Kultur

D'Vergänglechkeet ass dat grousst Thema vum James Leader senger Poesie, och nees a sengem neie Gedichtband "In Steinsel Woods" (Editions Phi). Eng Kritik vum Michel Delage.

Fir den zéngte Gebuertsdag vun der ASBL Lët’z Arles hu sech hier Memberen eppes Besonnesches afale gelooss: si hunn di verschidde Lëtzebuerger Institutioune mat Edward-Steichen-Sammlungen un een Dësch bruecht, fir gemeinsam d’Expo “La nature d’Edward Steichen” fir di renomméiert Rencontres de la photographie d’Arles 2026 op d’Been ze stellen. Dernieft huet déi New Yorker Kënschtlerin a Chercheuse Lisa Oppenheim Steichen-Archiver besicht, fir op Basis vun hirem Material, an och fir Arles, eng zäitgenëssesch kënschtleresch Ausso zum Monsieur Steichen ze schafen. Gëschter hate mir iech d’Projete méi am Detail presentéiert: d’Aussoe fannt dir an eiser Mediathéik um Internet. Mee vu datt de Christoph Wiesner, zanter 2020 Direkter vun de Rencontres d’Arles, bei der Presentatioun dobäi war, wollt d’Kerstin Thalau vun him méi iwwert de ganze Festival gewuer ginn.

No "The Golden Record", sengem formal spannenden éischte Kuerzfilm, huet de jonke Regisseur Stephen Korytko mat "Dead Dad Girl" säin éischte Long métrage um Start. Am Film, deen eng Zort Hommage un US-amerikanesch College-Komedien aus den 90er ass, spillen ënnert anerem d’Sophie Mousel, de Philipe Thelen an de Luc Schiltz mat. De Stephen Korytko war mat senger Produktiounsfirma Samsa dëst Joer um Marché zu Cannes, wou et ënnert anerem dorëms goung, de Film wärend enger ganzer Rei Terminer ze pitchen an der Hoffnung, esou op international Distributeuren ze fannen. Tëschent zwee Terminer huet sech de Jeff Schinker mam jonke Realisateur getraff, fir méi iwwert de Film gewuer ze ginn an eraus ze fannen, wéi eng Opportunitéiten esou eng Präsens um Filmmarché eigentlech mat sech bréngen.

2016, also viru genee 10 Joer, ass d’ASBL Lët’z Arles gegrënnt ginn. Schonn e Joer drop hunn d’Memberen eng éischte Kéier di lëtzebuerger zäitgenëssesch Fotografie op de renomméierte Rencontres de la Photographie zu Arles presentéiert. An dobäi ass et bis haut bliwwen. Fir de ronnen Anniversaire sollt ee ganz besonnesche Projet Realitéit ginn. D’Kerstin Thalau war op der Presentatioun vun “Lët’z Arles -10 ans- une édition d’anniversaire d’exception”.

“Le sens, le sensible et la relation”, dat ass dëst Joer de Motto vum Literaturfestival ”Etonnants voyageurs” ze Saint-Malo an der Bretagne a Frankräich.

De Festival, deen zënter 1990 all Joer iwwer de Päischtweekend Schrëftstellerinnen a Schrëftsteller aus der ganzer Welt accueiléiert, mécht dat och dëst Joer an d’Valerija Berdi huet schonn hir Valis gepak fir dohinner ze fueren. Virdrun erzielt si eis awer nach Detailer.

De Sport an allen Éieren, mee wärend zu Lëtzebuerg jidderee Marathon gelaf ass, huet eise Korrespondent Max Tholl zu Berlin ee Konschtmarathon gemaach. 30 Stonnen non-stop Musek an engem fréiere Kraaftwierk - dat gouf et de Weekend zu Berlin. The Infinite Now ass een transmediale Festival fir experimentell Musek a Konscht, bei deem de Public sech waakreg an och schlofend op déi verschidden Artisten an Artistinnen aloosse soll.

Zu Cannes zielt all Minutt. Tëschent de Filmer, Interviewterminer an de Momenter, wou ee sech an de Presseberäich zeréckzitt, fir ze schreiwen, ze schneiden a versicht, nach lescht Ticketen fir deen een oder anere Screening ze kréien, ass et relativ schwiereg, zu Cannes Zäit ze fannen, fir zesummen iwwert dat, wat ee gesinn huet, ze diskutéieren. Dofir hu sech de Jeff Schinker an de Marc Trappendreher als éischt op enger Terrass bei der Gare zu Juan-les-Pins, wärend se op den Zuch fir op de Festival gewaart hunn, an duerno am TER iwwert hir éischt Highlights an Enttäuschungen ënnerhalen. Beschwat hu si “Sanguine”, “Sheep in the Box”, “Hope” an “Soudain”. Mir lauschteren hir Rezensioune mat enger Soundkuliss “on the road”.

Den Iwwerbléck vun der aktueller Filmprogrammatioun mam Michel Delage.

Ënnert dem Titel "Chroniques d'un monde avant. Fragments classés" (Hydre Editions) liwwert den Enrico Lunghi eng Sammlung vu kuerzen Erzielungen, déi e ganz pessimistesche Bléck an d'Zukunft geheien. E klenge Fonken Hoffnung léisst hien trotz allem fir d'Mënschheet bestoen.