Kultur

Aus den abstrakten Discoursen ëm déi sougenannte Kënschtlech Intelligenz' erauskommen an d'Léiermaschinnen an hire materiellen, historesche Kontext setzen: dat ass de Programm, dee sech den däitsche Medientheoretiker Paul Feigelfeld an enger rezenter Konferenz am Stater Konschtscasino ginn huet.

E Bäitrag vum Michel Delage

"Summer of '69" war en Hit vum Rockmuseker Bryan Adams. Enn November ass awer och eng Ausstellung ënner deem Titel an der Villa Vauban opgaangen. Do ass d'Iwwerschrëft als Point de départ geduecht: d'Kënschtler Berthe Lutgen a Misch Da Leiden hunn et am Summer 1969 zu Lëtzebuerg zum Deel richteg knuppe gelooss. Vill Konscht vun deemools huet d'Happenings net iwwerlieft. An der Expo "Summer of '69" ass Verschiddenes ze gesinn, mee et geet an der Haaptsaach ëm e Suivi vun de Karriäre Lutgen Da Leiden. D'Kerstin Thalau hat Geleeënheet, dem Misch Da Leiden e puer Froen ze stellen.

Ee Mann, mam Zuch ënnerwee op Paräis, fir seng grouss Léift erëmzegesinn ... Ass d'Erënnerung u sech net méi wichteg? De Michel Delage huet dem Albert Mambourg seng Novell gelies.

Oder "La conférence des absents" - op zwee Owenter, eemol op Däitsch an eemol op Franséisch, hat de postmodernen Theaterkollektiv Rimini Protokoll op eng aussergewéinlech Theaterproduktioun an den TNL invitéiert. Ganz besonnesch war, datt keng SchauspillerInnen op der Bün ze gesi waren, mee Leit aus dem Publik hu missen an déi verschidde Rolle klappen. En Experiment, ganz am Sënn vun der Berliner Ekipp.

D'Valerija Berdi huet mam Daniel Weitzel geschwat, deen nieft dem Helgard Haug an dem Stefan Kaegi Member vum Rimini Protokoll a fir d'Konzept, den Text an d'Regie responsabel ass.

De Rimini Protokoll koum op Lëtzebuerg op d'Initiativ vum Institut Pierre Werner an a Zesummenaarbecht mam Goethe Institut an dem Théâtre National Luxembourg.

D'Konditioun als schwaarz Fra: verstoppen oder ignoréieren? Déi brittesch Realisatrice Rebecca Hall inzeenéiert eng tragesch Geschicht an elegante schwaarz-wäisse Biller.

Eng Kritik vum Michel Delage

De Bruno Oliveira ass nach keng 30 Joer al, an awer huet hie sech mat senger visueller Konscht mëttlerweil scho quasi etabléiert. Säi Kalenner fir 2022 ass gutt gefëllt: Ausstellungen zu Rotterdam an Antwerpen, e gemeinsame Projet mam CAL an der Escher Stëmm vun der Strooss am Tramsschapp, plus eng Kënschtlerresidenz mam renomméierte Fotograf Jim Goldberg zu Kaunas am Kader vun Esch 2022. Nach bis de 5. Dezember inclus kënnt dir seng Aarbecht "In ore gloria" am Casino Display beim Engel, am Kader vun enger Gruppenexpo, gesinn. D'Kerstin Thalau wollt vum Bruno Oliveira wëssen, op dann elo awer alles Gold ass, wat blénkt.

"literarischernerd" ass säin Numm op Instagram. Mat iwwer 25.000 Follower gehéiert hien zu de bedeitendste Literaturblogger am däitschsproochege Raum. Soss ass hien ausgebilte Libraire a schafft an enger Librairie zu Tréier. D'Valerija Berdi huet mam Florian Valerius iwwer säi Blog, iwwer seng Léift fir d'Bicher an d'Buch am Allgemenge geschwat.

Bei Sujeten, wou anerer d'Schlappe verléieren, fille sech Erzielkënschtler esou richteg wuel. Zum Beispill spillen an onwahrscheinlech ville vun de Volleksmärecher, déi si zielen, di sougenannt "sages fous" oder "weise Narren" eng wichteg Roll. Gecken intrigéieren, faszinéieren, maachen nervös. Alles Grond genuch fir d'sages fous bei eis op der Antenne ze thematiséieren. D'Valerija Berdi huet di passend Musek opgeluegt, a versicht erauszefannen, op de Philippe Hansen dann elo "sage" oder "fou" ass.

Den 2. Dezember geet tëscht 16.00 an 21.00 Auer an der Ënneschtgaass d'Reuter Bausch Art Gallery op. Sinn an der Ënneschtgaass an der lescht net erstaunlech vill Galerien opgaangen? Et freet ee sech, wéi all di Galeristen iwwerliewe wëllen...?? Zwou Froen, déi ee méi dacks héiert, an déi d'Kerstin Thalau einfach emol un di jonk frëschgebake Galeristin Julie Reuter vun der Reuter Bausch Art Gallery weider ginn huet.

Am Kader vun der Initiativ "neistart Lëtzebuerg" huet d'Nathalie Ronvaux de Monolog "Moi, je suis Rosa" verfaasst ,deen ënnert der Regie vun der Aude-Laurence Biver ëmgesat ginn ass. D'Lady Rosa, interpretéiert vun der exzellenter Céline Camara, kann een am Mamer Kinneksbond gesinn. D'Valerija Berdi war op d'Première.