Kultur

De Fernand Guelf huet schonn eng Rei Romaner publizéiert. Zu Lëtzebuerg war et säi Roman "Sage dem König", dee bei Editions Phi erauskoum. Elo huet hien de Roman "Sebastian" am Eegeverlag erausbruecht. Säi Protagonist geréit an eng ganz ongewéinlech Geschicht, aus där hien net méi erauskënnt. D'Valerija Berdi huet "Sebastian" gelies.

Mir si matzen an der Adventszäit. Do trëfft et sech gutt, datt d'Equipe vum B-Radio dëst Joer erëm hiren Adventskalenner produzéiert huet. Lauschtert en Extrait.

All Woch proposéiert eis de Jean Portante d'Wuert vun der Woch. Säi Choix fält ëmmer op e Wuert aus der Welt vun der Kultur. Haut péckt de Jean Portante d'Wuert Poesie un der Wuerzel.

"The Sound of Data" heescht en Event, dee muer den Owend, den 3. Dezember, an der Rockhal stattfënnt. National an international Kënschtler a Kënschtlerinnen hu wärend e puer Méint geléiert, wéi een aus Date Musek mécht. An eiser Emissioun Kultur um 5 vu gëschter huet de Sam Reinard vun der Rockhal erkläert wéi de Projet sech vun der Ausschreiwung bis bei den Optrëtt entwéckelt huet.

Gëschter Owend stoung an der Philharmonie ee Concert op der Affiche, dee méi wéi ee gudden Zweck huet. Virop war et de 46. Galaconcert vun der Associatioun "SOS Villages d'enfants Monde" - eng Associatioun déi schonn eng laang Concertstraditioun mam Philharmoneschen Orchester Lëtzebuerg deelt. Mam Orchester op der Bün stoung och déi 24-Joer-jonk Cellistin Hayoung Choi. An een aneren Highlight vum Owend war datt de Philharmoneschen Orchester Lëtzebuerg d'Weltpremière vum Luc Grethen senger Kreatioun "Seven Gates" gespillt huet. D'Marie Schockmel war fir eis live an der Philharmonie dobäi, an huet am Virfeld och ee spannend Gespréich mam Luc Grethen gefouert - dobäi war gëschter net nëmmen ee besonneschen Owend fir de Lëtzebuerger Komponist, mä och nach wéinst engem anere Grond.

Den 22.12.22 invitéiert Esch2022 op d'Ofschlossfeier vun der Europäescher Kulturhaaptstad. Ënnert dem Motto "Rewind-Play-Forward" soll d'Kulturjoer clôturéiert ginn. Wat d'Bierger:innen sech deen Owend erwaarde kënnen, huet d'Generaldirectrice Nancy Braun um Mikro vum Valerija Berdi verroden.

Fan si vun enger Band oder enger Serie gëtt jo dacks als eppes Passives wouer geholl, als eng Form vu Konsum - mee an hirem Buch "Everything I Need I Get from You" analyséiert déi amerikanesch Journalistin Kaitlyn Tiffany wéi besonnesch weiblech Fans sech den Internet zu Notze maachen, fir selwer aktiv a kreativ ze ginn. D'Claudine Muno huet eis d'Buch gëschter an der Emissioun Kultur um 5 virgestallt.

Bei Editions Binsfeld ass elo den neie Roman vun der Anja Di Bartolomeo eraus komm. Des Kéier ass et e Jugendroman, net just inhaltlech, mee och sproochlech. Valerija Berdi huet "Koma 21" gelies.

Ënnert dem Titel "Wëllkomm an der Villa" ass de leschte Weekend an der Villa Vauban, am Stater Park, eng nei Expo opgaangen. An deem Kontext huet de Guy Thewes, den Direkter vun den zwee Muséeë vun der Stad Lëtzebuerg, e positive Bilan gezunn. An der Moyenne leien hir Visiteurszuele bei 25'000, d'Coronazäiten haten déi awer ferm no ënne gedréckt, mee 2022 sinn 31'000 Entréeë gezielt ginn! Dowéinst um Enn vum Joer e Merci un de Public? D'Expo "Wëllkomm an der Villa" presentéiert knapps 70 Wierker, gréisstendeels Molereien, ma och Skulpturen a Fotoen, vum 17. Joerhonnert bis haut, dorënner 36 nei Acquisitiounen an Donatiounen aus de leschte Joeren. D'Kerstin Thalau war d'Ausstellung mat der Konscht-Restauratrice Gisèle Reuter kucken.

"Ces Italies qui respirent au Luxembourg et dans la Grande Region" ass den Titel vun enger Konferenz, dëse Mëttwoch an Donneschdeg um Campus Belval. Verschidden Aspekter vun der italiéinescher Immigratioun wäerten do beliicht ginn, aus historescher, soziologescher, linguistescher, literarescher oder och cinematographescher Perspektiv. Kann een dës Immigratioun ëmmer nach als gelonge betruechten? Dozou de Claudio Cicotti, Enseignant-chercheur op der Uni Lëtzebuerg.