Kultur

Kann ee Banker an Anarchist sinn? De Protagonist am Fernando Pessoa senger Novell seet ganz kloer Jo! Wéi eng Argumenter hien huet a wéi wäit dës Geschicht haut nach aktuell ass, hunn d'Valerija Berdi an de Michel Delage an eiser Emissioun Kultur um 5 gezielt. Si waren nämlech op Esch an den Ariston op d'Première vum Stéck "Le Banqier anarchiste", déi den Jérôme Varanfrain adaptéiert huet.

Improviséiere gehéiert am Jazz bekanntlech dozou. De Reset Jazz Festival, deen haut (26.1.) an der Abbaye de Neumünster ugeet, gëtt deem Begrëff nach eng Kéier eng aner Bedeitung: Hei begéinen sech aacht Musekerinnen a Museker aus verschiddene Länner an hunn eng Woch Zäit, fir zesummen e Programm op d'Bün ze bréngen. Wéi ee sech dat genee ka virstellen, dat huet d'Claudine Muno gëschter nogefrot - hatt hat nämlech d'Geleeënheet bei enger vun de leschte Prouwe virum Optrëtt derbäi ze sinn.

Nach bis e Sonndeg ginn um Filmfestival Max Ophüls Preis zu Saarbrécken 127 Filmer aus Däitschland, Éisträich an der Schwäiz gewisen. A véier verschidde Kategorië kann de Filmnowuess op dësem Festival Präisser gewannen. Dat sinn: Spielfilm, Dokumentarfilm, Kuerzfilm a mëttel-laange Film. D'Sophie Schroeder huet mat der Programmleederin Theresa Winkler geschwat.

Am Februar lescht Joer gouf et, no zwee Joer Pandemie a Waarden, endlech een Owend an der Philharmonie, dee Bartleby Delicate and Friends iwwerschriwwe war. Elo kënnt d'Opnam heivunner als Vinyl eraus, mat fir déi Geleeënheet engem Release-Concert an de Rotonden dëse Samschdeg.

Bis dëst Joer war de Schrëftsteller, Literaturwëssenschaftler a Mat-Editeur vum Verlag Hydre och President vun der Federatioun vun de Lëtzebuerger Bicherediteuren. Elo assuréiert de Roland Kayser vun Editions Phi dëse Posten.

Mir hu mam Ian De Toffoli e Réckbléck op seng Aarbecht gemaach an och seng Kritik um Literaturwiesen zu Lëtzebuerg, déi hien op den Assise vum Buch ausgeschwat huet, mat him beliicht. "Literaturwiesen zu Lëtzebuerg ass en Trümmerhaufen" huet de Ian de Toffoli gesot, wat hien domat gemengt huet, erkläert hie bei eis um Mikro.

Den amerikanesche Museker David Crosby war net nëmme Member vun de legendäre Byrds a vu Crosby, Stills, Nash and Young - hien huet och am héijen Alter nach interessant Soloplacken erausbruecht. Mat sengem schwierege Charakter huet hie senge Musekerkolleegen et awer net ëmmer einfach gemaach. D'Claudine Muno huet am Gespréich mam Pit Walté op d'Karriär vum Crosby zeréckgekuckt, deen d'lescht Woch am Alter vun 81 Joer verstuerwen ass.

No 15 Joer Experienzen am Beräich Grafikdesign, ënner anerem an engem Verlag an am Theater, huet sech d'Miriam Rosner 2019 ënner dem Numm Monogram selbststänneg gemaach. Bis den 30. Abrëll presentéiert si eng Kreatioun an der Cecil's Box, d'Ausstellungsvitrinn vum Cercle Cité an der Paschtoueschgaass: eng ideal Plattform, well se permanent accessibel ass.

Ze gesinn ass en Hommage un de Museker an Auteur David Berman, dee fir seng Albdram-änlech Texter, déi eppes vun absurde Landschaften hunn, bekannt war. Nieft engem wäissen Hiem, op dat d'Miriam Rosner e Berman-Gedicht mat roudem Fuedem brodéiert huet, fält eng schwaarz monochrom Retro-Illustratioun op: e Strauss, eng Kanéngchen an e butzege Mënsch an engem Glasbokal schéngen an engem Labo fir Geträipsanalys gelant ze sinn. Inspiratioun léisst sech net steieren, esou d'Miriam Rosner, fir dës Aarbecht hätt si awer net laang nodenke missen.

De Maz huet Lëtzebuerg op Invitatioun vum radio 100,7 op der 2023er Editioun vum Eurosonic Noorderslag Festival an Holland vertrueden. Säi Concert war de Freideg den Owend, am groussen Theater vun der Stad Groningen, ee ganz besonnesch schéine Sall. Virum Optrëtt huet de Maz dem Jamie Reinert seng Gedanken zum Festival weiderginn.

"Sequana" heescht den neien Album vun der franko-algeerescher Musekerin Souad Massi, dee si e Samschdeg, 21. Januar, am CAPE zu Ettelbréck virstellt. A Sequana ass och den Numm vun der Gëttin vun der Seine, dem Floss, deen duerch Paräis fléisst. Am Interview mam Claudine Muno huet d'Souad Massi erzielt, firwat si grad dësen Titel fir hir Plack ausgesicht huet.

Wéi gewinnt sicht de Jean Portante e Wuert vun der Woch aus fir ze erklären, wou dat Wuert hierkënnt a wéi eng Bedeitung et huet. Dës Kéier ass et de Kalenner, deen de Jean Portante ënner d'Lupp hëlt. Mee fir d'éischt geheit hien e Bléck op den éischte Mount vum neie Joer, dem Januar, deen net ëmmer den éischte Mount vum Joer war.