Kultur

Ënner dem Motto "Une crèche musicale de Noël" presentéiere Musikerinnen a Museker vun de Solistes Européens, Luxembourg ee Concert mat kammermusikalesche Wierker. Dat méindes owes, de 16. Dezember 2024 am Kammermusekssall vun der Philharmonie. De Stil geet dobäi ganz kloer an d'Museksepoche vum Barock a Wiener Klassik.

Fir de Pianist vum Concert, de Christoph König, ass et nieft senger Aarbecht als Dirigent bei groussen Orchesteren, eng wëllkommen Ofwiesslung.

Am Gespréich mam Lex Kauffmann schwätzt de Museker iwwer seng Roll als Pianist an och iwwer seng nei Tâche als éischten Haaptgaaschtdirigent an der Geschicht vun der Warschauer Philharmonie.

Den Nicolas Calmes aktivéiert säi Radar a verréit Iech, war Dir ënner der Woch net verpasse sollt.

Beim “Noel en lumière 2.0” komme ganzer véier Chéier zu engem Ensembel zesummen, begleet vun engem Harmonium, enger Uergel, engem Piano an engem Blechbléiserquintett vu Paräis. D’Michelle Barthel war sech dës Woch déi éischte Prouf fir dee Concert ukucken an ulauschteren.

“Dis-Placed” ass den Titel vun enger Gruppenexpo, déi Dir nach bis den 19. Januar an d’Escher Konschthal kucke goe sollt. Eng Dosen international an national Kënschtler:innen thematiséieren, a ganz ënnerschiddleche Konschtdisziplinnen, den Deplacement, de Verloscht vum Heem, vu sengem Doheem, also net just vun enger Architektur oder engem Territoire, mee och vum Gefill vun der Sécherheet, der Zougehéieregkeet zu engem Grupp an all de Konsequenzen. E Curateuren-Team huet d’Crème de la Crème fir d’Expo gewanne kënnen, weist Aarbechte vum Omer Fast, vun der Marlène Dumas, vum Gregor Schneider, vun nationaler Säit vun der Lisa Kohl. An och vum Palästinenser Taysir Batniji, deen extra op Esch gereest war, an do bereet war, dem Kerstin Thalau Froen ze beäntweren.

De leschte Weekend waren zu Bréissel e puer besonnesch Deeg fir de Lëtzebuerger Jazz. KulturLX huet an Zesummenaarbecht mat dräi Bréisseler Venues d‘Band Ciao Kennedy, dem Michel Meis säi Projet Colibri, dem Greg Lamy a Participantinne vum Neimënster sengem PropulsionWOMEN d‘Geleënheet ginn, d‘Relatioune mat der belscher Zeen ze fleegen. Och de Pianist, Batteur a Vibraphonist Jerome Klein an dee jonken Trompettist Daniel Migliosi ware mat dobäi an hu mat engem belsche Kolleeg an enger hollännescher Kolleegin ee Concert an enger neier Formatioun gespillt. Fir iwwer dës Erfarung ze schwätzen war de Jerome Klein bei eis am Studio.

Déi neisten Episod vum B-Radio gëtt en Abléck an d'Welt vum Percy Lallemang, Auteur vun der Kuerzgeschichtesammlung "Nightscapes".

Dee 25 Joer alen ukrainesche Geiist Dmytro Udovychenko trëtt zesumme mat de Lëtzebuerger Philharmoniker op a wäert dat Wierk spillen, deem de Komponist Max Bruch bis haut seng Reputatioun ze verdanken huet: de Geieconcerto Nr. 1 a Sol mineur. Och den Orchester féiert bekannte Repertoire op. Um Programm stinn dem Bizet seng populäersten Ouerewierm aus der Oper “Carmen”. An deenen zwou Orchester-Suitte vun der Bünemusek ginn d’Lëtzebuerger Philharmoniker vum Hankyeol Yoon dirigéiert.

D'Natasha Ehrmann an de Christophe Mirkes ënnerhale sech iwwer de Concertsprogramm an iwwer de Solist.

An dësem véierten Deel vun eiser Visite guidée duerch déi permanent Ausstellung am Musée vun der Resistenz a vun de Mënscherechter féiert eis de Jim Goerres weider duerch d’Geschicht vum Zweete Weltkrich an d’Konsequenze fir Lëtzebuerg.

Mir kucke méi prezis op d‘Verhale vun der Lëtzebuerger Bevëlkerung, weisen, wien d‘Kollaborateure waren, wat Attentiste waren, a wéi sech d‘Resistenz gebilt an entwéckelt huet.

D‘Valerija Berdi huet dëse Bäitrag zesummegestallt. All Infoen zu dëser Expo an iwwer Visitte sinn op mnr.lu ze fannen.

Mëtt November goufen a Frankräich déi sëllege Literaturpräisser verginn. Déi déck Fësch wéi de Goncourt an de Renaudot hate mir scho beschwat, an den nächste Woche verrode mir Iech, fir wéi eng Romaner sech déi méi kleng mee dacks literaresch méi relevant Juryen entscheet hunn. Hei rezenséiert de Jeff Schinker "Mythologie du .12" vum jonke belschen Auteur Célestin de Meeûs, dee fir säin éischte Roman eng Mention spéciale vum Prix Wepler krut.