Kultur

Den Nicolas Calmes huet säi Radar aktivéiert a gëtt Tipps fir spannend kulturell Rendez-vousen dës Woch.

Gëtt 2025 ee gudde Museks-Cru? De Marc Clement huet 12 Placken erausgesicht, op déi een sech fir dat neit Joer freeën däerf.

Den däitsche Pianist Joseph Moog huet e ganze Concertsprogramm der Belle Epoque gewidmet. Dee féiert hie muer (11.1.) den Owend am Conservatoire zu Esch op. De Christophe Mirkes huet sech mam Joseph Moog iwwert d'Konzept vun dëser Programmatioun ënnerhalen. Seng éischt Fro war, ob een d'Belle Epoque iwwerhaapt musikalesch kann zesummefaassen. Ëmmerhi ginn um Concert 8 Komponisten aus verschidden Epoche gespillt.

Den Nicolas aktivéiert säi Radar a verréit iech, wat fir eng kulturell Highlights dir de Weekend net sollt verpassen.

Eng Serie an der et ëm en Ex-Militärpolizist geet, deen an e Mordfall eragezu gëtt an eng korrupt Stad géint sech huet. Eng Serie déi op der Buchréi vum Lee Child baséiert, dee mëttlerweil schonn 29 Bicher iwwert de Jack Reacher geschriwwen huet.

Den ungareschen Dirigent Martin Rajna (29) gouf haut de moien um 11 Auer an der Philharmonie als neie Chefdirigent an artisteschen Direkter vun de Lëtzebuerger Philharmoniker virgestallt. De Kontrakt fänkt am Hierscht 26/27 un an ass fir eng Dauer vu véier Saisone virgesinn.

De Martin Rajna huet insgesamt réischt fënnef Deeg mam Orchester verbruecht, an deemools dräi Opféierungen dirigéiert. Dat war viru knapp zwee Méint, am November 2024.

Iwwer d'Hannergrënn vun der éischter spontaner Decisioun fir dës Collaboratioun ënnerhält sech de Christophe Mirkes mam Marc Clement.

Mëttlerweil ginn et eng ganz Partie Muséeën, déi sech fir d’Entwécklung vu Computerart interesséieren, respektiv Konschtwierker aus deem Beräich sammelen. Allerdéngs geet et dobäi meeschtens ëm Aarbechten, déi no 1990, an also no der Aféierung vum Internet entstane sinn. Bis den 2. Februar proposéiert de Mudam sech emol mat de Joren 1960 bis 1991 ze beschäftegen, deemno souzesoe mat analoger Computerkonscht. “Radical Software” ass den Titel vun der Curatrice Michelle Cotton hirer Expo.

D’Kerstin Thalau ass vun hir méi iwwer d’Konfrontatioun tëschent “radikal” a “soft” gewuer ginn.

De Soundatlas kritt am neie Joer eng nei Plaz: Vun elo u kënnt Dir och sonndes moies um 9:20 en Episod am Joé Birchen senger Emissioun “Am Buedmantel” lauschteren.

Fir déi, déi eis Soundserie nach net kennen: Am Soundatlas ginn d’Kerstin Thalau an de Joé Birchen de verschiddensten Téin op d’Spuer. Dobäi analyséieren si d’Kläng bis an den Detail a fannen och ëmmer nees Verbindungen zur Alldagskultur, Konscht a souguer der Wëssenschaft. Ob dat haut wuel och geléngt?

Déi zwee haten am Virfeld iergendeppes vun “Noise”, also Kaméidi, gefuebelt ...

An der virleschter Episod iwwert déi sëllege franséisch Literaturpräisser huet de Jeff Schinker de Prix Médicis étranger ënnert d'Lupp geholl. Dem Eduardo Halfon säin "Tarentule" ass eng kuerz, awer intensiv Ausernanersetzung mat der Fro, wéi een haut Antisemitismus bekämpfe kann - a wéi eng Mëttelen dofir dierfe benotzt ginn.