Lestin

Í morgun bárust fréttir af því að Bíó Paradís hefði sagt upp öllu starfsfólki og framtíð kvikmyndahússins væri óljós. Óvissan virðist að einhverju leyti snúast um framtíð húsnæðisins. Fréttirnar hafa vakið upp sterk viðbrögð á samfélagsmiðlum enda hefur kvikmyndahúsið mikla sérstöðu á íslenskum bíómarkaði. Við ræðum við Hrönn Sveinsdóttur, framkvæmdastjóra um framtíð Bíó Paradísar

Slúðurvefsíðan TMZ hefur mætt mikilli reiði síðustu daga vegna fréttaflutnings síns á andláti Kobe Bryant. Þetta er ekki í fyrsta sinn sem síðan kemst í kast við almenningsálitið en alltaf heldur hún þó velli.

Í síðustu viku kom út nýtt lag með rökkurdiskósveitinni Chromatics. Þau gáfu út sína fyrstu breiðskífu í sjö ár í október síðastliðnum en það var þó ekki platan sem fólk var að bíða eftir. Davíð Roach segir okkur upp og ofan af Chromatics í Lestarferð dagsins.

Marta Sigríður Pétursdóttir rýnir í kvikmyndirnar Little Women og Portrait of a Lady on Fire.

Í tilefni að sýningu nýjustu kvikmyndar Romans Polanski, J'accuse, eða Ég ákæri, sem sýnd er á franskri kvikmyndahátíð rifjum við upp eitt frægast dómsmál sögunnar, Dreyfus-málið, sem tvístraði frönsku samfélagi um aldamóin 1900. Liðsforingi í franska hernum, gyðingurinn Alfreð Dreyfus var dæmdur fyrir njósnir og landráð en reyndist saklaus.

Og við kynnum okkur upplýsingar sem varpa nýju ljósi á sögu titrarans.

Síðar í vikunni sendir tónlistarmaðurinn Benni Hemm Hemm frá sér sína áttundu breiðskífu, Kast spark fast. Undanfarin ár hefur Benni gefið út lágstemmt svefnherbergispoppið sem hefur ekki alltaf ratað í útvarp eða á tónleika. En nú snýr hann aftur endurnærður með hljómsveit skipaðri stórskotaliði íslenskra indítónlistarmanna. Benni Hemm Hemm heimsækir Lestina í dag.

Halldór Armand Ásgeirsson flytur pistil að venju á þriðjudegi. Í þetta sinn er hann að hugsa um hversu óafsakanlega dýrt er að búa á Íslandi og einhvern veginn kemur Ódysseifur við sögu.

Á síðustu misserum hafa hlaðvörp rutt sér til rúms í hinni íslensku fjölmiðlaflóru. Þau fjalla um allt milli himins og jarðar, frá morðum yfir í meðgöngu og koma í ýmsum formum - geta verið spjallþættir, einræður eða jafnvel leikin. Næstu vikur hyggst Lestin kynna sér þessa nýju ólínulegu dagskrárflóru landsins, eitt hlaðvarp í einu. Við byrjum á hlaðvarpi Granda 101.

Fyrst birtist fréttin á slúðurvefnum TMZ. Svo barst staðfesting frá fleiri miðlum, ESPN, CNN, LA Times: Ein skærasta stjarna körfuknattleiksheimsins er öll. Kobe Bryant, 13 ára dóttir hans og sjö aðrir létust í hörmulegu þyrluslysi í Kaliforníu í gær. Lestin fer yfir feril hans og menningarlegt gildi með blaðamanninum Kjartani Atla Kjartanssyni.

Andlát Kobe setti mark sitt á Grammy verðlaunahátíðina sem haldin var í gærkvöldi. Þrátt fyrir harmi þrungið yfirbragð tókst tónlistarfólkinu þó að deila út grammófónum og í sumum flokkum mörkuðu þeir jafnvel tímamót. Við lítum yfir hápunktanna.

Í skugga hinnar skæðu Kóróna-veiru héldu Kínverjar áramót nú um helgina. Ár svínsins leið undir lok og ár rottunnar gekk í garð. Við sökkvum okkur ofan í kínverska tímatalið og heyrum hvernig fólk fagnar nýárinu í þessu fjölmennasta ríki heims. Hafliði Sævarsson heimsækir Lestina og segir frá.

Tómas Ævar Ólafsson flytur síðasta hlutann í þriggja pistla röð sinni um veggjakrot.

Í vikunni höfum við litið um öxl á Heimsmeistaramótið í handknattleik 1995. Við höfum skoðað aðdraganda þess, hvernig tíðarandinn tók það föstum tökum og slakt gengi íslenska landsliðsins. Í síðasta innslagi örseríunnar Þegar Ísland hélt stórmót, skoðum við hvað læra má af mótshaldinu og ræða nákvæmlega hvað það var sem fór úrskeiðis.

Júlía Margrét Einarsdóttir tekur sér far með Lestinni. Hún fjallar um Hollywood myrkurs og dauða, fjöldamorðingja og safn dauðans á þessum annars lauflétta fimmtudegi.

Og tónlistargagnrýnandi Lestarinnar, Davíð Roach Gunnarsson, veltir fyrir sér Grammy verðlaununum sem afhent verða um helgina.

En við byrjum á sannri sögu af tveimur virðulegum konum á ferð og flugi. Anna Kristjánsdóttir segir frá

Gengi íslenska karlalandsliðsins í handknattleik gegn Noregi í gær rímar ágætlega við innslag dagsins í örseríunni Þegar Ísland hélt stórmót. Í dag rifjum við upp sjálfan handboltann og skoðum hvernig lið sem stefndi á pall endaði nær botninum.

Áslaug Torfadóttir rýnir í sjónvarpsþættina You. Þeir segja frá sætum en siðblindum eltihrelli og hafa vakið mikla athygli.

Og við leggjum leið okkar með Gráum ketti í kynlífstækjaverslunina Adam og Evu og finnum fyrir forláta dúkku.

Lestin heldur áfram för sinni, aldarfjórðung aftur í tímann í örseríunni þegar Ísland hélt stórmót en að þessu sinni skoðum við menninguna í kringum HM í handknattleik 1995 - þann svip sem staður og stund setti á mótið. Við sögu koma meðal annars Diddú, Davíð Oddson, Kringlan, Café Reykjavík og svo lukkudýrið Mókollur.

Það er kannski skrítið að segja að ferskir vindar leiki um ástralska pönk tónlist, svona miðað við það hamfaraveður og elda sem geysa í álfunni, en engu að síður gerir Jóhannes Ólafsson þessa vinda og þróun þeirra að umfjöllunarefni sínu í dag. Síðasti áratugur hófst með hljómsveitum eins og Tame Impala og Pond sem ruddu sækadelíska braut fyrir rokkið og í dag hefur þróast þar „geggjað pöbbapönk“, eins og Jóhannes orðar það, með tilheyrandi möllettum og stælum.

Og Halldór Armand Ásgeirsson flytur okkur pistil að venju á þriðjudegi.

Nú þegar heimsmeistaramótið í handknattleik stendur yfir er viðeigandi að líta um öxl og minnast þess þegar sama mót var haldið á Íslandi fyrir aldarfjórðung. Næstu daga flytjur Lestin örseríuna Þegar Ísland hélt stórmót og í fyrsta þætti ætlum við að skoða aðdragandan að HM '95, þar sem gekk á ýmsu og jafnvel kom til greina að hætta við mótið.

Ein áhrifamesta plata allra tíma er ein fyrsta raftónlistarplata sögunnar, Silver Apples of the Moon frá árinu 1967 eftir bandaríska tónskáldið Morton Subotnick. Subotnick braut blað í tónlistarsögunni með því að búa til algjörlega nýtt listform en platan var eins konar auglýsing fyrir Buchla hljóðgervilinn, sem átti eftir að móta hvernig raftónlist hljómaði næstu áratugina. Þórður Ingi Jónsson skoðar magnað líf og brautryðjandi feril tónlistarmannsins Morton Subotnick í dag.

Marta Sigríður Pétursdóttir rýnir í heimildarmyndina Ég er einfaldur maður, ég heiti Gleb.

Og Tómas Ævar Ólafsson flytur okkur annan pistil sinn af þremur um veggjakrot.

Geimvísinda- og tækniskrifstofa Íslands hefur ekki farið hátt með störf sín síðastliðin misseri. Nú verður hinsvegar breyting þar á, þar sem stofnunin hefur hafið samstarf við Skyrora, ungt frumkvöðlafyrirtæki með höfuðstöðvar í Skotlandi sem sérhæfir sig í smíðum og skotum á eldflaugum fyrir gervihnetti. Vonast er til að Ísland geti verið skotpallur fyrir þrjár tilraunaeldflugar á næstu tólf mánuðum. Atli Þór Fanndal, ráðgjafi og Owain Hughes, viðskiptastjóri Skyrora, taka sér far með Lestinni í dag.

Davíð Roach flytur okkur fimmtudagspistil. Í þetta sinn rýnir hann í rapparann Tyler the Creator. Sá átti að margra mati eina bestu plötu síðasta árs en hans fyrri verk eru síst síðri að mati Davíðs.

Á föstudag verður haldið opnunarpartý nýrrar tónlistarmiðstöðvar Stelpur rokka! í Völvufelli í Breiðholti. Þar munu samtökin halda úti tónleikasal og kennslurými. Við kíkjum í tónlistarmiðstöðina í Breiðholti og ræðum við Önnu Sæunni Ólafsdóttir frá Stelpur Rokka.

Og við heyrum um fyrstu beinu útvarpsútsendinguna sem fór fram fyrir 110 árum síðan.

Í rúman aldarfjórðung hefur breska hljómsveitin Tindersticks verið að móta sinn sérstaka hljóðheim, dramtískt kammerpopp með melankólískum textum og einkennandi baritónsöng Stuarts Staple. Þessi virta sveit kemur fram á tónleikum í Hljómahöllinni í Keflavík í febrúar og leikur meðal annars lög af nýútkominni tólftu plötu sinni, No Treasure but hope. Við hringjum til Frakklands og ræðum við Stuart Staple úr Tindersticks.

Marta Sigríður Pétursdóttur rýnir í kvikmyndina Gullregn eftir Ragnar Bragason

Húsnæði Ljósmyndaskólans á Granda hefur stækkað um heilan sýningarsal á síðustu vikum. Í rýminu má nú finna verk sex útskriftarnema, sem veita gestum innsýn inn í fjölbreytt umfjöllunarefni, allt frá fósturmissi til eyðibýla í kartöfluþorpi. Útskriftarneminn Hrafna Jóna Ágústsdóttir leiðir okkur um sýninguna.

Og við kynnum okkur 150 ára gamlan, bandarískan asna