرحبا جورج طمني عنك وعن العيلة

 والله الحمد لله بخير ماشي الحال (بدا صوته مرتاحاً قليلاً عن آخر مرة تحدثنا بها عندما تغير النظام في سوريا)

حبيت أسمع أخباركم وأطمّن عليكم

الأمور منيحة بالشام لكن في المناطق الأخرى في عدم استقرار وهينا عم ننطر لنشوف شو رح يصير

والله من هالناحية يا صديقي كلنا عم ننطر لنشوف شو رح يصير 

ضحك جورج: يعني كل العالم على كف عفريت بس الشرق الأوسط قصة ثانية من أيام الديناصورات ما شفنا يوم زي العالم والناس!

عن جد قديش جيلنا شاف وعاش قصص وحروب وتغيير! 

وهلأ على وجه أبو بريص كل شي ممكن يصير! 

الله يهدي البال 

المكالمة الثالثة (حلم)

ألو ماما يا قلبي

أهلا حبيبتي 

 اشتقت لك كثير كثير، كيف الجنة؟

حلوة يا قلبي 

 شو أحلى شي فيها؟

فيها كثير صغار حلوين من غزة وما فيها مجرمين حرب!