لما نبص على طفولتنا ونقارنها بطفولة أولادنا حاليا، أكيد هنلاقي اختلافات كتير منها إن كل شيء دلوقتي بقاله جدول ومواعيد والتزامات. ماعادش موجود نموذج طفولة الوقت الحر. يعني احنا كان عندنا يوم بنقسمه كيفما اتفق. شوية نلعب ع السلم، شوية فوق السطوح، ننزل نركب عجل في الشارع، نروح نلعب عند الجيران. كنا كل يوم نخترع لعبة جديدة وكل أجازة نكتشف مكان جديد حوالينا ، جنينة صغيرة في الشارع اللي ورانا، ركن هادي في الشارع ينفع نلعب فيه استغماية، قصر ثقافة أو مركز شباب فيه مكان يسمح نلعب فيه راكيت والا نألف قصص ونعمل إننا بنمثل في مسرحية. الوقت كان بتاعنا وتقسيمته واللي بيحصل فيه مسئوليتنا ومعتمد على خيالنا وابتكاراتنا.