Kultur

D’Marie Trussart erënnert dorunner, wat genee d’Iddi vum Kulturentwécklungsplang ass - a geet méi an den Detail vun der ILRES-Enquête 2024 iwwer dat kulturellt Liewen zu Lëtzebuerg. D'Etude stellt d’Basis vum Aktiounsplang duer, deen op den Assisë gëschter (25.6.) virgestallt gouf.

Op de Kulturassisë gouf bis dato all zwee Joer gekuckt, wou de Kultursecteur an der Ëmsetzung vum Kulturentwécklungsplang 2018-2028 dru wier. Dat bal 200 Säite schwéiert Dokument war dem Jo Kox, Premier Conseiller ënner der Kulturministesch Sam Tanson, säi kulturpoliteschen Opus Magnum. Iwwer de sougenannte KEP ass gëschter (26.6.) op den Assises culturelles am CAPE zu Ettelbréck relativ wéineg geschwat ginn, amplaz huet de Kulturminister Eric Thill een Aktiounsplang an d’Liewe geruff fir d’Kultur zu Lëtzebuerg méi accessibel ze maachen. De Jeff Schinker war op der Plaz.

Virum Marie Trussart sengem Bäitrag iwwer d’Etude zu kulturelle Pratiken an dem Interview mam Premier Conseiller Carl Adalsteinsson, deelt de Jeff Schinker seng Andréck an Analys zu den Assisen.

D'Museker:inne vum Lëtzebuerger Ensembel fir nei Musek United Instruments of Lucilin maachen aktuell eng Residenz an der Fondation Valentiny zu Rëmerschen. Den 29. Juni proposéiere si e Concertsdag ganz ronderëm de Motto Musique + Equilibre. Um Programm steet Nei Musek vu ville verschiddene Komponisten. Am Mëttelpunkt steet den John Cage, ee vun de berüümtste Komponisten aus dem 20. Joerhonnert. Den Olivier Sliepen ass Saxophonist bei Lucilin an ee grousse Fan vum Cage a senger Musek. Wann hien d'Chance gehat hätt, den Amerikaner kennenzeléieren, da wier hie gär zesumme mat him an de Bësch spadséiere gaangen, Champignone sammelen a si hätten duerno zesummen eng Champignonszopp gekacht. Dat a villes méi verréit de Saxophonist dem Marie Schockmel am Gespréich.

Aus dem Feminismus gebuer, fir all Mënschen an hir Feminitéit weidergeféiert, ass de Festival This Is A Human's World zu Téiteng en Treff fir ze philosophéieren, sech méi nozekommen, a Konscht ze feieren.

De Jean Portante hëllt eis mat op d'Rees vun deenen arabesche Wierder an eisem Sproochgebrauch.

"An Eastern Trip" heescht den neisten Album vun der Pianistin Sabine Weyer an dem Cellist Dimitri Maslennikov. Do huelen déi zwee hir Nolauschterer an Nolauschterinne mat op eng Rees an ëstlech Länner. Ze héiere sinn net nëmme Wierker vu berüümte Komponiste wéi dem Prokofieff, mee och vu manner bekannte wéi dem Miklós Rózsa.

Nieft de musikaleschen Entdeckungen, déi een hei maache kann, kann een dann och de Cover vum Album bewonneren. Et ass en definitiv méi aussergewéinleche Cover, deen den Duo op engem Motorrad weist. Dat soll hir Rees op dësem Album symboliséieren.

Déi zwee verrode méi am Gespréich mam Marie Schockmel.

Vu leschte Mëttwoch bis e Sonndeg war zu Paräis déi 42. Editioun vum Marché de la Poésie, dee gréisste Poesie-Event a Frankräich. Mat dobäi war Kultur I lx mat engem Stand, op deem d’Kultur-Export-Agence dem Public an den Editeuren déi Lëtzebuerger Poesie méi no bruecht huet. Wat zeechent dës aus a wéi steet et ëm si? Eise Korrespondent Max Tholl war leschte Freideg um Marché.

D’Biergerbühn, ee Projet-Phare vum Kollektiv Independent Little Lies, erlaabt et, net professionelle Mënschen, déi sech fir Theater begeeschteren, sech mat Professionellen aus dem Theater am Kader vu Workshoppen auszetauschen - an u gemeinsame Projeten ze schaffen. No "Doheem", engem Stéck, dat 2022 am Ferroforum opgeféiert gouf, feiert Enn der Woch hiren neie Projet “The Stranger Song” an der Kufa Premiere. D’Metteuse en scène Elsa Rauchs a Claire Wagener, déi d’Biergerbühn zanter 2022 zesumme leede, si live am Studio beim Jeff Schinker.

De leschte September war et d’Nouvelle, datt d’Aline Bouvy 2026 Lëtzebuerg op der renomméierter Konschtbiennale vu Venedeg representéiere wäert. Déi belsch-lëtzebuergesch plastesch Kënschtlerin, déi 1974 zu Bréissel op d’Welt koum, notzt d’Konscht als Outil, fir d’Grenzen, d’Hierarchien an d’Kontrollmechanisme bannent Espacen an Normen ze hannerfroen. Dat heefeg op eng spilleresch bis ironesch-satiresch Manéier. An d’Dimensioune bei hire Skulpturen a Molereie kéinte fir en “AliNe in Wonderland” stoen. Vu muer u presentéiert d’Aline Bouvy am Casino Lëtzebuerg an der Ënneschtgaass mat der Expo “Hot Flashes” eng Aart Amuse-Bouche fir Venedeg. Dozou hat d'Kerstin Thalau e puer Froen.