Kultur

Eng Thrillerserie, déi op enger Roman-Trilogie vum Stephen King baséiert. Mir begleeden hei e pensionéierte Polizist, dee probéiert e psychopathesche Mäerder ze kréien, deen hie viru Joren net festhuele konnt.

Mat de berüümte franséische Chansone kënnt déi däitsch-lëtzebuergesch Kënschtlerin dës Kéier an d‘Fondation Valentiny op Rëmerschen. Iwwer hir Musek awer och iwwer déi aktuell Situatioun an den USA schwätzt déi Wal-New-Yorkerin um Mikro vum Valerija Berdi.

Hir Show ass de 17. Januar an der Fondation Valentiny um 19:00. Infoe fir Ticketen: www.luxembourg-ticket.lu

Vergëften, erschéissen, erdrénken, haiten, verbrennen: Dëst si fënnef vun de siwe "Methods of Killing Kylie Jenner". Nom Wedekind sengem "Spring Awakenings" inzenéiert d’Anne Simon der Jasmine Lee-Jones hiert Stéck - e Text wéi ee Pamphlet aus der Zäit vun de sozialen Netzwierker, an deem strukturelle Rassismus, Homophobie an d’Smartphone-Hatere gläichermoossen eng zolidd op den Deckel kréien. Den Nicolas Calmes an de Jeff Schinker waren den Dënschdeg op der Première am Centaure - a liwweren hir Andréck.

D’Traditioun wëllt, datt de Radio 100,7 als Antenne publique all Joer ee lëtzebuergesche Museksprojet auswielen däerf, fir d’Ländchen um Eurosonic Noorderslag ze vertrieden, ee vun deene gréisste Showcase-Festivalen op der Welt. De Marc Clement mellt sech aus Holland a seet eis méi.

Et gëtt Neits vun der Patricia Lippert: d'Molerin a Sculptrice, déi es net midd gëtt, esouwuel a Soloprojeten, wéi a Kollaboratioune mat anere Kënschtler:innen, drop hinzeweisen, datt de Mënsch nu wierklech net d'Kréinung vun der Schëpfung ass, an datt dat esouwuel fir d'Natur ronderëm hien, wéi och fir seng eege bannenzeg Natur, e Problem ass, huet Enn 2025 zwee Konschtbicher erausbruecht. Eemol am grousse Format "Der Baum der Er-kennt-nix" an dann, méi handlech, "Niko und die Friedens-Laus". Grond fir d'Kerstin Thalau d'Patricia Lippert emol an den 100,7-Studio ze ruffen.

Am Dezember huet de Jean Portante säi 75. biologeschen a säin 42. literaresche Gebuertsdag gefeiert. Mee fir de Lëtzebuerger Schrëftsteller ass dëse Réckbléck just eng Etapp: mat sengem neie Gedichtband "La panthère parfumée" an der Oper "Le siècle de Lucia/Non trovo il filo" gëtt et direkt zwou literaresch Aktualitéiten. Am Gespréich mam Valerija Berdi a Jeff Schinker erkläert de Jean Portante ënner anerem, wat et mat der "langue-panthère" op sech huet - a wéi ee klengt Heft seng Familljegeschicht bouleverséiert huet.

Den Iwwerbléck vun der aktueller Filmprogrammatioun mam Michel Delage

D'Massaker vu Mylai wärend dem Vietnam-Krich. Folter am Prisong vun Abu Ghraib am Irak an nach aner journalistesch Scoopen, déi d'Weltëffentlechkeet beweegt hunn, si mam Numm Seymour Hersh verbonnen. An hirem Documentaire fir Netflix zeechnen d'Laura Poitras an de Marc Obenhaus de Portrait vun der amerikanescher Legend vum Investigativ-Journalismus. De Michel Delage huet de Film gekuckt.

Mëssbrauch am Elterenhaus a Resilienz duerch d'Literatur sinn d'Sujete vum Debutfilm vun der amerikanescher Actrice-Realisatrice Kristen Stewart. De Michel Delage an d'Valerija Berdi hunn dësen Drama am Grousse Kino beschwat.