Kultur

Bei wat sëtzt Dir grad elo? Beim Kaffi oder beim Téi? Egal, wat Iech dobausse besser schmaacht, de Jean Portante huet net Kaffi an Téi gepléckt, mee d‘Wierder zerpléckt. Den Ursprong vum Kaffi ass beim Jean Portante Programm an domat och säi Wuert vun der Woch. Am Gespréich mam Philippe Hansen, deen iwweregens eng Virléift fir Kaffi huet.

Vun der Monogamie op de (Medie-)Monopol: Direkt zwee Stécker huelen den Nicolas Calmes an de Jeff Schinker dës Woch ënner d'Lupp. Wou et beim Harold Pinter sengem "Trahisons", hei an enger Inzenéierung vun der Véronique Fauconnet, ëm d'Hypokrisie vun der Monogamie geet, gi bei "Ween stoppt RTL" de Medien-Monopol vun RTL an aner Machenschaften opgedeckt. D'Valerija Berdi gëtt am Interview-Extrait mat der jonker Regisseurin Sara Goerres iwwer hir Inzenéierung vun "Die Katze Eleonore" dann en Ausbléck op dat, wat de Weekend an d'nächst Woch am Theater leeft.

Wann eng aktuell Uklo géint seng Firma op d’Geriicht geet, misst de Kënschtler Banksy perséinlech Informatioune vu sech präisginn. Den Nicolas Calmes faasst d'Problematik kuerz zesummen.

Am Kader vum Luxfilmfest gouf déi Lëtzebuerger Koproduktioun (Amour Fou) “Jakobs Ross“ an Avant-première gewisen. Deemnächst leeft de Film och an eise Kinoen un. D‘Valerija Berdi hat d‘Geleeënheet mat der Schwäizer Regisseurin Kalain Gödrös iwwer dëse Film ze schwätzen. Et handelt sech ëm eng Romanverfilmung, dem Debutroman mam gläichen Numm vun der Schwäizer Autorin Silvia Tschui.

Mir ginn an d‘Joer 1869 an an d‘Schwäizer Alpen. Hei dreemt eng jonk Mod mat groussem musikaleschen Talent vun enger Karriär, mee als Mod huet een do net vill mat ze decidéieren. Nieft der Luna Wedler an dem Valentin Postlmayer an den Haaptrollen, sinn och d‘Eugénie Anselin, d‘Marie Jung an de Luc Feit am Film ze gesinn.

Den Duo Mader/Panandreopoulos spillt nei Musek vu véier verschidde Komponisten, déi fir dës multidisziplinär Concerte geschriwwe gouf. Parallel dozou entwéckele sech beweegte Biller am Concertssall.

De Christophe Mirkes huet beim Saxofonist Andreas Mader nogefrot, wat nieft der Musek vu Visuellem op de Public duerkënnt.

Aktuell sinn am Neimënster zéng verschidde VR-Experienzen ze gesinn. Queesch duerch de Gaart, d’Genren an d’Gäng vum Neimënster zitt sech d’Expositioun. Eng Experte-Jury bewäert a belount déi bescht Experienzen. Als einfache Visiteur ass d’Experienz Belounung u sech.

Och wa Gebaier an aner architektonesch Projeten net reese kënnen, ass et méiglech se mat enger Ausstellung beieneen ze bréngen. Genee dat mécht nämlech de Cities Connection Project, deen domat och nach eng Rei Europäesch Stied matenee verbënnt. Den Ament ass esou eng Ausstellung am Luxembourg Center for Architecture (LUCA), a mir hu fir Iech ee Bléck op de Projet geworf.

De Max Asselborn huet ëmmer dovunner gedreemt, an engem internationale groussen Orchester matzespillen. 2020 ass dëse Wonsch fir deen 32-Joer jonke Lëtzebuerger Trompettist an Erfëllung gaangen. Hien ass Member vum Schweedesche Radiosinfonie-Orchester, an eenzege Lëtzebuerger do. Aktuell ass hie mam Orchester op enger grousser Tournée, an de Mëttwoch, 13. Mäerz ass de Stopp an der Philharmonie hei zu Lëtzebuerg. Wéi säi Liewen zu Stockholm ausgesäit, a wat hie mécht fir sech wärend laange Concertstournée net ze vill ze stressen, dat a villes méi huet de Max Asselborn dem Marie Schockmel verroden.

Gëschter hu mir d'Plack beschwat, haut geet et ëm de gutt besichte Concert an der Rockhal, déi d'Idles mat engem laange Set zum Danze bruecht huet. Plakativ politesch Intermezzi hu si entretemps bei anere Punkbands ofgekuckt. Den Yves Stephany an de Jeff Schinker mat hiren Andréck zum Concert.

Musek aus der Schwäiz gëtt et muer den Owend (14.3.) am Gudde Wëllen. Den Zürecher Duo Ikan Hyu ass agelueden, hiren Oktopus-aarteg gespillten, multiinstrumentale Punk-Pop zu Lëtzebuerg ze deelen, mat engem Public, deen op esou Decouverten nëmme waart. D‘Band war mat Royal Blood ënnerwee a mécht grad hir éischt Headliner-Tournée. De Marc Clement huet si op hirem Wee op Berlin ënnerbrach, fir kuerz mat der Anisa an Hannah vun Ikan Hyu ze schwätzen.