Kultur

.

Näischt bleift esou wéi et ass, an och Stadquartiere sinn a stänneger Verännerung. A senger Serie em de Kierchbierg huet de Fotograf Christian Aschman iwwert ee Joer, a méi wéi 50 Sessiounen, dëse Quartier fotografesch festgehalen. Fir de Rescht vun dësem Mount proposéiere mir iech een Adventskalenner, an deem mer zesumme mat dem Fotograf lauter Dieren, oder besser gesot Fotoen aus dëser Serie opmaachen. A Lass!

De Michel Delage mam Iwwerbléck vun der neier Filmwoch.

Am zweete Band vun den Choreographical Talks déi vum Lëtzebuerger Literaturarchiv editéiert ginn, gëtt d’Simone Mousset en Abléck an hiren Alldag als Choreographin. Si weist, wat de kreative Prozess engem ganzen Ensembel ofverlaangt, ier enger Danz-Kompositioun virum Publikum kann opgefouert ginn. - Iwwert des Choreographical Talks an d’Simone Mousset elo méi vum Léon Rinaldetti.

Wéi heescht déi Rubrik, déi mir reegelméisseg ëm dës Zäit samschdes moies senden? Dir erënnert Iech net?? Mee, dat gëtt et héich Zäit, datt mir eppes fir Är Memoire maachen: eisen Auteur a Linguist Jean Portante mécht den Ufank an erkläert Iech elo am “Wuert vun der Woch”, wou d’Ausdréck Memoire a Gediechtnes iwwerhaapt hierkommen, a wéi se evoluéiert hunn.

“Bienvenue à la Villa!” ass eng Ausstellungserie vun der Villa Vauban, an där se weist, wéi eng Wierker an de leschte Joren de Wee an hire Besëtz fonnt hunn. Mat Fotografien, Skulpturen a Molereie si bei der zweeter Editioun 41 Kënschtler:inne mat dobäi, vun deenen de gréissten Deel Lëtzebuerger oder Resident am Grand-Duché sinn. De Joé Birchen mat Andréck vun der Expo an Aussoe vun der Conservatrice vun der Villa Vauban, Gabriele D. Grawe.

“All you can eat”: fir verschiddener ass dat eventuell de Motto vu Feierdeeg an dëse Breedegraden, mee dobäi handelt et sech och ëm eng Expo am Lëtzebuerg City Museum, déi aus enger historescher Perspektiv d’Ernärung vum Mënsch thematiséiert. Op déi kënschtleresch Perspektiv kënnt Dir Iech bis den 21. Januar am Ratskeller vum Cercle Cité aloossen. D’Kerstin Thalau ass vun der Anastasia Chaguidouline, déi artistesch Directrice vum Cercle Cité, méi zu der Expo “Hors d’oeuvre”gewuer ginn.

Den Iwwerbléck vum Filmprogramm mam Michel Delage

Den Auteur beschreift e Jesus, deen net um Kräiz gestuerwen ass, inkognito op Roum flücht a fundamental u sech selwer zweiwelt. Eng Kritik vum Michel Delage

Dir kennt d'Dreamcatcher, indianesch Glécksbrénger, an deene sech d’Albdreem verfänke sollen? E Grupp vu Kënschtlerinnen hat fënnef Joer laang un engem Ghostcatcher fir d’Weltexpo zu Dubai geschafft. Um Enn war d’Wierk wärend zwou Wochen an engem Nieweraum vum Lëtzebuerger Pavillon ze gesinn. Falls en dann an uecht geholl gouf. D’Geschicht hanner dem Ghostcatcher ass awer iwweraus spannend. Dowéinst wëlle mir se mat Iech deelen.