Kultur

Den Erasmus-Programm fir Studente feiert 35. Gebuertsdag. Natierlech ass d'Zuel vun de Studenten, déi vun engem Austausch profitéiere wëllen wéinst der Corona-Pandemie erofgaangen; an awer sinn der ëmmer nach en etlech ënnerwee, fir fir e Semester oder ee Joer, an enger anerer Unisstad wéi hirer, ze studéieren oder e Stage ze maachen. Hir Liblingsdestinatioun war an ass Spuenien. Dir héiert e Reportage vun eiser Barcelona-Korrespondentin Aurélie Chamerois.

Virun 100 Joer, also am Joer 1922, ass den sougenannten "Hauptmann von Köpenick" zu Lëtzebuerg gestuerwen. Hien huet seng lescht 13 Liewensjore bei der Madamm Blum um Lampertsbierg gewunnt, mee iwwer si ass net vill bekannt. De Guy Helminger huet e Kaméidisstéck geschriwwen, dat der Emilie Blum eng Plaz gëtt an d'Ëmsetzung gëtt elo am Kasemattentheater gewisen. D'Valerija Berdi huet "Madame Köpenick" gesinn.

OPUS heescht d'Kulturzäitschrëft vun der Groussregioun, déi sechs Mol am Joer erauskënnt a sech op kulturell Eventer an der Groussregioun fokusséiert. Nieft neien Ausstellungen, Concerten an Theatervirstellungen sinn och ëmmer aktuell Sujeten de Schwéierpunkt vun der jeeweileger Editioun. D'Valerija Berdi huet Detailer zu der neier Opus.

Op der Uni Lëtzebuerg gëtt et keng reng Spezialisatioun a Konschtvermëttlung, mee verschidde Fuerscher beschäftege sech awer an hire Recherchë mam Sujet. Esou zum Beispill den Amerikaner Christopher Morse, deen 2017 fir e PHD op Lëtzebuerg koum, nodeems hien zéng Joer als Student a Chercheur zu Boston gelieft hat. Vun do huet hien e Master a Literatur, Kultur a Relioun plus e Master an Digital Media an Instructional Design matbruecht. De Christopher Morse huet nieft Englesch och Franséisch a Japanesch geléiert. Wat sech aus all deene Kompetenzen zaubere léisst, huet hien dem Kerstin Thalau erzielt.

Am Kader vun der Initiativ Neistart Lëtzebuerg huet d'Nathalie Ronvaux de Monolog "Moi, je suis Rosa" verfaasst, deen ënner der Regie vun der Aude-Laurence Biver ëmgesat gouf. D'Lady Rosa, interpretéiert vun der exzellenter Céline Camara, konnt een am Mamer Kinneksbond gesinn, éiert d'Stéck elo am Centre des Arts Pluriels zu Ettelbréck op d'Bün geet. D'Valerija Berdi mat enger Kritik

Fir sech virun den Nationalsozialisten a Sécherheet ze bréngen, waren déi jiddesch Famill Frank a véier weider Mënschen tëschent 1942 an 1944 an engem Hannerhaus zu Amsterdam ënnergedaucht. Do huet d'Anne Frank hiert berüümten Tagebuch geschriwwen. Am August 1944 gouf d'Famill an e KZ deportéiert an, bis op de Papp Otto Frank, ermuert. Hir Stopp war verrode ginn. Mee vu wiem? Dat hunn ëmmer nees Ermëttler versicht erauszefannen. 77 Joer nom Enn vum Krich ass e méigleche Schëllege fonnt ginn.

Dir héiert dozou eng Korrespondenz vum ARD-Journalist Ludger Kazmirczak vun Den Haag.

E kuerze kabarettisteschen Text iwwer d'Corona-Pandemie zu Lëtzebuerg. D'Bichelchen ass bei Kremart an der Kollektioun Timba erauskomm.

Eng Kritik vum Michel Delage

Escher urban Legenden, al Geschichten an Erzielunge stinn am Fokus vum Projet "Stammdësch", deen op d'Initiativ vum transnationale Kënschtlerkollektiv "Le gueuloir" entstanen ass. Dräi Theaterauteuren, d'Lénaïc Brulé, aus der Belsch, de Fabio Godinho aus Lëtzebuerg an de Franck Lemaire aus Frankräich hunn e Stammdësch am Café Le pirate zu Esch-Lalleng organiséiert a sammelen do Geschichte vun den Escher, fir se duerno an Theatertexter ëmzesetzen.

D'Valerija Berdi an de Romain Butti waren op d'Plaz an hunn d'Stëmmung an d'Aussoen agefaangen an an engem Collage zesummegestallt.

Am Dezember hat d'Reuter Bausch Art Gallery hir Dieren an der Ënneschtgaass opgemaach, elo presentéiert se schonn hir zweet "Group Show". E Portrait iwwer déi frëschgebake Galeristin Julie Reuter hate mir bei der Ouverture gesent: de Reportage fannt Dir an eiser Mediathéik.

Am Lëtzebuerg City Museum ass awer och bis de Juli eng Expo ze gesinn, déi d'Julie Reuter, nach virum Galerie-Alldag, als Curatrice op d'Bee gestallt hat. D'Kerstin Thalau ass méi iwwer dës "sacrée mission" gewuer ginn.

Am Kader a mat der Ënnerstëtzung vun Esch2022 huet dee grenziwwergräifende Kollektiv Le Gueuloir e Projet lancéiert mam Numm Rendez-vous Stammdësch. Nom éischten Deel am Dezember, deen um Belval gelaf ass, ass de Gueuloir elo zu Esch-Lalleng. Et geet ëm Rencontere vun Autorinnen an Auteure mat de Bierger:inne vun Esch, ëm urban Legenden an ëm theatralesch Ëmsetzung.

D'Valerija Berdi huet no Detailer beim President vum Gueuloir a Coordinateur vum Projet, dem Godefroi Godet, gefrot.