Kultur

"Nëmme Mënsche mat Zäit kënnen et sech leeschten, doriwwer nozedenken, wat Zäit eigentlech ass", liest een ënner enger Videoinstallatioun vum Ho Tzu Nyen am Mudam. De plastesche Kënschtler koum 1976 am Stadstaat Singapur op d'Welt a gehéiert ewell zu de wichtegste Mixed-Media-Artiste vu senger Heemecht. A fir seng imposant Wanderexpo "Time and the Tiger" huet hie sech nawell vill Zäit geholl, och well hie fir d'Visiteure seng Gedanke konstruktiv eriwwer brénge wollt. D'Kerstin Thalau hat Geleeënheet, sech mam Ho Tzu Nyen doriwwer auszetauschen.

D'ASBL Open Screen gouf viru méi wéi 10 Joer gegrënnt fir d'Promotioun vun der Inklusioun an der Diversitéit duerch kulturell Aarbecht. Ee vun de Projeten, deen d'Claudine Muno realiséiert huet, ass d'Buch "Roff". Eng Rees duerch d'Geschicht vu Péiteng, duerch déi eis de Boy a seng Mémé begleeden an eis erziele vun de Zwangsaarbechter:innen wärend dem Zweete Weltkrich, Mënschen, déi zu Péiteng probéieren en neit Doheem ze fannen, Leit, déi hiert Liewen, hiert Been, hir Liewensfreed verluer hunn. Dotëschent awer ëmmer och eng Liewensloscht, Iwwerleeungen iwwer d'Liewen, Anekdoten, déi op Fakten an op Fiktioun stoussen. Eng déifgrënneg Recherche verbonne mat literareschem Kënnen, e Buch voller Liichtegkeet an Humor, voller Trauer an Drama. Dotëschent Skizzen, Fotoen, Kollagen, déi d'Claudine Muno realiséiert huet. De polnesche Komponist an Cellist Michal Pepol huet sech vu Péiteng inspiréiere gelooss an am Buch ass e QR-Code, mat deem een Zougang zu de Kompositioune vum Museker huet, déi zu "Roff" passen.

Déi Lëtzebuerger Schauspillerin Sophie Mousel ass dëst Joer direkt an zwee Filmer op der Berlinale ze gesinn: An "Der Kuss des Grashüpfers" spillt si der Haaptfigur Bernard hir Partnerin, an a "Reflet dans un diamant mort" eng vun de sëllege Fraefiguren, déi dem Geheimagent John D. iwwer de Wee lafen. De Jeff Schinker huet sech mat hir zu Berlin ënnerhalen.