Kultur

Zu Cannes krut "L'histoire de Souleymane" - ee Film iwwer Immigratioun aus der Siicht vun engem jonken Demandeur d'asile - an der Selektioun Un certain regard de Präis vun der Jury an de Präis fir de beschten Acteur. Mir lauschteren nach eemol d'Rezensioun aus dem Grousse Kino vum Samschdeg.

Iwwer d'Chrëschtdeeg gëtt et roueg an der Kulturzeen. E puer kleng kulturell Highlighte gëtt et dann awer. Den Nicolas Calmes verréit, wéi eng.

Haut (20.12.) um 19:30 Auer iwwerdroen den opus 100,7 a radio 100,7 deen traditionelle Chrëschtconcert vun de Lëtzebuerger Philharmoniker live aus der Philharmonie. Wéi all Joer sti bekannte Chrëschtdagslidder fir matzesangen um Programm. Op der Bün sinn d’Lëtzebuerger Philharmoniker, de Choeur de Chambre an d'Pueri Cantores vum Stater Conservatoire an de Maurice Clement op der Uergel ënner der Leedung vum Ivan Boumans an dem Pierre Nimax.

Op wat kënnt et dem Ivan Boumans bei Chrëschtdag un? A wäert hien d'Leit am Publikum animéieren fir matzesangen? Froen, déi de Luc Boentges him am Viraus vum Concert gestallt huet.

Gëschter Owend (19.12.) goufen an der Philharmonie op Initiativ vum Kulturministère d’Lëtzebuerger Musekspräisser verginn. De Jury huet de Präis fir d’Liewenswierk dem Komponist, Posaunist, Tenor an Dirigent Camille Kerger decernéiert, deen iwwer Joerzéngten déi Lëtzebuerger Museks- a Kulturlandschaft gepräägt huet: ënnert anerem als Member vun der Lëtzebuerger Gesellschaft fir Nei Musek, als Leeder vu verschidden Ensembelen, als Grënnungsmember a musikaleschen Direkter vum Théâtre National an als Direkter vum Institut Européen de Chant Choral INECC.

Scian ass eng alternativ Metal-Band, déi zu Lëtzebuerg baséiert ass. Den Track, aus deem Dir en Extrait héiert, heescht “Trying To Feel” an ass nei eraus. Fir doriwwer ze schwätzen ass den Ethan Carey am Studio.

Och de Weekend viru Chrëschtdag si kulturell Evenementer geplangt. Den Nicolas Calmes wees, wéi eng.

Mëtt November goufen a Frankräich déi sëllege Literaturpräisser verginn. Déi déck Fësch wéi de Goncourt an de Renaudot hate mir scho beschwat, zanter e puer Woche verrode mir Iech, fir wéi eng Romaner sech déi méi kleng, mee dacks literaresch méi relevant Juryen, entscheet hunn. Hei beschwätzt de Jeff Schinker "Le rêve du jaguar" vum Miguel Bonnefoy, fir deen den Auteur de Prix Femina an de Grand Prix du Roman de l'Académie française krut. Eng Entscheedung, déi eise Kritiker absolut net novollzéie kann, esou kitscheg an iwwerflächlech huet hien de Roman fonnt.

Virun e puer Deeg huet de Georges Urwald zesumme mat de Lëtzebuerger Philharmoniker, der Debbie Marinkovich an dem Ivan Boumans en Album mam Titel “Lidderflupp” digital erausbruecht. Lidderflupp ass och den Titel vun engem Projet, deen de Georges Urwald zesumme mat der MIL ASBL op d'Bee gesat huet. Op deem Album kann een 10 Medleye lauschteren, déi sech jeeweils ëm ee Komponist, eng ganz Epoch oder eng bestëmmten Thematik dréien. D’Marie Trussart huet mam Georges Urwald ënner anerem iwwer d’Volleksmusek zu Lëtzebuerg geschwat, wat se esou besonnesch mécht, an hien huet och verroden, firwat hien esou begeeschtert ass vun eisem Musekspatrimoine.

All Freideg verëffentlecht d'Wochenzeitung d'Lëtzebuerger Land e Comic Strip vum Duo Skif & Dresch. An engem Volume versammelt ergi se e kritesch-bëssege Panorama vun der politescher Aktualitéit zu Lëtzebuerg. Deen zweete Band vun der Serie "Déck Frënn" versammelt dem Duo seng Produktioun aus der Period 2021-2022. De Michel Delage huet d'Buch gelies.