Kultur

Den Iwwerbléck vun der aktueller Filmprogrammatioun mam Michel Delage

De Michel Delage, d'Valerija Berdi an d'Vesna Andonovic beschwätzen dës ergräifend Doku-Fiktioun iwwer de Gaza-Krich.

Als beschte Lëtzebuerger Film bei der 11. Editioun vum Lëtzebuerger Filmpräis gouf de Samschdeg Owend “Hors d’haleine” ausgezeechent. Dem Eric Lamhène säin Drama krut och de Präis fir dat bescht Dréibuch. De Michel Delage huet mam Lëtzebuerger Realisateur Eric Lamhène a senger Co-Zenaristin Lyn Lee iwwer hiren Drama geschwat.

D‘Virginia Woolf ass fir hir modernistesch Klassiker “Mrs Dalloway”, “To the Lighthouse” an “Orlando” bekannt, Bicher, déi a méi wéi 50 Sproochen iwwersat goufen an och nach an der moderner Popkultur reegelméisseg ernimmt ginn. An elo ass ganz onerwaart neit Material vun der brittescher Schrëftstellerin opgedaucht. An dat ass zimmlech witzeg. D‘Claire Barthelemy huet fir eis eragelies.

Um Glacis steet e wäisst Zelt: nach net fir den Adventszirkus, mee fir de Konschtbusinesszirkus? Bis e Sonndeg inclus erwaart Iech do all Zäit déi 11. Luxembourg Art Week, also eng 80 international Galeristen a Galeristinnen an ee gutt gefëllte Kaderprogramm. Just 50 Meter niewendrun huet viru gutt zéng Joer en nawell speziellen Zirkusdirekter säin Zelt opgeschloen. Passen dem Konschtsammler Monsieur Pilo säi “Petit musée du Limpertsberg“ a Luxembourg Art Week iergendwéi zesummen?

De Schrëftsteller Guy Helminger huet eis Post vu Balzers an Liechtenstein geschéckt, an op daer steet haut Hoi. Firwat, dat gi mir elo gewuer, genee wéi och, wéi eng Zeitung een do liest.

Den zynesche Spëtzen-Detektiv Carl Morck kritt eng eegen Abteilung, dee sougenannten Departement Q. Hei soll hie sech mat enger klenger Ekipp ëm scho laang vergiesse Fäll këmmeren. Als éischt wëlle si dem Mysterium ëm déi verschwonne Staatsaffekotin Merritt Lingard op d’Spuer goen. De Gilles Schreurs presentéiert d’Serie “Dept. Q”.

D'Kanerbuch "KrixKrax" vum Marc Weydert (Text) a Patty Thielen (Illustratioun) ass mam Lëtzebuerger Buchpräis ausgezeechent ginn. Den Auteur war Invité an eiser Literaturemissioun "Déi wonnerbar VaLibrairie" op de Walfer Bicherdeeg an huet iwwer d'Iddien, déi hanner dem KrixKrax stinn, mat eis geschwat. D'Buch koum bei Editions Perspektiv eraus.

Eng 80 international Galerist:innen hunn am wäisse Luxembourg Art-Week-Zelt um Glacis Positioun bezunn. Am Zentrum vun der Foire steet ganz kloer de Business, dee jo éischter diskret ofgewéckelt gëtt; oder kennt dir d'Schätz aus Lëtzebuerger Privatsammlungen? Eng Dose Membere vum Cercle des collectionneurs du Mudam plus de Serge Libens vun der Fondation MeRL hunn décidéiert, eng Dierchen opzemaachen: si hunn d'Claire DiFelice, ausgebilt Juristin a Konschtmanagerin, haaptberufflech chargée de mission fir d'Steichen Collections, ma dernieft och fräischaffend Curatrice, dozou invitéiert, mat gesammelte Wierker, am Malt am Gronn, par rapport zu enger Conception spatiale vun der Tatiana Fabeck, eng Expo fir de breede Public op d'Been ze stellen. D'Kerstin Thalau huet mat der Claire Di Felice iwwert "Timeless voices" geschwat.