في وقت ما ما كنتش بفهم قوي اندفاع الناس في أي مكان للتصوير مع أي مشهور يظهر في مكان عام، كنت بسأل نفسي إيه هو بالظبط الهدف من التصوير معاه؟ هل لشكر الفنان على مجهوده في إسعاد الناس؟ 

 مش دايما، في أوقات كتير كنت بسمع أصدقائي مثلا إذا صادفنا حد معروف بيقولوا حاجة زي (تعالوا أما نتصور معاه نحسسه بنفسه بدل ما هو قاعد ماحدش معبره كده)، فيه الإنسان اللي نفسه يكون مشهور فعايز ياخد نمرة الفنان عشان شايف إن هو كمان نجم بس تنقصه الفرصة.

وفيه اللي بيتصور كنوع من أنواع التفاخر الاجتماعي من باب (أنا كنت في فرح ناس جايبين المرحوم عبد الحليم حافظ نفسه، شوفتوا بأه أنا أعرف ناس جامدين ازاي.)

وفيه طبعا فئة المعجب الولهان، بس للأمانة فالمجموعة دي بحس إنها بتتناقص مع توسع السوشيال ميديا وبهتان مفهوم النجومية مع ظهور فكرة التريندات لدرجة إن حاليا الممثل المشهور هو اللي بيعزم عامل النظافة اللي انطرد من محل كشري على خروجة على أمل إن هو اللي يستفيد من شهرة العامل المطرود.

طب ده بالنسبة للنجوم الأحياء، نيجي بأه للأموات. كان برضه عندي تساؤلات كتير عن فكرة جنازة الفنان. الأفواج الكتيرة دي اللي جاية تحضر الجنازة، هل هي جاية عشان تودع أحد أبطالها؟ ، والا التزاحم على حمل النعش ده بيكون بس أملا في إن أحدهم يظهر في لقطة في التغطية الصحفية للجنازة فيقص صورته من الجرنال و يعلقها متبروزة على جدار البيت؟

الحقيقة الموضوع كان دايما بالنسبة لي مش مفهوم، وكنت دايما ببصله بحذر، ودايما فيه حتة لخبطة كده. يعني هل الفنان ده بيتبسط لما الناس تتلم عليه عشان يحس بشهرته ونجوميته وحب الجمهور؟،  والا بيتضايق ويتعصب لإنه إنسان برضه ومن حقه يمشي أو يخرج مع عيلته أو أصدقاءه بدون تطفلات ناس ما يعرفهومش؟

الأسئلة دي كلها أعيد طرحها في مخي بعد الحادثة الأخيرة اللي شد فيها معجب مطرب مشهور من بدلته في أحد الأفراح عشان ياخد معاه سيلفي فما كان من المطرب الأشهر إلا إنه شال إيده ونزلها على وش المعجب بصفعة أصبحت تريند في أقل من ساعة وانقسم الناس حولها بين لائمين ومتفهمين.

والحقيقة مع كل نقاش أنا كنت بشوف إن الطرفين عندهم حق في جزء من رأيهم، من ناحية الفنان بني آدم برضه لا يجب التعدي على مساحته الشخصية بشكل عنيف، ومن ناحية تانية كان ممكن يبقى فيه رد فعل آخر غير صفعة على الوجه، كان ممكن جدا المعجب يرد عليها بصفعة مقابلة وتبقى خناقة ويتقلب الفرح لغم.

بس خليني أقول إن في مرحلة ما يجب على المشاهير العرب أن يحسموا أمرهم بالنسبة لتعاملهم مع المعجبين. حيث اننا حاليا كجمهور مش فاهمين، فهناك فنان طريقته مع الجمهور تسمح بأن يرفعوا شعار:( بوسه.. بوس الباشا من بقه) وفنان تاني طريقته مع الجمهور تندرج تحت شعار (إنت مش عارف انت بتكلم مين يا ولد؟) 

عارفة برضه ان هيفضل دايما فيه اختلاف بين شخص والتاني وبين فنان وفنان آخر في طريقة التعامل مع الاهتمام. بس برضه ادوا الناس دليل أو منافيستو كده عشان على الأقل البعض اللي زيي اللي بيحاول يوصل لصيغة تعامل تناسب الكل يكونوا فاهمين.