Kultur

Fir seng 50 Joer huet den Théâtre du Centaure, ee vun de klengste Lëtzebuerger Theateren, dee fir seng eklektesch a qualitativ héichwäerteg Programméierung bekannt ass, ee ganz besonnescht Programm-Highlight : Eng Molière-Quadrilogie, déi een entweder zweemol als Binôme oder eemol als komplette Marathon erliewe kann. D’ Metteuse en scène Myriam Muller huet déi véier Stécker op zwee Owender kondenséiert : Eemol kräizt sech "L’école des femmes" mam "Dom Juan", eng aner Kéier sinn et "Le Misanthrope" an den "Tartuffe". Mir hunn d’Centaure-Intendantin Myriam Muller an den Emre Sevindik, deen d’Création sonore fir déi 4 Stécker gemaach huet, zesumme mam Jeff Schinker bei eis am Studio.

An enger neier Kuerzserie rezenséiert de Jeff Schinker all Woch ee vun de Favoritte vun der franséischer Rentrée littéraire vum Januar – a verréit eis, op den Hype gerechtfäerdegt ass. Am drëtte Bäitrag beschwätzt hien La langue des choses cachées vun der Cécile Coulon.

Vum Fréijoer u kann een sech esou lues erëm op Museksfestivalle freeën. Musek dobaussen ze genéissen ass e ganz besonnesche Pleséier – een, deen een och bei der asbl Kollibri seriö hëlt. Wie schonn eemol um Koll an Aktioun war, deen all Joer am Mee zu Marteleng beim Schiifermusee organiséiert gëtt, dee weess dat. Dëst Joer ass de Koll de Samschden 18. an de Sonnden 19. Mee. Haut gëtt de Line-Up verëffentlëcht. De Georges Goerens an de Bob Seyler vum Booking Team sinn zu Gaascht.

Stierwe fir eng Béchs Béier? Fir ee jonke Mann war dat 2009 keen hyperboleschen Ausdrock vun Duuscht, mä eng traureg Realitéit. Well hien am Supermarché eng Béchs Béier gedronk hat, vun där véier Sécherheetsmänner ausgaange sinn, dass en se net bezuele kéint, hunn si de Mann an en Hannerzëmmer verschleeft an do doud geschloen. Dëse Fait divers huet sech Enn 2009 zu Lyon ofgespillt. Mat Prisongsstrofe vu maximal 4 Joer, dovunner 2 op Sursis, gouf e relativ duuss penaliséiert. De Schrëftsteller Laurent Mauvignier huet d'Affär an engem kuerzen, intensiven Text opgegraff, deen aus engem eenzege Saz besteet. Nom Arne Lygre sengem Homme sans but bréngt d’Metteuse en scène Sophie Langevin de perkutanten Text op d’Bün vum Cape. Gespillt gëtt den Text vum Luc Schiltz am Dialog mam Multi-Instrumentalist Jorge De Moura.

Gëschter huet eis déi traureg Nouvelle erreecht, datt de Lëtzebuerger Moler Henri Kraus e puer Deeg no sengem 81. Gebuertsdag gestuerwen ass. Hie war Konschterzéier, Professer am Lycée Arts et Métiers a Member vum Cercle Artistique de Luxembourg. De Joé Birchen wollt vum Konschtexpert Paul Bertemes wësse, wat den Henri Kraus fir d'Konschtzeen bedeit huet, a wéi wichteg d’Wierk ass, wat de Kënschtler eis hannerléisst.

“Bienvenue à la Villa!” ass eng Ausstellungserie vun der Villa Vauban, an där se weist, wéi eng Wierker an de leschte Joren de Wee an hire Besëtz fonnt hunn. Mat Fotografien, Skulpturen a Molereien si bei der zweeter Editioun 41 Kënschtler mat dobäi, vun deenen de gréissten Deel Lëtzebuerger oder Residenten am Grand-Duché sinn. De Joé Birchen mat Andréck vun der Expo, an Aussoe vun der Conservatrice vun der Villa Vauban, Gabriele D. Grawe.

Déi nei an drëtt Plack vu Les Amazones d’Afrique, een Zesummeschloss vu Musekerinnen aus verschiddene westafrikanesche Länner. D’Plack heescht “Musow Danse”, iwwersat Danz vun de Fraen, a geet genee dorëms, wéi et ass, eng Fra ze sinn, haut, a Westafrika.

Nodeems et d'lescht Woch méi roueg war, ass dës Woch awer nees méi lass a den Theateren a Kulturhaiser uechtert Land. Wat alles gebuede gëtt, seet eis de Nicolas Calmes am kulturellen Agenda.