Kultur

D'Filmakademie huet e Mëttwoch d'Nominatioune fir déi néngt Editioun vum Lëtzebuerger Filmpräis annoncéiert. De Verdikt ass de 26. November am Groussen Theater. E Bäitrag vum Michel Delage

Den Himmel weist sech ëmmer méi gro an dréif, d'Beem verléieren hir Blieder an awer bleiwe verschidde Stied am Grand-Duché konterbont. Läit dat um Streetart, un der Hellewull Graffitien, déi op ëmmer méi Fassaden ze gesi sinn? Ettelbréck hat dëse Summer 15 Streetart-Kënschtler invitéiert, déi d'Piliere vun der Däichbréck als Staffelei notze konnten, fir eng Open Air Gallery entstoen ze loossen. Mat dobäi de "Cone The Weird" vu Saarbrécken. D'Kerstin Thalau huet hie kennegeléiert.

De Michel Delage huet e Bléck an déi nei Nummer vun der "Hémecht" gehäit. Behandelt gëtt ë. a. déi al Funktioun vum Ierfmarschall, déi "vergiesse Pandemie" vum Wanter 1813-14 an d'Redynamiséiere vum Clausener Schlassareal ufanks vum 19. Joerhonnert.

D'Servais-Präis-Laureatin Ulrike Bail huet viru Kuerzem de Gedichtband "statt einer ankunft" (Conte Verlag) verëffentlecht. D'Valerija Berdi, d'Kerstin Thalau an de Michel Delage hu sech an der Wonnerbarer VaLibraire mat deem Buch auserneegesat.

Dem Honoré de Balzac säi Klassiker "Illusions perdues" gouf elo fir de groussen Ecran adaptéiert. De leschte Samschdeg an der Emissioun Grousse Kino haten de Michel Delage, d'Martine Reuter an de Misch Bervard iwwer dësen neie franséische Film vum Xavier Giannoli geschwat.

Déi 14. Editioun vum CinEast-Festival ass e Sonndeg op en Enn gaangen. Als beschte Film gouf den Drama "Murina" vun der Kroatin Antoneta Alamat Kusijanović ausgezeechent. De Michel Delage iwwer de Palmarès vum Festival fir mëttel- an osteuropäesche Kino.

D'Frankfurter Buchmesse huet no engem Joer Paus seng Dieren dëst Joer vum 20. bis de 24. Oktober opgemaach. Et ass eng Bicherfoire, déi sech virun allem u Bicherediteure riicht, mee de Weekend ass och de grousse Public wëllkomm. Och Lëtzebuerger Editiounshaiser an hir SchrëftstellerInne sinn op der Plaz. Gedroen an organiséiert vum Departement Literatur an Editioun vu Kutur | lx sinn net just Bicher exposéiert, mee och eng Rei Diskussiounen ronderëm d'Buch sinn organiséiert.

Eis Mataarbechterin aus der Kulturredaktioun Valerija Berdi moderéiert eng Diskussiounsronn zum Sujet "Bicherblogger - nei Experienzen". All dës Panels kënnen online gekuckt ginn. D'Valerija Berdi verréit am Gespréich mam Kerstin Thalau Detailer.

Dëse Sonndeg leeft déi fënneft Editioun vun eiser Literatursendung Déi wonnerbar VaLibrairie. Eng Emissioun, wou d'Buch an d'Welt vun der Literatur am Mëttelpunkt stinn. Wat eis dann dëse Sonndeg vun 11 bis 12 erwaart, huet d'Valerija Berdi um Mikro vum Simon Larosche verroden.

D'Fotografin Noémie Goudal ënnersicht d'Relatioun tëschent dem Natierlechen an dem Kënschtlechen, tëschent Wëssenschaft an Imaginatioun, tëschent Konstruktioun an Erfindung. Dir frot Iech, wéi dat goe soll? Andeems si hire Fotoapparat einfach enzwousch an d'Landschaft hält?? Tatsächlech weisen der franséischer Fotokënschtlerin hir Biller genee dës komplex Bezéiungen, respektiv "other spaces", konkret Plazen baussent allen anere Plazen, déi vum Philosoph Michel Foucault "Heterotopien" genannt gi waren. Bis Februar 2022 kënnt Dir der Noémie Goudal hir Konscht am Arendt House um Kierchbierg entdecken. D'Kerstin Thalau war do.

Déi satiresch Texter vum fréieren 100,7-Journalist Jean-Pol Roden an d'Illustratioune vum Ingo Schandeler verschmëlzen zu engem liewege Sammelsurium, fënnt de Michel Delage.