ព្រឹត្តិការណ៍​កម្ពុជា​ប្រចាំថ្ងៃ by RFI ខេមរភាសា / Khmer

July 31, 2020 ព្រឹត្តិការណ៍កម្ពុជាប្រចាំថ្ងៃ - តើអន្តរាគមន៍របស់រដ្ឋដើម្បីសង្គ្រោះ SME ក្នុងដំណាក់កាលកូវីដ នឹងមានប្រសិទ្ធភាពដែរឬទេ?

ដើម្បីស្រោចស្រង់វិស័យសហគ្រាសធុនតូចនិងមធ្យម(SME) ដែលកំពុងរងផលប៉ះពាល់ដោយសារកូវីដ១៩ តំណាងរដ្ឋាភិបាល បានលើកឡើងនៅក្នុងឱកាសនៃសន្និសីទកាសែតកាលពីថ្ងៃម្សិលមិញថា រដ្ឋាភិបាលបានត្រៀមថវិកាប្រមាណជា៥០០លានដុល្លារបន្ថែមទៀតសម្រាប់ដំណាក់កាលទី២។ ការបង្ហាញពីសុឆន្ទៈរបស់រដ្ឋាភិបាលក្នុងការជួយទៅដល់ SME ដូច្នេះធ្វើឡើងបន្ទាប់ពីដំណាក់កាលទី១ដែលមានទឹកប្រាក់សរុបចំនួន១៥០លានដុល្លារ ត្រូវបានដាក់ឲ្យអនុវត្តរួចហើយ ក៏ប៉ុន្តែ SME មួយចំនួន មិនមានលទ្ធភាពអាចទទួលឥណទាននេះបាន ដោយសារមិនមានទ្រព្យបញ្ចាំ។ ចំណុចនេះត្រូវបានអន្តរាគមន៍ដោយរដ្ឋនៅកម្ចីឥណទានជំហ៊ានទី២នេះ។

13 min

July 30, 2020 ព្រឹត្តិការណ៍កម្ពុជាប្រចាំថ្ងៃ - ក្នុងអំឡុងវិបត្តិកូវីដ ១៩៖ តើការអនុវត្តការងាររបស់អ្នកការពារសិទ្ធិមនុស្សនៅកម្ពុជាមានស្ថានភាពយ៉ាងណា?

លោកស្រីរ៉ូណា ស្មីត អ្នករាយការណ៍ពិសេសរបស់អង្គការសហប្រជាជាតិស្តីពីស្ថានភាពសិទ្ធិមនុស្សនៅក្នុងប្រទេសកម្ពុជា រួមនឹងអ្នកជំនាញសិទ្ធិមនុស្សអន្តរជាតិ៣រូបទៀតបានបង្ហាញការព្រួយបារម្ភអំពីការអនុវត្តការងារការពារសិទ្ធិមនុស្សរបស់លោកអំ សំអាត នាយករងផ្នែកឃ្លាំមើល និងការពារសិទ្ធិមនុស្សនៃអង្គការលីកាដូ។ ក្តីព្រួយបារម្ភនេះ ត្រូវបានបង្ហាញឱ្យដឹងតាមរយៈទំព័រហ្វេសប៊ុករបស់លោកស្រីរ៉ូណា ស្មីត កាលពីថ្ងៃទី២៨ ខែកក្កដា ហើយការព្រួយបារម្ភនេះទៀតសោត ធ្វើឡើងបន្ទាប់ពីលោកអំ សំអាត ត្រូវបានលោកនាយករដ្ឋមន្រ្តីហ៊ុន សែន ព្រមានពីការចាប់ខ្លួនក្រោយពីបានអត្ថាធិប្បាយពាក់ព័ន្ធនឹងបញ្ហាជំងឺកូវីដ ១៩នៅកម្ពុជា។ ងាកមកនិយាយពីទិដ្ឋភាពរួមវិញ នៅក្នុងអំឡុងពេលនៃវិបត្តិកូវីដ១៩នេះ តើការអនុវត្តការងាររបស់អ្នកការពារសិទ្ធិមនុស្សនៅក្នុងប្រទេសកម្ពុជាមានភាពរលូនដែរឬទេ? ឬ មានឧបសគ្គមករារាំង?

12 min

July 29, 2020 ព្រឹត្តិការណ៍កម្ពុជាប្រចាំថ្ងៃ - អ្នកសេដ្ឋកិច្ចស្នើឲ្យរដ្ឋាភិបាលជ្រើសយកវិស័យកសិកម្មជំនួសឲ្យកាត់ដេរ ក្នុងការធ្វើពាណិជ្ជកម្មសេរីជាមួយចិន!

ម្សិលមិញ ភាគីពាក់ព័ន្ធបានជជែកគ្នាពីការត្រៀមខ្លួនរបស់កម្ពុជា នៅពេលដែលកិច្ចព្រមព្រៀងពាណិជ្ជកម្មសេរីទ្វេភាគីរវាងកម្ពុជានិងចិន ចូលជាធរមាននៅឆ្នាំ២០២១។ ដើម្បីទាញប្រយោជន៍ពីកិច្ចព្រមព្រៀងពាណិជ្ជកម្មសេរីនេះ ក្រសួងពាណិជ្ជកម្មបានអះអាងថា បានគិតគូរលើវិស័យអាទិភាពសំខាន់ៗមួយចំនួនរួមមានការពង្រឹងវិស័យកសិកម្ម ពង្រឹងការគ្រប់គ្រងពាណិជ្ជកម្មតាមអនឡាញ និងវិស័យកាត់ដេរជាដើម។ ប៉ុន្តែយ៉ាងណាក៏ដោយ អ្នកសេដ្ឋកិច្ចស្នើឲ្យរដ្ឋាភិបាលជ្រើសយកវិស័យកសិកម្មជាអាទិភាពជំនួសឲ្យវិស័យកាត់ដេរ ក្នុងការធ្វើពាណិជ្ជកម្មសេរីជាមួយចិន។ ហេតុអ្វីជ្រើសយកវិស័យកសិកម្ម ?

12 min

July 28, 2020 ព្រឹត្តិការណ៍កម្ពុជាប្រចាំថ្ងៃ - ការបន្តលុបបឹងក្រោមគម្រោងអភិវឌ្ឍន៍៖ ត្រូវសិក្សាពីផលប៉ះពាល់ និងផលប្រយោជន៍រួម

ផ្ទៃបឹងទំពុនដែលជាទ្រព្យសម្បត្តិសាធារណៈរបស់រដ្ឋពីមុនគឺមានទំហំ១.៥០០ហិកតា ប៉ុន្តែឥឡូវនេះគ្រោងកាត់មកនៅសល់ត្រឹម១០៧ ហិកតាតែប៉ុណ្ណោះ។ នេះបើតាមអនុក្រឹត្យរបស់រដ្ឋាភិបាលនៅចន្លោះ ឆ្នាំ២០១៧ និងឆ្នាំ២០១៩ ដែលត្រូវបានលើកឡើងក្នុងរបាយការណ៍ថ្មីមួយទៀតរបស់អង្គការសង្គមស៊ីវិលក្នុងស្រុកចំនួន៤ចេញផ្សាយម្សិលមិញ។ អង្គការដែលធ្វើការងារខាងសិទ្ធិមនុស្សទាំងនេះ បានព្រមានថា «បើគ្មានតំបន់បឹងទាំងនេះទេ ប្រជាជនជាងមួយលាននាក់នៅក្នុងរាជធានីភ្នំពេញនឹងប្រឈមការកើនឡើងនៃទឹកជំនន់»។ ដូច្នេះការបន្តលុបបឹងក្រោមគម្រោងអភិវឌ្ឍន៍គឺត្រូវតែសិក្សាពីផលប៉ះពាល់ និងផលប្រយោជន៍រួមជាជាងផលប្រយោជន៍បុគ្គល។

11 min

July 27, 2020 ព្រឹត្តិការណ៍កម្ពុជាប្រចាំថ្ងៃ - ការដោះលែងអ្នកជាប់ឃុំ៖អង្គការសិទ្ធិមនុស្សកែសម្រួលសេចក្តីថ្លែងការណ៍របស់ខ្លួន បន្ទាប់ពីមានប្រតិកម្មពីរដ្ឋាភិបាល

អ្នកនាំពាក្យក្រសួងយុត្តិធម៌បានបដិសេធជាថ្មីទៀត កាលពីថ្ងៃអាទិត្យម្សិលមិញ ចំពោះសេចក្តីថ្លែងការណ៍របស់អង្គការសិទ្ធិមនុស្សលីកាដូ និងអង្គការលើកលែងទោស អន្តរជាតិដែលអំពាវនាវឲ្យរដ្ឋាភិបាលគោរពការសន្យាដោយដោះលែងអ្នកជាប់ឃុំមួយម៉ឺននាក់ ដើម្បីដោះស្រាយភាពចង្អៀតណែនក្នុងពន្ធនាគារ។ក្រោយប្រតិកម្មពីរដ្ឋាភិបាល អង្គការសិទ្ធិមនុស្សទាំងពីរនេះបានធ្វើការកែសម្រួលសេចក្តីថ្លែងការណ៍របស់ខ្លួនឡើងវិញ តែនៅរក្សាជំហរដដែលក្នុងការជំរុញឲ្យរដ្ឋាភិបាលពន្លឿនការដោះស្រាយភាពចង្អៀតណែនក្នុងពន្ធនាគារ។

11 min

July 26, 2020 ព្រឹត្តិការណ៍កម្ពុជាប្រចាំថ្ងៃ - កូវីដ១៩៖ តើអាចជាលេស ដែលថៅកែបិទរោងចក្រ ដោយមិនមានសំណងដល់កម្មករ?

គិតត្រឹមចុងសប្តាហ៍មុននេះ យ៉ាងហោចណាស់មានរោងចក្រប្រមាណជា៤២០ រោងចក្រ បានប្រកាស ព្យួរនិងបិទ ដោយសាររងផលប៉ះពាល់ពីវិបត្តិនៃជំងឺកូវីដ១៩។ ស្របពេលជាមួយគ្នានេះ ក្រុមសហជីពធំៗមួយចំនួននៅកម្ពុជា បានដាក់ការព្រួយបារម្ភថា កូវីដ១៩ អាចជាលេសដែលថៅកែរោងចក្រមួយចំនួនបានយកមកប្រើប្រាស់ ដើម្បីឈានទៅបិទរោងចក្ររបស់ខ្លួន ដោយមិនមានសំណងត្រឹមត្រូវដល់កម្មករនៅក្នុងកាលៈទេសៈដូចពេលបច្ចុប្បន្ននេះ។ តើអ្វីទៅជាដំណោះស្រាយ?

13 min

July 25, 2020 ព្រឹត្តិការណ៍កម្ពុជាប្រចាំថ្ងៃ - ការបង្ក្រាបបទល្មើសគ្រឿងញៀនកើនឡើង៖តើបង្ហាញពីប្រសិទ្ធភាព ឬអប្រសិទ្ធភាពការងាររបស់អាជ្ញាធរកម្ពុជា?

នៅក្នុងឆមាសទី១ក្នុងឆ្នាំ២០២០នេះ សមត្ថកិច្ចកម្ពុជាបង្ក្រាបបទល្មើសគ្រឿងញៀនបានចំនួន៥.៤៦៣ករណី គឺបានកើនឡើងចំនួន ១.២៨៨ករណី ស្មើនឹង៣០.៨៥% បើប្រៀបធៀបនឹងឆមាសទី១ក្នុងឆ្នាំ២០១៩។ សមត្ថកិច្ចកម្ពុជាក៏បានឃាត់ខ្លួនមនុស្សចំនួន១០.៨៧៧នាក់ គឺបានកើនឡើងចំនួន១.៩៦៦នាក់ ស្មើនឹង២២.០៦% ក្នុងនោះមានជនជាតិខ្មែរ១០.៧០០នាក់ និងជនបរទេស១៧៧នាក់។ នេះបើតាមរបាយការណ៍របស់អាជ្ញាធរជាតិប្រយុទ្ធប្រឆាំងគ្រឿងញៀន ។ បើតាមរបាយការណ៍ដដែល ការរឹបអូសគ្រឿងញៀនវិញ មានចំនួន២៦១គីឡូក្រាម គឺបានថយចុះ៨០គីឡូ ក្រាម ស្មើនឹង២៣,៤៣%។ តើកំណើននៃការបង្រ្កាបគ្រឿងញៀននេះ បង្ហាញពីប្រសិទ្ធភាព ឬអប្រសិទ្ធភាពការងាររបស់អាជ្ញាធរកម្ពុជា?

11 min

July 24, 2020 ព្រឹត្តិការណ៍កម្ពុជាប្រចាំថ្ងៃ - តើប្រទេសកម្ពុជាមានការគ្រប់គ្រងនិងប្រើប្រាស់ទុនបំរុងអន្តរជាតិយ៉ាងណា?

ធនាគារជាតិកម្ពុជា ក៏ដូចជាប្រមុខរដ្ឋាភិបាលកម្ពុជា កាលពីថ្ងៃព្រហស្បតិ៍ម្សិលមិញ បានបង្ហាញពីតួលេខច្បាស់ៗថាប្រទេសកម្ពុជាមានទុនបំរុងអន្តរជាតិប្រមាណ១៩,៥ ពាន់លានដុល្លារ គិតត្រឹមចុងខែមិថុនាក្នុងនោះមានមាសចំនួន៣៦,៥តោន។ ជុំវិញការរក្សាបាននូវកំណើនទុនបំរុងអន្តរជាតិជារៀងរាល់ឆ្នាំនេះ អ្នកជំនាញសេដ្ឋកិច្ច នៅក្នុងប្រទេសកម្ពុជា បានវាយតម្លៃថាប្រទេសមួយនេះ មានការគ្រប់គ្រងនិងប្រើប្រាស់បានល្អ នូវទុនបំរុងអន្តរជាតិ ធៀបទៅនឹងស្ថានភាពសេដ្ឋកិច្ចរបស់ប្រទេស ដែលមានប្រជាជន១៦លាននាក់។

10 min

July 23, 2020 ព្រឹត្តិការណ៍កម្ពុជាប្រចាំថ្ងៃ - តើការក្រើនរំឮករបស់តុលាការចំពោះលោកកឹម សុខា រឿងចុះទៅខេត្ត និងជួបពលរដ្ឋ ជាការបិទសេរីភាពរបស់លោកឬ?

សាលាដំបូងរាជធានីភ្នំពេញកាលពីថ្ងៃទី២០ ខែកក្កដាបានចេញលិខិតរំឮកលោកកឹម សុខា ត្រូវមានស្មារតីគោរពឱ្យបានហ្មត់ចត់ ម៉ឺងម៉ាត់ និងត្រូវប្រកាន់ភ្ជាប់នូវកាតព្វកិច្ចដែលតុលាការបានតម្រូវដាក់លើរូបលោក។ ការក្រើនរំឮកនេះ គឺបន្ទាប់ពីលោកកឹម សុខា បានធ្វើដំណើរកម្សាន្ត និងជួបជាមួយពលរដ្ឋនៅក្នុងខេត្តចំនួន៧កាលពីពេលថ្មីៗនេះ។ តុលាការក្រុងភ្នំពេញបានអះអាងថា សកម្មភាពរបស់លោកកឹម សុខានេះ អាចនឹងឈានទៅហួសព្រំដែន ឬនាំទៅដល់ការបំពានលើកាតព្វកិច្ចនៃការត្រួតពិនិត្យតាមផ្លូវតុលាការ។ ក្រុមមេធាវីលោកកឹម សុខា និង អ្នកជំនាញសិទ្ធិមនុស្សថា ការក្រើនរំឮកនេះ ប្រៀបដូចជាការបិទសិទ្ធិដើរហើររបស់លោកកឹម សុខា។ ប៉ុន្តែ អ្នកជំនាញច្បាប់ និងសិទ្ធិមនុស្សនៃរដ្ឋាភិបាលកម្ពុជាអះអាងថា មិនមែនជាការបិទសិទ្ធិសេរីភាពអ្វីនោះឡើយ តែធ្វើឡើងតាមច្បាប់កំណត់។

11 min

July 22, 2020 ព្រឹត្តិការណ៍កម្ពុជាប្រចាំថ្ងៃ - ការរកឃើញវិជ្ជមានកូវីដ១៩ ចម្លងចូលពីខាងក្រៅមានសន្ទុះកាន់តែច្រើន តើកម្ពុជាគួរមានវិធានការថ្មីយ៉ាងណា?

កម្ពុជាបានរកឃើញអ្នកផ្ទុកវីរុសកូវីដ១៩ថ្មី២៦ករណីទៀតកាលពីម្សិលមិញដែលជាការនាំពីក្រៅ។ នេះជាករណីនាំចូលក្នុងចំនួនដ៏ច្រើនមិនធ្លាប់មាន និងជាក្ដីកង្វល់របស់ប្រមុខរដ្ឋាភិបាលនិយាយដោយឡែកនិងជាកង្វល់របស់ពលរដ្ឋទូទៅនិយាយជារួម។ ផ្អាកកុំឲ្យមានការធ្វើដំណើរពីក្រៅចូលមកកម្ពុជា ជាអ្វីដែលអ្នកឃ្លាំមើល លើកជាយោបល់ទៅរដ្ឋាភិបាល និងក្រសួងសុខាភិបាលពិចារណាបិទការហោះហើរបណ្ដោះអាសន្ន។ ការធ្វើដូច្នេះគឺដើម្បីទប់ស្កាត់ការចម្លងក្នុងសហគមន៍។ ដូច្នេះរដ្ឋាភិបាលគួរពិចារណាផ្អាកកុំឲ្យមានការធ្វើដំណើរពីក្រៅចូលមកកម្ពុជា ដើម្បីទប់ស្កាត់ការនាំចូលកូវីដ១៩?

11 min