Lestin

Alþjóðlegar tölur sýna að konur eru mun færri en karlmenn í stétt atvinnuljósmyndara. Ýmislegt bendir hins vegar til þess að þær fangi viðfangsefnið með öðrum hætti en karlmenn. Þær dragist fremur að því að segja sögur og fanga tilfinningar. En hverskonar sögur fanga konur í ljósmyndun? Við ræðum við Heiðu Helgadóttir en hún er ein þriggja kvenljósmyndara sem koma fram á málþingi um efnið í kvöld.

Halldór Armand Ásgeirsson flytur sinn vikulega pistil frá Berlínarborg, en að þessu sinni fjallar hann um hækkaða húsnæðisleigu og sorgarferli í blokkinni þar sem hann býr.

Í dag eru 10 ár frá því að Chelsea Manning lak fyrstu skjölunum til wikileaks. Leki sem vakti mikla athygli á sínum tíma og hafði afdrifaríkar afleiðingar fyrir líf Manning.

Við höldum líka upp á annað afmæli, 135 ára afmæli sögunnar um Stikilsberjafinn, Huckleberry finn, eftirMark Twain

Tónlist í þættinum:

Astrud Gilberto - Photograph

Lady Gaga - Million Reasons

Destiny's Child - Bills, bills, bills

The Strokes - At the door

Tónlistarbandalagið og útgáfuhópurinn Post-dreifing hefur komið eins og stormsveipur inn í Reykvískt rokktónlistarlíf á undanförnum tveimur árum, með ungæðislegri tilraunamennsku og pönkuðu viðhorfi. Nú um helgina kom út þriðja safnplata hópsins, Drullumall 3. Við ræðum við tvo meðlimi Post-dreifingar um þessa nýjustu útgáfu.

Á laugardag höfðu tæplega 50 þúsund einstaklingar tekið persónuleikapróf íslenskrar erfðagreiningar. Um leið veittu þessir tæplega 50 þúsund einstaklingar stórfyrirtæki aðgang að persónulegum heilsufars-upplýsingum sínum. Möguleikunum í notkun og misnotkun persónuupplýsinga fleygir fram og það er erfitt að sjá afleiðingarnar fyrir. Í dag heyrum við sögu af einum slíkum óvæntum afleiðingum, sögu af genabanka sem leiddi til handtöku raðmorðingja.

Hulda Hólmkelsdóttir heldur áfram að leiða okkur um heim K-poppsins. Í dag ræðir hún meðal annars skuggahliðar suður kóreyska tónlistarbransans.

Meira en 2500 íslendingar fylgjast með falsfréttasíðunni Fréttirnar á Facebook. Nokkrum sinnum í viku birtast þar skjáskot af fréttamiðlum landsins, Vísi, Rúv og Bændablaðinu, með upprunalegum fréttaljósmyndum en nýjum og spaugilegri fyrirsögnum. Við ræðum við ritstjórann, Pál Ivan frá Eiðum.

Hátíðin List í ljósi fer fram í kvöld á Seyðisfirði. Þetta er listaviðburður sem fer fram í febrúar ár hvert og fagnar endurkoma sólar inn í fjörðinn. Lestin slær á þráðinn til Seyðisfjarðar og ræðir við skipuleggjanda hátíðarinnar Sesselju Hlín Jónasardóttir.

Ljóð, myndlist og tónlist eftir listamenn sem nota netið í sköpun sinni er helsta viðfangsefni smátímaritsins Mid Magazine. Þórður Ingi Jónsson, tíðindamaður Lestarinnar í Bandaríkjunum, ræddi við útgefandann Zachary Swezy um stöðu ljóðsins á internetinu.

Anna Marsibil hefur verið úti í Bandaríkjunum að fylgjast með Óskarsverðlaunahátíðinni og tók stórt viðtal við Hildi Guðnadóttur fyrr í vikunni. Við það tilefni fékk Anna að handleika Óskarsstyttuna og fór í kjölfarið að velta fyrir sér reglunum um þessa fornfrægu styttu.

Tónlist:

Hjálmar - Lýsi ljós

Konsúlat - Mobarley

Black Pumas - Black Moon Rising

"Eru kvikmyndirnar í stríði við hina ríku?" spyr kvikmyndagagnrýnandi BBC í nýlegri grein. Hann nefnir til að mynda óskarsverðlaunakvikmyndirnar Parasite og Jóker, sem bjóða báðar upp á harða gagnrýni á misskiptingu í kapítalísku samfélagi. Við veltum fyrir okkur stéttastríði í kvikmyndum með Önnu Björk Einarsdóttur, nýdoktor og sérfræðingi í öreigabókmenntum.

Afmæli ástarinnar nálgast! Valentínusardagurinn verður haldin hátíðlegur þann 14. febrúar. Að gefnu tilefni ræðir Lestin við Eyrúnu Ósk Jónsdóttir, skáld, um ástarljóð og Sigríði Þorgeirsdóttir um rómantísku gamanmyndina Notebook.

Gunnar Theodór Eggertsson, kvikmyndagagnrýnandi Lestarinnar, rýnir í tvær nýjar bandarískar kvikmyndir: Uncut Gems og Birds of Prey

Hildur Guðnadóttir varð á sunnudag fyrst íslendinga til að hljóta Óskarsverðlaunin, fyrir tónlist sína í kvikmyndinni Jóker. Anna Marsibil gerði sér sérstaka ferð til Los Angeles til að fylgjast með verðlaunahátíðinni. Henni tókst að hafa upp á Hildi á mánudagsmorgun. Við ræðum við nýkrýndan Óskarsverðlaunahafa Hildi Guðnadóttur í Lestinni í dag.

En rauði dregillinn og Hollywood eru ekki einu staðirnir sem Lestin heimsækir í Los Angeles í dag. Stoppað verður stutt í skuggahverfi borgarinnar, Skid Row, og skoðaðar verða lífssögur útigangsfólks í gegnum myndbandsverkefnið Soft White Underbelly. Viðmælendur voru: Snorri Rafn Hallson, Silvía Sif Ólafsdóttir, Pétur Ingi Jónsson og Fríða Ísberg.

Halldór Armand Ásgeirsson flytur okkur svo pistil að venju á þriðjudegi. Í pistli sínum í dag heldur Halldór Armand því fram að nútíminn sé tími fortíðarinnar. Nútímastjórnmál sjá fortíðina í rósrauðum bjarma og samskiptamiðlar þrífast á fortíðinni.

Óskarsverðlaunin fóru fram í Los Angeles í gærkvöldi. Suðurkóreiska kvikmyndin Parasite kom sá og sigraði - fyrsta myndin á öðru tungumáli en ensku sem hlýtur verðlaun sem besta myndin. Hildur Guðnadóttir varð svo fyrsti Íslendingurinn til að hljóta Óskarsverðlaunin, en hún var verðlaunuð fyrir tónlistina í kvikmyndinni Jóker. Við ræðum um kvikmyndatónlist Hildar við Kristínu Jóhannesdóttur, leikstjóra, og Pétur Ben tónlistarmann.

Lestin kemur við í Sundlaugin Studio í Mosfellsbæ og ræðir við tónlistarmennina Tuma Árnason og Magnús Tryggvason Eliassen sem glíma við það stóra verkefni að túlka loftslagsbreytingar, vistdauða og söngva útdauðra fugla á væntanlegri plötu.

Kóreisk popptónlist, K-Pop, er það allra heitasta í tónlistarbransanum í dag. Hulda Hólmkelsdóttir flytur annan pistil af fjórum um það af hverju stúlkna- og drengjabönd frá Suður Kóreu eru að taka yfir heiminn. Að þessu sinni veitir hún leiðbeiningar um hvernig áhugasamir geta skapað sér feril sem K-pop stjörnur.

Um helgina verður haldið upp á Vetrarhátíð á höfuðborgarsvæðinu í 19. sinn. Lestin kemur við í ráðhúsinu og veltir fyrir sér dagskránni með Aðalheiði Santos Sveinsdóttur, viðburðarfulltrúa. Einnig verður rætt við Atla Bollason sem segir frá Vetrarblóti, reifi sem haldið verður í Hörpu sem hluti af hátíðinni.

Meira en 1500 manns hafa skrifað undir áskorun þar sem hvatt er til þess að Bíó Paradís verði bjargað. Nokkur hluti þeirra sem skrifa undir eru Pólverjar, enda hefur kvikmyndahúsið verið duglegt að sýna nýjar vinsælar pólskar bíómyndir. Við ræðum við Mörtu Magdalenu, ritstjóra Iceland News Polska, um pólskt bíó og Bíó Paradís.

Þrátt fyrir að vera hálfgerður utangarðsmaður í bresku tónlistarsenunni hafði upptökustjórinn Joe Meek lúmsk áhrif á popptónlist og upptökutækni á sjöunda áratugnum. Á sínum tíma þóttu aðferðir hans furðulegar, en tæknin sem hann þróaði hefur orðið viðtekin í hljóðverum samtímans. Þórður Ingi Jónsson skoðar skrautlegt líf og feril Joe Meek í dag.

Gunnar Theodór Eggertsson segir frá íslensku hryllingsmyndahátíðinni Frostbiter sem fór fram um helgina. Myndirnar voru auðvitað misgóðar, sumar léku sér að klisjunum en aðrar hættulega snjallar.

Um þessar mundir eru tuttugu ár frá því að tölvuleikurinn The Sims kom fyrst út. Við rifjum upp stafræna hliðartilveru í Sims-heiminum.

Við höldum niður í Hallgrímskirkju þar sem organistinn Kristján Hrannar Pálsson undirbýr tónleika þar sem hann leikur frumsamið verk í tuttugu hlutum um loftslagsbreytingar, en orgelið er sérstaklega viðeigandi hljóðfæri til að takast á við málefnið.

Í hótelanddyri í New York má heyra nýja kóratónlist frá Björk Guðmundsdóttur. Tónlistin er unnin af gervigreindarforriti Microsoft og túlkar í hljóðum himininn yfir borginni. Við kynnum okkur Kórsafn Bjarkar og Microsoft.

Á föstudögum hittist hópur fólks í Háskóla Íslands og æfir sjálfsvörn. Stundum snúast æfingarnar um að brynja líkamann, öðrum stundum um að brynja andann. Hugmyndin er að þær séu í eðli sínu feminískar. Lestin leit við á æfingu og ræddi við forsprakka hópsins, Elínborg Hörpu Önundardóttur.

Við kynnumst 16 ára raftónlistarkonu, Guðlaugu Sóley Höskuldsdóttur, sem kallar sig Gugusar. Hún var valinn rafheili Músíktilrauna 2019, vann til Kraumsverðlaunanna fyrir sína fyrstu þriggja laga útgáfu. Hún vinnur nú að breiðskífu sem kemur út síðar í mánuðinum.

Halldór Armand Ásgeirsson flytur pistil að venju á þriðjudegi. Hann heldur sig á svipuðum slóðum og í síðustu viku, þegar hann ræddi um dýrasta land í heimi, en í dag fjallar hann um þá hugmyndafræði sem hlúir að dýrtíðinni.

Og við heyrum um listamanninn sem blekkti Google Maps til að skapa ímyndaða umferðarteppu í Berlín.

K-Pop er það allra heitasta í tónlistarbransanum í dag. Hulda Hólmkelsdóttir er með hana á heilanum og tekur sér far með Lestinni næstu vikur til að útskýra fyrir okkur hinum af hverju kóreysk stúlkna- og drengjabönd eru að taka yfir heiminn.

Bergur Ísleifsson stendur á tímamótum. Ævistarf heyrir sögunni til: fór sömu leið og myndbandaleigurnar, VHS spólan, DVD-diskarnir....og kannski var kominn tími til. Það sem kom almenningi mest á óvart - þegar tilkynnt var að Myndir mánaðarins myndi ekki koma út framar - var eftir allt það að blaðið hefði ennþá verið að koma út. En Bergur elskaði að skrifa um kvikmyndir og í dag rifjar hann upp hvernig það sem var í grunninn auglýsingabæklingur varð að ástríðu.

Það eru fáir tónlistarmenn sem mótuðu hljóm hins svokallaða síðpönks jafn mikið og breski gítarleikarinn Andy Gill úr hljómsveitinni Gang of Four, en hann lést um helgina 64 ára að aldri. Hrykkjóttur, krampakenndur ásláttur, skær bjagaður hljómur, leikur að enduróm og hálfgerð and-gítarsóló einkenndu gítarleik hans og urðu einkennismerki þessarar stefnu. Við minnumst Andy Gill í Lestinni í dag, og ræðum við tvo einstaklinga sem þekktu hann úr ólíkum áttum Höllu gunnarsdóttur og Trausta Júlíusson.