عريس يقتل عروسه اللي لسه ما كملتش ٦ شهور معاه طعنا بالسكين. أخبار حزينة، لكنها مؤخرا بطلت تثير فينا شعور التعجب والاستغراب من كتر تكرارها وكأن فيه موجة عنف بتنتقل من بيت لبيت ومن طبقة لطبقة زي أدوار البرد والانفلونزا، لكن الجديد هنا هو سبب القتل، اعتدنا ان أسباب القتل هي رفض العروس الانصياع لأوامر العريس، أو رغبتها في الانفصال، أو خلافات مادية متعلقة بمصروف البيت. لكن المرة دي السبب و– ياللعجب – هو: ياميش رمضان. أو بمعنى أصح موسم رمضان. إذ أن العريس اللي لسه ما كملش سنة جواز كان منتظر إن أهل عروسته يجيبوله موسم رمضان واللي بيشمل لحم ودجاج وأرز ومكرونة يكفوا الشهر كله بالإضافة للمكسرات اللي الناس معتادة تتناولها في ليالي رمضان. ولما ده ما حصلش، وانتقاما لإهانة كرامته المتعمد ده، قام طاعن مراته ١٥ طعنة أنهت حياتها، عقاب لها ولأهلها على عدم احترامهم للعادات والتقاليد.