Lestin

Í byrjun febrúar ár hvert fer fram á efstu hæð Pennsylvania Hótelsins í New York einhver yfirgengilegasta, litríkasta og hárugasta tískusýning heims, New York Pet Fashion Show. Margir þátttakendur eyða þúsundum dollara og mörgum mánuðum í undirbúning, og eru búningar gæludýranna jafnvel sérhannaðir af sérstökum gæludýrafatahönnuðum. Ljósmyndarinn Kári Björn Þorleifsson hefur fylgst með sýningunni undanfarin ár.

Þeir segja að tíminn græði öll sár og Dixie Chicks hafa beðið nógu lengi. Tríóið gaf í gær út lag af nýrri plötu, þeirri fyrstu sem sveitin sendir frá sér allt frá því að þær gerðu upp útskúfun sína úr kántrí-heiminum á Taking the Long Way árið 2006. Á þeim 14 árum sem liðin eru, án nýrrar tónlistar, hefur bandið orðið áhrifameira en nokkru sinni fyrr.

The Slow rush nefnist nýjasta plata áströlsku sýrurokksveitarinnar Tame Impala. Þessi einsmannssveit hefur verið einhver vinsælasta rokksveit heims undanfarin ár, í stöðugri framþróun. Davíð Roach Gunnarsson rýnir í plötuna og veltir fyrir sér hvort sveitin stefni enn áfram - eða hvort hún sé föst í sama farinu.

Love is Blind nefnast raunveruleikaþættir sem njóta mikla vinsælda á Netflix um þessar mundir. Þættirnir bjóða upp á nýjan snúning á hefðbudna stefnumótaþætti, tilhugalíf þátttakenda fer fram án þess að þeir fái að hittast í eigin persónu. Nokkur hópur íslendinga hefur tekið ástfóstri við þáttunum, við ræðum við eina þeirra Evu Ruza í Lestinni í dag.

Kvikmyndahátíðin í Berlín fór fram í sjötugasta skipi á dögunum. Það var íranska kvikmyndin There is no evil hlaut aðalverðlaun hátíðarinnar í ár, en Ásgeir Ingólfsson tíðindamaður Lestarinnar í mið-Evrópu, fjallar um þrjár aðrar kvikmyndir sem sýndar for á hátíðinni: Shirley, Last and First men og svo myndina sem honum fannst bera höfuð og herðar yfir aðrar myndir á hátíðinni First Cow.

Sjónleikar er tilraun til þýðingar á hugtakinu audio-visual performans, lifandi flutningur á myndefni og tónum. Tvíeykið Unfiled, sem er skipað þeim Atla Bollasyni og Guðmundi Úlfarssyni, hefur haldið úti hálfgerðri tilraunastofu um sjónleika undanfarna mánuði. En á föstudag opna þeir sýninguna Skjáskot í Ásmundarsal þar sem þeir leika sér með afrakstur vinnunnar.

Í gegnum tíðina hafa sígarettur verið tákn um töffaraskap, frelsisþrá og óttaleysi andspænis dauðanum. En nú eiga þær undir högg að sækja. Unga fólkið reykir færri sígarettur en áður, kvikmyndaver vilja stroka reykingar út af hvíta tjaldiu og Facebook ritskoðar auglýsingaefni sem inniheldur sígarettur - jafnvel þó það sé bara fyrir íslenskan söngleik byggðan á ævi og tónlist Bubba Morthens.

Heimildarmyndin Chasing the Present verður frumsýnd á Íslandi á sunnudag. Myndin segir frá leit James Sebastiano að lausn við kvíðaröskun sinni en sýningin fagnar einnig útgáfu tónlistarinnar úr myndinni, sem er eftir íslenska tónlistarmanninn Snorra Hallgrímsson.Við ræðum við Snorra og James í Lestinni í dag.

Halldór Armand Ásgeirsson flytur pistil að venju á þriðjudegi. Í dag rifjar hann upp sögu af því þegar það kviknaði í á Klambratúni.

En við byrjum á því að sökkva okkur djúpt ofan í safn Ríkisútvarpsins hér í Efstaleiti.

Í síðustu viku var tilkynnt að hljómsveitin Korter í flog væri ein þeirra sveita sem kæmi fram á Hróarskelduhátíðinni í sumar. Sveitin hefur verið iðin við kolann í íslensku neðanjarðarrokksenunni undanfarin ár. Nýjasta plata þeirra Anna & Bernhard Blume (drepa alla fasista) er uppfull af kaotískri leikgleði, pönkuðu súrkálsrokki og meinfyndinni textagerð. Korter í flog heimsækja Lestina í dag.

Næstu fjórar vikur verður fjallað um tölvuleiki í Lestinni á mánudögum. Bjarki Þór Jónsson flytur fyrsta pistil sinn af fjórum úr heimi tölvuleikjanna. Að þessu sinni stiklar hann á stóru í sögu þessarar menningargreinar.

Um helgina kom saman hópur fólks og fékk sér húðflúr. Hér var um heldur óhefðbundna flúrun að ræða því ekki aðeins rann allur ágóðinn til góðgerðarmála heldur er það ætlað til minningar um ungan mann sem kvaddi alltof snemma.

Og við spjöllum lauflétt um söngvakeppnina og tæknivandræðin sem henni fylgdu.

Er Chromo Sapiens Instagramvænsta sýning listasögunnar? Þessari spurningu varpaði mbl.is upp í fyrirsögn eftir opnun sýningar Hrafnhildar Arnardóttur/ Shoplifter í Hafnarhúsinu í janúar. Síðan þá hafa sjálfur á skærbleikum, loðnum bakgrunni flætt um samfélagsmiðla - allir verða að eiga mynd af sér og barninu sínu í Shoplifter frumskógunum. í Lestinni í dag veltum við fyrir okkur þeim áhrifum sem Instagram hefur á list og það hvernig við upplifum listina.

Við flettum hinni umdeildu bók, Hollywood Babylon frá árinu 1965, sem inniheldur gróuslögur og slúður um kvikmyndastjörnur frá gullaldarárum Hollywood. Það er kvikmyndaleikstjórinn Kenneth Anger sem skrifaði bókina á sínum tíma en með útgáfunni áleit h+ann sig vera að skrásetja þjóðsagnaarf borgarinnar.

Á þriðjudag var frumsýnd á kvikmyndahátíðinni í Berlín, kvikmyndin Last and first men eftir Jóhann Jóhannsson tónskálds. Myndin er fyrsta leikstjórnarverkefni Jóhanns í fullri lengd, en honum auðnaðist ekki að klára myndina áður en hann lést í febrúar 2018. Við heyrum um viðtökur myndarinnar á Berlinale og ræðum við Þóri Snæ Sigurjónsson, framleiðanda, sem er staddur í Berlín.

Við ræðum við Eyjólf Kjalar Emilsson, prófessor í heimspeki við háskólann í Osló, um nýja þýðingu hans á samræðunni Fædros eftir gríska heimspekinginn Platón. Þessi 2400 ára samræða er stórskemmtileg og í henni tekst söguhetjan Sókrates á við ýmis krassandi viðfangsefni, popúlíska ræðulist, gagnsleysi ritmálsins og samkynhneigðar ástir.

Það hefur ekki farið mikið fyrir söngkonunni Duffy undanfarið. Hún átti eina vinsælustu plötu fyrsta áratugarins gerði aðra minni plötu, og hvarf svo. Fyrir 24 tímum var hún þó skyndilega komin á Instagram, þar sem hún útskýrði afhverju hún þurfti að hverfa úr sviðsljósinu.

Brynhildur Bolladóttir tekur sér svo far með Lestinni í dag. Hún segir okkur frá raunveruleikaþættinum Survivor sem hefur verið á skjánum í 20 ár um þessar mundir, öllum að óvörum. Hún ræðir langl

Í gær var kvikmyndaframleiðandinn Harvey Weinstein sakfelldur fyrir kynferðisbrot og -áreitni gegn tveimur konum og á líklega yfir höfði sér fangelsisvist. Mál Weinstein varð kveikjan að Metoo-hreyfingunni fyrir rúmlega tveimur árum. Menningarleg úrvinnsla á þeim atburðum er nú í fullum gangi í bókum, kvikmyndum og sjónvarpi. Rætt verður við Þóru Tómasdóttur, fjölmiðlakonu, um Metoo og menningarlega úrvinnslu.

Við röltum um kirkjugarð í Los Angeles með kvikmyndagerðarmanninum Erlingi Óttari Thoroddsen. Við ræðum um nýja mynd hans Midnight Kiss sem hann skrifaði fyrir streymisveituna Hulu og hugmyndina að elta drauma sína.

Og Halldór Armand Ásgeirsson flytur okkur pistil að venju á þriðjudegi. Í þetta sinn fjallar hann um óhamingjusömustu þjóð Evrópu.

K-pop-sérfræðingur Lestarinnar Hulda Hólmkelsdóttir lýkur fjögurra pistla ferð sinni um heim kóreiskrar popptónlist. Í þetta sinn kafar hún í hneykslismál tengdum kóreisku poppstjörnunum, ædolunum svokölluðu, en þau geta verið af ýmsum toga.

Við tökum upp þráðinn þar sem frá var horfið í umfjöllunum okkar um íslensk hlaðvörp. Tinna Björk Krist­ins­dótt­ir, Ingólf­ur Grét­ars­son og Tryggvi Freyr Torfa­son eiga líklega eitt vinsælasta hlaðvarp landsins sem ekki fjallar um morð eða fótbolta: Þarf alltaf að vera grín?

Síðan í desember hafa á þriðja þúsund manns látist úr sjúkdómum tengdum hinni nýju Corona-veiru, Covid-19 eins og hún er kölluð. Óttinn við veirur, smitsjúkdóma, faraldur og pláguna er djúpstæður í menningu okkar og skilningur okkar á atburðum og hræðsla sprettur úr þessu sameiginlega minni okkar. Í Lestinni í dag skoðum við veirur og nokkur dæmi um hvernig faraldur birtist í skáldskap.

Fyrr í vikunni sendi hópur kvenna opið bréf til útvarps- og dagskrárstjóra Ríkisútvarpsins undir yfirskriftinni Vegsömun nauðgunarmenningar á RÚV. Þar var gagnrýnt að kvikmyndin Elle eftir hollenska leikstjórann Paul Verhoueven hafi verið sýnd í sjónvarpinu á sunnudagskvöld. Myndin er umdeild, hefur hlotið mikið lof en einnig gagnrýni, ýmist verið sögð feminísk ádeila á feðraveldið eða nauðgunarfantasía.

Lestin í dag verður tekin undir pallborðsumræður um hlutverk og rými listarinnar, um ofbeldi og ritskoðun. Gestir eru Sjón, Kristín I. Pálsdóttir, Guðrún Elsa Bragadóttir, Skarphéðinn Guðmundsson og Marta Sigríður Pétursdóttir.

Sjónvarpsþættirnir Love Island eru einstaklega léttvægt sjónvarpsefni - raunveruleikasjónvarp af ódýrari gerðinni þar sem hópar karla og kvenna leysa þrautir og finna ástina. Dramatíkin er aldrei langt undan en afþreyingin er þægileg, fyndin - þess eðlis að hægt er að slökkva bara á heilanum og horfa. Nú, í kjölfar andláts þáttastjórnandans Caroline Flack, hefur umræða um þáttinn hinsvegar tekið á sig myrkari mynd - en kannski, var það einmitt myrka umræðan sem leiddi til andlátsins.

Sjónvarpsþættirnir Exit, eða Útrás, byggja á sönnum sögum úr norska fjármálaheiminum. Þættirnir hafa vakið mikið umtal í Noregi enda innihalda þeir góðan skammt af ofbeldi, firringu, siðblindu og standpínu. Katrín Guðmundsdóttir rýnir í þættina.

Tugir þúsund Íslendinga hafa tekið persónuleikapróf Íslenskrar Erfðagreiningar frá því á föstudag. Fjölmargir hafa svo deilt niðurstöðunum á samfélagsmiðlum, opinberað persónuleika sinn fyrir vinum og vandamönnum. Við ræðum við Daníel Þór Ólason, prófessor í sálfræði, um persónuleika, sjálfsþekkingu og persónuleikapróf.