Kultur

Wat verbënnt Mike Bourscheid, Rozafa Elshan, Jil Lahr, Lynn Scheidweiler? Alle véier si plastesch Kënschtler, alle véier sinn zu Lëtzebuerg opgewuess, mee liewen ewell zanter Joerzéngten am Ausland ... an ... alle véier si fir de LEAP 2025, de Luxembourg Encouragement for Artists Prize, nominéiert. Momentan preparéiere si grad Eenzelexpoen an der Escher Konschthal. Dëse Freideg Owend gëtt do de LEAP-Award iwwerreecht. D'Kerstin Thalau stellt Iech dës Woch déi véier Kënschtler vir: haut d’Rozafa Elshan.

Eng getrennte Koppel (Trine Dyrholm an Tim Roth) kënnt zéng Joer nom Doud vum gemeinsame Kand zesummen ... D'Désirée Nosbusch liwwert mam intimisteschen Drama "Poison" hiren éischte laange Fiktiounsfilm hanner der Kamera. Fir d'Sortie vum Film an eise Kinoen huet de Michel Delage sech mat der Lëtzebuerger Realisatrice, Actrice a Produzentin ënnerhalen.

"Lieb" ass léif; mee den engleschen Terme "Leap", mat e an a, bedeit Sprong oder Saz. An deen interesséiert beim LEAP, de Luxembourg Encouragement for Artists Prize. De Präis ass mat 10.000 Euro dotéiert a soll Kënschtler aus der Groussregioun, déi schonn eng gewëss Praxis entwéckelt hunn, op engem neie kënschtleresche Wee ënnerstëtzen. Véier Artiste sinn nominéiert, preparéiere grad Eenzelexpoen an der Escher Konschthal. Dëse Freideg Owend gëtt och do den, also EEN LEAP-Award, iwwerreecht. 

Den Hallelujah vum Georg Friedrich Händel kenne vill Leit, mee méi ass meeschtens net gewosst iwwert de berüümten däitsch-brittesche Komponist. Säi Messias ass ee grousst Wierk mat méi wéi 2 Stonne Musek, wat hien deemools a nëmme 24 Deeg finaliséiert huet. De Lëtzebuerger Chouer “Ambitus” sengt deen Oratorium op engem Concert de 29. Mäerz 2025 am Trifolion zu Iechternach. “Wa mir schonn ee gudde Messias hikréien, dat wier scho ganz schéin.” – dat seet de Roby Schiltz. Hien huet de Chouer viru 55 Joer gegrënnt, an ass och nach den Dirigent.
Am Gespréich mam Marie verréit de Roby Schiltz méi.